ନୂଆଦିଲ୍ଲୀ, ୫।୭: ପ୍ରବଳ ବର୍ଷା ଯୋଗୁଁ ନଦୀ ଜଳ ସ୍ତର ବୃଦ୍ଧି ପାଇଁ ଟେକ୍ସାସରେ ହଠାତ୍ ବନ୍ୟା ଆସିଥିଲା । ଯେଉଁଥିରେ ଅତି କମ୍ରେ ୨୪ ଜଣଙ୍କର ମୃତ୍ୟୁ ହୋଇଥିବା ସୂଚନା । ଏଥିସହ ଅନେକ ଲୋକ ନିଖୋଜ ହୋଇଥିବା ଖବର ମଧ୍ୟ ଆସୁଛି । ଏକ ସମର୍ କ୍ୟାମ୍ପରୁ ୨୦ରୁ ଅଧିକ ଝିଅ ନିଖୋଜ ଅଛନ୍ତି । ୨୫ ସେମିରୁ ଅଧିକ ବର୍ଷା ହେବା ପରେ ବନ୍ୟା ସ୍ଥିତି ଉପୁଜିଛି । ଗୁଆଡାଲୁପ୍ ନଦୀର ଜଳସ୍ତର ବଢ଼ିଯିବାରୁ ସବୁ ସହରରେ ବନ୍ୟା ଜଳ ପ୍ରବାଭିତ ହୋଇଛି । ଗତକାଲି ବିଳମ୍ବିତ ରାତିରେ କେର କାଉଣ୍ଟି ସେରିଫ୍ ଲାରି ଲିଥା ଶୁକ୍ରବାର କହିଛନ୍ତି ଯେ, ବନ୍ୟା ପ୍ରଭାବରେ ପ୍ରାୟ ୨୪ ଜଣଙ୍କର ମୃତ୍ୟୁ ଘଟିଛି । ଉଦ୍ଧାରକାରୀଦଳ ଏ ପର୍ଯ୍ୟନ୍ତ ୨୩୭ ଜଣଙ୍କୁ ସୁରକ୍ଷିତ ସ୍ଥାନକୁ ଆଣିଛନ୍ତି । ସେମାନଙ୍କ ମଧ୍ୟରୁ ୧୬୭ ଜଣଙ୍କୁ ହେଲିକପ୍ଟର ଯୋଗେ ଆଣାଯାଇଛି । ବର୍ତ୍ତମାନ ଉଦ୍ଧାର କାର୍ଯ୍ୟ ଜାରି ରହିବା ସହିତ ଆଗକୁ ମୃତ୍ୟୁ ସଂଖ୍ୟା ବୃଦ୍ଧି ପାଇବା ଆଶଙ୍କା ଥିବା ଅଧିକାରୀମାନେ ସୂଚନା ଦେଇଛନ୍ତି ।
ନିଖୋଜମାନଙ୍କ ମଧ୍ୟରେ ସମର୍ କ୍ୟାମ୍ପ ମିଷ୍ଟିକର ୨୦ରୁ ଅଧିକ ଝିଅ ଅଛନ୍ତି, ଯେଉଁଠାରେ ମୋଟ୍ ୭୫୦ ଜଣ ଉପସ୍ଥିତ ଥିଲେ । ଟେକ୍ସାସର ଲେଫ୍ଟନାଣ୍ଟ ଗଭର୍ଣ୍ଣର ଡାନ୍ ପାଟ୍ରିକ୍ ନିଶ୍ଚିତ କରିଛନ୍ତି ଯେ, ଶୁକ୍ରବାର ଅପରାହ୍ନ ସୁଦ୍ଧା ୬ରୁ ୧୦ ଜଣଙ୍କ ମୃତଦେହ ଉଦ୍ଧାର କରାଯାଇଛି । ମୃତଦେହ ମଧ୍ୟରେ ବୟସ୍କ ଓ ଛୋଟ ପିଲା ମଧ୍ୟ ରହିଛନ୍ତି । ଲୋକଙ୍କୁ ସୁରକ୍ଷିତ ଉଦ୍ଧାର ଲାଗି ୯ଟି ଉଦ୍ଧାରକାରୀ ଦଳ, ୧୪ଟି ହେଲିକପ୍ଟର ଏବଂ ୧୨ଟି ଡ୍ରୋନ୍ ସମେତ ସନ୍ଧାନୀ ଦଳ ନିରନ୍ତର କାର୍ଯ୍ୟ କରୁଛନ୍ତି ।
