ନୂଆଦିଲ୍ଲୀ: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ମହତ୍ୱାକାଂକ୍ଷୀ ୱାନ୍ ବିଗ୍‌ ବିୟୁଟିଫୁଲ୍ ବିଲ୍ ଜୁଲାଇ ୪ (ଶୁକ୍ରବାର) ସିନେଟରେ ପାରିତ ହୋଇଛି । ଏହି ବିଲ୍ ପାରିତ ହେବା ପରେ ଏହାକୁ କାର୍ଯ୍ୟକାରୀ କରିବା ପାଇଁ ୩.୪ ଟ୍ରିଲିୟନ ଡଲାର ଖର୍ଚ୍ଚ କରିବାକୁ ପଡିବ ବୋଲି ଆକଳନ କରାଯାଇଛି । ଏହା ଦ୍ବାରା ଆମେରିକାର ଆର୍ଥିକ ନିଅଣ୍ଟ ବୃଦ୍ଧି ପାଇବ । ଟ୍ରମ୍ପ ହୁଏତ ଏହି ବିଲର ପ୍ରବଳ ସମର୍ଥକ କିନ୍ତୁ ଏହା ଆମେରିକାରେ ପ୍ରବଳ ବିରୋଧର ସମ୍ମୁଖୀନ ହେଉଛି। ଆମେରିକାର ଅର୍ଥନୀତିଜ୍ଞମାନେ ଚିନ୍ତା ପ୍ରକାଶ କରିଛନ୍ତି । ସେମାନଙ୍କ ମତରେ, ଯଦି ଏହାକୁ ବନ୍ଦ କରା ନଯାଏ, ତେବେ ଏହା ଆମେରିକୀୟ ପରିବାର ଏବଂ ବିଶ୍ୱ ଅର୍ଥନୈତିକ ବ୍ୟବସ୍ଥାକୁ ବଡ଼ ସମସ୍ୟାର ସମ୍ମୁଖୀନ ହେବାକୁ ବାଧ୍ୟ କରିପାରେ । 

ପ୍ରକୃତରେ ଆମେରିକାରେ ପ୍ରତି ପରିବାର ଉପରେ ହାରାହାରି ଋଣ ବୋଝ ପ୍ରାୟ ୨୩୦,୦୦୦ ଡଲାର । ୨୦୨୫ ସୁଦ୍ଧା ଆମେରିକାର ମୋଟ ଋଣ ଦେଶର ମୋଟ ଜିଡିପିର ପ୍ରାୟ ୧୦୦ ପ୍ରତିଶତ ସହିତ ସମାନ । ଏପରିକି ଏହି ଋଣ ସରକାରଙ୍କ ବାର୍ଷିକ ଆୟର ପ୍ରାୟ ୬ ଗୁଣ ଅଧିକ। ଏପରି ପରିସ୍ଥିତିରେ, ବଡ଼ ନିବେଶକମାନେ ଟ୍ରମ୍ପଙ୍କ ବିଗ୍‌ ବିୟୁଟିଫୁଲ ବିଲ୍‌କୁ ଏକ ବଡ଼ ବୋଝ ବୋଲି କହିଛନ୍ତି । ପ୍ରସିଦ୍ଧ ନିବେଶକ ଏବଂ ବ୍ରିଜୱାଟର ଆସୋସିଏଟର ପ୍ରତିଷ୍ଠାତା ରେ’ ଡାଲିଓ ଆମେରିକୀୟ ସରକାରଙ୍କ ନୂତନ ବଜେଟ୍ ବିଲ୍ ସମ୍ପର୍କରେ ଏକ ଗମ୍ଭୀର ଚେତାବନୀ ଦେଇଛନ୍ତି । 

ସେ କହିଛନ୍ତି ଯେ, ଯଦି ବଜେଟର ଏହି ଗଠନ ଜାରି ରହେ ତେବେ କେବଳ ଆମେରିକା ନିଜେ ଆର୍ଥିକ ସଙ୍କଟରେ ଫସିଯିବ ନାହିଁ, ବରଂ ଏହା ସମଗ୍ର ବିଶ୍ୱକୁ ପ୍ରଭାବିତ କରିବ । ଆମେରିକା ପ୍ରତିବର୍ଷ ପ୍ରାୟ ୭ ଟ୍ରିଲିୟନ ଡଲାର ଖର୍ଚ୍ଚ କରିବ । କିନ୍ତୁ ଏହାର ଆୟ କେବଳ ୫ ଟ୍ରିଲିୟନ ଡଲାର ହେବ । ଅର୍ଥାତ ପ୍ରତିବର୍ଷ ୨ ଟ୍ରିଲିୟନ ଡଲାରର କ୍ଷତି ସହିବ ଆମେରିକା । ଏହି ନିଅଣ୍ଟ ଭବିଷ୍ୟତରେ ଆମେରିକାର ଜାତୀୟ ଋଣକୁ ଆହୁରି ବଢ଼ାଇ ଦେବ । ରେ ଡାଲିଓଙ୍କ ଅନୁଯାୟୀ, ବର୍ତ୍ତମାନ ଆମେରିକାର ଋଣ ଏହାର ମୋଟ ଆୟର ୬ ଗୁଣ । GDPର ୧୦୦% ଏବଂ ଆମେରିକୀୟ ପରିବାର ହାରାହାରି ୨୩୦,୦୦୦ ଡଲାର  (ପ୍ରାୟ ୧.୯୬ କୋଟି ଟଙ୍କା) ଋଣୀ । ସେ ଆହୁରି କହିଛନ୍ତି, ଯଦି ପରିସ୍ଥିତିରେ ଉନ୍ନତ୍ତି ନଆସେ ତେବେ ଆମେରିକାର ପ୍ରତି ପରିବାର ଉପରେ ଋଣ ଭାର ହାରାହାରି ୩.୬୩ କୋଟି ଟଙ୍କାକୁ ବୃଦ୍ଧି ପାଇପାରେ ।