ନୂଆଦିଲ୍ଲୀ, ୦୫/୦୭ : ଜାପାନରେ ଆସିବ ମହା ଭୂମିକମ୍ପ । ପ୍ରକୃତିରେ ଏହି ତାଣ୍ଡବରେ ଚାଲିଯିବ ୩ ଲକ୍ଷ ଲୋକଙ୍କ ପ୍ରାଣ। ୨ ଟ୍ରିଲିଅନ କ୍ଷତି ହେବାର ସମ୍ଭାବନା। ପ୍ରଶାନ୍ତ ମହାସାଗର ଉପକୂଳରେ ସମ୍ଭାବ୍ୟ ଭୂକମ୍ପ ଆସିବା ନେଇ ଲମ୍ବା ସମୟ ଧରି ଆଶଙ୍କା କରାଯାଉଛି। ଜାପାନ ସରକାର ଜାରି କରିଥିବା ରିପୋର୍ଟରେ ଏଭଳି କିଛି କୁହାଯାଇଛି।
ପ୍ରଶାନ୍ତ ମହାସାଗରରେ ଥିବା ନାନକାଇ ଘାଟିରେ ଥିବା ସବଡକ୍ସନ ଜୋନରୁ ଭୂମିକମ୍ପର ଏପି ସେଣ୍ଟର ହେବ । ଅର୍ଥାତ୍ ସମୁଦ୍ର ଭିତରେ ଥିବା ଦୁଇଟି ଟାକ୍ଟୋନିକ୍ ପ୍ଲେଟର ଡାଇଭରଜେଣ୍ଟ ଯୋଗୁ ନାନକାଇ ଘାଟି ସୃଷ୍ଟି ହୋଇଛି । ଏହି ସ୍ଥାନ ଦକ୍ଷିଣ ହୋଂଶୁ ଦ୍ବୀପର ନନକାଇଡୋ ଅଞ୍ଚଳରେ ରହିଛି । ପୂର୍ବରୁ ଏହି ସ୍ଥାନରୁ ଭୂମିକମ୍ପ ମଧ୍ୟ ଅନୁଭୂତ ହୋଇଛି । ଏଠାରୁ ମହା ଭୂମିକମ୍ପ ଆସିଲେ, ଏହାଦ୍ବାରା କୋଶୀ, ଓସାକା, ନାଗୋୟା ଭଳି ବଡ଼ ଅଞ୍ଚଳ ପ୍ରଭାବିତ ହେବ । ଭୂମିକମ୍ପ ପରେ ବିନାଶର କାରଣ ହେବ ବିଲ୍ଡିଂ ଭୁଶୁଡ଼ିବା ଏବଂ ସୁନାମୀ । ମେଗା ଭୂମିକମ୍ପ ଆସିଲେ ପ୍ରାୟ ୩ ଲକ୍ଷ ଲୋକ ଜୀବନ ହାନି ଘଟିବ ବୋଲି କୁହାଯାଇଛି । ଏହା ଜାପାନର ୧୦ ପ୍ରତିଶତ ଜନସଂଖ୍ୟା । ସେହିପରି ଭୂକମ୍ପ ଯୋଗୁ ୧.୨୩ ମିଲିୟନ ଲୋକ ଅନ୍ୟଦେଶରେ ଶରଣ ନେବା ପାଇଁ ବାଧ୍ୟ ହେବ ।
ଜାପାନ ସରକାର ଅନୁମାନ କରୁଛନ୍ତି, ନାନକାଇ ଘାଟିରେ ୮ରୁ ୯ ତୀବ୍ରତା ବିଶିଷ୍ଟ ଭୂମିକମ୍ପ ଆସିବାର ୭୫ ରୁ ୮୨ ପ୍ରତିଶତ ସମ୍ଭାବନା ରହିଛି। ପ୍ରତ୍ୟେକ ୧୦୦ରୁ ୧୫୦ ମଧ୍ୟରେ ଏହି ସବଡକ୍ସନ ଜୋନରୁ ମେଗା ଭୂମିକମ୍ପ ଆସିଥାଏ । ୨୦୧୧ରେ ନାନକାଇ ଘାଟିରେ ୯.୦ ତିବ୍ରତା ବିଶିଷ୍ଟ ଭୂମିକମ୍ପ ଆସିଥିଲା । ଏଥିରେ ପ୍ରାୟ ୧୫ ହାଜରଙ୍କ ଜୀବନ ଯାଇଥିଲା । ମେଗା ଭୂମିକମ୍ପ ଆସିଲେ ବହୁ ସଂଖ୍ୟାରେ ଲୋକ ପ୍ରାଣ ହରାଇବେ ବୋଲି କୁହାଯାଇଛି।
