ନୂଆଦିଲ୍ଲୀ,୫।୭: ଆସୋସିଏସନ୍ ଅଫ୍ ଡେମୋକ୍ରାଟିକ୍ ରିଫମର୍ସ (ଏଡିଆର) ବିହାରରେ ମତଦାତାଙ୍କ ସୂଚିରେ ବିଶେଷ ପୁନଃନିରୀକ୍ଷଣ(ଏସଆଇଆର) ପାଇଁ ନିର୍ବାଚନ କମିଶନ୍ଙ୍କ ନିର୍ଦେଶକୁ ଚ୍ୟାଲେଞ୍ଜ ଦେଇଛି। ଏଡିଆର ସୁପ୍ରିମକୋର୍ଟଙ୍କ ଦ୍ବାରସ୍ତ ହେବା ସହ ଏହି ନିର୍ଦେଶକୁ ରଦ୍ଦ କରିବାର ଦାବି କରିଛି। ୨୪ ଜୁନ୍ରେ ନିର୍ବାଚନ କମିଶନ୍ ବିହାରରେ ଏସଆଇଆର କରିବାରେ ନିର୍ଦେଶ ଜାରି କରିଥିଲେ। ଏହାର ଉଦେଶ୍ୟ ଅଯୋଗ୍ୟ ନାମ ଗୁଡିକୁ ହଟାଇବା ଓ ଏହା ସୁନିଶ୍ଚିତ କରିବା ଯେ, ମତଦାତା ସୂଚୀରେ କେବଳ ଯୋଗ୍ୟ ନାଗରିକ ଅଛନ୍ତି। ବିହାରରେ ଚଳିତ ବର୍ଷ ଶେଷରେ ନିର୍ବାଚନ ହେବାର ଅଛି।
ପ୍ରଶାନ୍ତ ଭୂଷଣ କହିଛନ୍ତି, ନିର୍ଦେଶ ଅନୁସାରେ, ଜରୁରୀ ଦସ୍ତାବିଜ, ଉଚିତ ପକ୍ରିୟାରେ ଅଭାବ ଓ ବିହାରରେ ମତଦାନ ସୂଚୀରେ ବିଶେଷ ଭାବରେ ପୁନଃନିରୀକ୍ଷଣ କରିବା ପାଇଁ କମ୍ ସମୟ ସୀମା କାରଣରୁ ଏହି ପକ୍ରିୟାରେ ଲକ୍ଷାଧିକ ମତଦାତାଙ୍କ କ୍ଷତି ହୋଇପାରେ। ଏହା ଜରିଆରେ ଲକ୍ଷାଧିକ ଯୋଗ୍ୟ ମତଦାତାଙ୍କ ନାଁ ମତଦାନ ସୂଚୀରୁ ହଟାଇ ଦିଆଯାଇପାରେ, ଯାହାଫଳରେ ସେମାନେ ମତାଧିକାରରୁ ବଞ୍ଚିତ ହେବେ।
ବିହାରରେ ଶେଷ ସଂଶୋଧନ ୨୦୦୩ ମସିହାରେ କରାଯାଇଥିଲା। ନିର୍ବାଚନ କମିଶନଙ୍କ ଅନୁଯାୟୀ, ଦ୍ରୁତ ସହରୀକରଣ, ନିରନ୍ତର ପ୍ରବାସ, ଯୁବ ନାଗରିକମାନେ ଭୋଟ ଦେବାକୁ ଯୋଗ୍ୟ ହେବା, ମୃତ୍ୟୁ ସୂଚନା ନଦେବା ଏବଂ ବିଦେଶୀ ଅବୈଧ ପ୍ରବାସୀମାନଙ୍କ ନାମ ଅନ୍ତର୍ଭୁକ୍ତ ହେବାର ସମ୍ଭାବନା ଯୋଗୁଁ ଏହି ପ୍ରକ୍ରିୟା ଜରୁରୀ ହୋଇପଡ଼ିଛି। ଏହି ପ୍ରକ୍ରିୟା ମାଧ୍ୟମରେ, ନିର୍ବାଚନ କମିଶନ ତ୍ରୁଟିମୁକ୍ତ ଭୋଟର ତାଲିକାର ଅଖଣ୍ଡତା ଏବଂ ପ୍ରସ୍ତୁତି ସୁନିଶ୍ଚିତ କରିବାକୁ କହିଥିଲେ।
ଏହି ଏସଆଇଆର ବୁଥ୍ ଅଫିସରମାନଙ୍କ ଦ୍ୱାରା ପରିଚାଳିତ ହେଉଛି, ଯେଉଁମାନେ ଯାଞ୍ଚ ପାଇଁ ଘରକୁ ଘର ବୁଲି ସର୍ଭେ କରୁଛନ୍ତି। ନିର୍ବାଚନ କମିଶନ କହିଛନ୍ତି ଯେ ସଂଶୋଧନ କରିବା ସମୟରେ ସମ୍ବିଧାନର ଧାରା ୩୨୬ ଏବଂ ଜନପ୍ରତିନିଧି ଆଇନ, ୧୯୫୦ ର ଧାରା ୧୬ ରେ ଥିବା ସାମ୍ବିଧାନିକ ଏବଂ ଆଇନଗତ ବ୍ୟବସ୍ଥାଗୁଡ଼ିକୁ କଠୋରତାର ସହ ପାଳନ କରିବେ।