ରାଜନଗର,୩୦/୦୯: ଭୁବନେଶ୍ୱର ଉପକଣ୍ଠ ଭରତପୁର ଥାନା ଘଟଣା ସମଗ୍ର ଦେଶରେ ଚର୍ଚ୍ଚାର ବିଷୟ ପାଲଟିଥିବା ବେଳେ ଏବେ ରାଜନଗର ପୁଲିସର ଦବଙ୍ଗଗିରି ନେଇ ଅଭିଯୋଗ ପଦାକୁ ଆସିଛି । ଗତକାଲି ରାତିରେ ଥାନା ଏଏସ୍ଆଇଙ୍କ ମାଡ଼ରେ ଜଣେ ଯୁବ ବ୍ୟବସାୟୀ ଗୁରୁତର ହୋଇଛନ୍ତି । ଆହତ ବ୍ୟବସାୟୀ ହେଲେ ରାଜନଗର ବ୍ଲକ କଣ୍ଡିରା ପଞ୍ଚାୟତ ହଂସୁଆଗୁଳା ଗ୍ରାମର ପ୍ରମୋଦ ବିଶ୍ୱାଳ(୪୩) । ନ୍ୟାୟ ଦାବିରେ ସେ ଜିଲ୍ଲା ଆରକ୍ଷୀ ଅଧୀକ୍ଷକଙ୍କୁ ଫେରାଦ୍ ହୋଇଥିବା ବେଳେ ଆଜି ସନ୍ଧ୍ୟାରେ ପୀଡ଼ିତଙ୍କ ମା’ ଉତ୍ତରା ବିଶ୍ୱାଳ ଥାନାରେ ଏତଲା ଦେଇଛନ୍ତି ।
ଅଭିଯୋଗ ମୁତାବକ, ଜଳିଛକରେ ଏକ କ୍ୟାବିନ୍ ପକାଇ ପ୍ରମୋଦ ତେଜରାତି ଦୋକାନ କରିଛନ୍ତି । ଶନିବାର ରାତି ପ୍ରାୟ ସାଢ଼େ ୯ଟା ବେଳେ ରାଜନଗର ପୁଲିସର ଏକ ପାଟ୍ରୋଲିଂ ଭ୍ୟାନ୍ ତାଙ୍କ ଦୋକାନ ନିକଟରେ ଅଟକିଥିଲା । ସେହି ସମୟରେ ପ୍ରମୋଦ ଦୋକାନରେ ଧୂପ ଦେଉଥିଲେ । ଭ୍ୟାନ୍ରୁ ରାଜନଗର ଥାନାର ଏଏସ୍ଆଇ ନରେନ୍ଦ୍ର କୁମାର ସିଂ ଓହ୍ଲାଇ ଅଦ୍ୱୈତ ବିଶ୍ୱାଳଙ୍କ ଦୋକାନ ଏଇଟା କି ବୋଲି ପଚାରିଥିଲେ । ପ୍ରମୋଦ ମନା କରିବାରୁ ତାଙ୍କ ଘର କେଉଁଠି ବୋଲି ଏଏସ୍ଆଇ ପଚାରିଥିଲେ । ତାଙ୍କ ଘର ଆଗରେ ବୋଲି ପ୍ରମୋଦ କହିଥିଲେ । କିଛି ସମୟ ପରେ ପୁଲିସ ଭ୍ୟାନ୍ ପୁଣି ଆସି ତାଙ୍କ ଦୋକାନ ନିକଟରେ ପହଞ୍ଚିଥିଲା । ଏଏସ୍ଆଇ ଶ୍ରୀ ସିଂ ପ୍ରମୋଦଙ୍କୁ ଅଶ୍ଳୀଳ ଭାଷାରେ ଗାଳିଗୁଲଜ କରିବା ସହ ଆମକୁ କାହିଁକି ମିଛ କହିଲୁ ବୋଲି ତାଙ୍କ ସାର୍ଟ କଲର ଧରି ଦୋକାନ ଭିତରୁ ଟାଣିଆଣିଥିଲେ। ବାଡ଼ିରେ ଦୁଇ ଜଂଘ, ଦୁଇ ହାତ ଓ ପିଠିକୁ ନିର୍ଧୁମ ପିଟିଥିଲେ ।
କେବଳ ସେତିକି ନୁହେଁ, ତାଙ୍କ ଗୁପ୍ତାଙ୍ଗକୁ ଗୋଇଠା ମାରିଥିଲେ । ପ୍ରମୋଦ ଚିତ୍କାର କରି ତଳେ ଗଡ଼ୁଥିବା ବେଳେ ପୁଲିସ ଟିମ୍ ଭ୍ୟାନ୍ରେ ବସି ପଳାଇ ଯାଇଥିଲେ । ପରିବାର ଲୋକେ ପ୍ରଥମେ ରାଜନଗର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ତାଙ୍କୁ ଚିକିତ୍ସା ପାଇଁ ଭର୍ତ୍ତି କରିଥିଲେ । ଅବସ୍ଥା ଗୁରୁତର ଥିବାରୁ ଡାକ୍ତର ତାଙ୍କୁ କେନ୍ଦ୍ରାପଡ଼ା ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରିଛନ୍ତି । ପ୍ରମୋଦ କେନ୍ଦ୍ରାପଡ଼ାରେ ଚିକିତ୍ସିତ ହେଉଥିବା ବେଳେ ଜିଲ୍ଲା ଆରକ୍ଷୀ ଅଧୀକ୍ଷକଙ୍କ ନିକଟରେ ଅଭିଯୋଗ କରିବା ସହ ନ୍ୟାୟ ଭିକ୍ଷା କରିଛନ୍ତି । ଅଭିଯୋଗ ସଂପର୍କରେ ଏଏସ୍ଆଇ ଶ୍ରୀ ସିଂଙ୍କୁ ପଚାରିବାରେ ସେମିତି କିଛି ହୋଇନାହିଁ ବୋଲି କହି ସେ କଥାକୁ ଏଡ଼ାଇ ଯାଇଛନ୍ତି । ଅନ୍ୟପକ୍ଷରେ ଥାନା ଆଇଆଇସି ଅଜୟ କୁମାର ଜେନାଙ୍କୁ ପଚାରିବାରେ ସେ ଘଟଣା ସମ୍ପର୍କରେ କିଛି ଜାଣି ନଥିବା କହିଛନ୍ତି । ମାତ୍ର ଏ ସମ୍ପର୍କରେ ଅତିରିକ୍ତ ଜିଲ୍ଲା ଆରକ୍ଷୀ ଅଧୀକ୍ଷକ ଦେବାଶିଷ ଧଳଙ୍କୁ ପଚାରିବାରେ ସେ କହିଛନ୍ତି ଯେ ଅଭିଯୋଗ ଆଧାରରେ ତଦନ୍ତ କରାଯିବ ଓ ଉପଯୁକ୍ତ ପଦକ୍ଷେପ ନିଆଯିବ।
