ନୂଆଦିଲ୍ଲୀ: ଇଣ୍ଡିଆନ୍ ପ୍ରିମିୟର ଲିଗରୁ ଲୋକପ୍ରିୟତା ପାଇଥିବା ଭାରତୀୟ କ୍ରିକେଟର ୟଶ୍ ଦୟାଲ୍ ବିବାଦରେ ଫସିଛନ୍ତି । ଆଇପିଏଲ୍ ୨୦୨୫ରେ ରୟାଲ୍ ଚ୍ୟାଲେଞ୍ଜର୍ସ ବେଙ୍ଗାଲୁରୁକୁ ଚାମ୍ପିଅନ୍ କରାଇବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିବା ୟଶ୍ ଦୟାଲଙ୍କ ବିରୋଧରେ ଜଣେ ମହିଳା ଯୌନ ଶୋଷଣ, ହିଂସା ଏବଂ ଠକେଇର ଅଭିଯୋଗ ଆଣିଛନ୍ତି । ପୀଡିତା ସୋସିଆଲ ମିଡିଆରେ ଏକ ପୋଷ୍ଟ ମାଧ୍ୟମରେ ଏହି ବାମହାତୀ ଦ୍ରୁତ ବୋଲରଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବି କରିଛନ୍ତି ।
ପୀଡିତା ଏହି ମାମଲାରେ ନ୍ୟାୟ ପାଇଁ ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଏବଂ ରାଜ୍ୟ ପୁଲିସକୁ ଆବେଦନ କରିଛନ୍ତି । ୟଶ ଦୟାଲ ଘରୋଇ କ୍ରିକେଟରେ ଉତ୍ତରପ୍ରଦେଶ ପାଇଁ ଏବଂ ଆଇପିଏଲରେ ବେଙ୍ଗାଲୁରୁ ପାଇଁ ଖେଳୁଛନ୍ତି । ସେ ନିକଟ ଅତୀତରେ ଏହି ଲିଗରୁ ବହୁତ ପ୍ରସିଦ୍ଧି ଅର୍ଜନ କରିଛନ୍ତି । ଗତ ବର୍ଷ ତାଙ୍କୁ ପ୍ରଥମ ଥର ପାଇଁ ଭାରତର ଟି-୨୦ ଦଳରେ ସାମିଲ କରାଯାଇଥିଲା । ସେ ଭାରତ ଏ ଦଳ ପାଇଁ କିଛି ମ୍ୟାଚ୍ ମଧ୍ୟ ଖେଳିଛନ୍ତି । ଜୁନ୍ ରେ ଦୟାଲ ଆରସିବିକୁ ଆଇପିଏଲ ଚାମ୍ପିଅନ କରିବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ । କିନ୍ତୁ ବର୍ତ୍ତମାନ ତାଙ୍କ ବିରୋଧରେ ଆସିଥିବା ସଙ୍ଗୀନ ଅଭିଯୋଗ ଦୟାଲଙ୍କ ସଫଳତାର ଚମକକୁ ଫିକା କରି ଦେଇପାରେ ।
ପୀଡିତା ହେଲ୍ପଲାଇନ୍ ପୋର୍ଟାଲରେ ତାଙ୍କର ଅଭିଯୋଗ ଦାଖଲ କରିଛନ୍ତି । ଏହାର ସ୍କ୍ରିନସଟ୍ ସୋସିଆଲ ମିଡିଆରେ ପୋଷ୍ଟ କରିଛନ୍ତି । ମହିଳା ଜଣଙ୍କ ଏହି ପୋଷ୍ଟରେ ଦୟାଲଙ୍କ ସହିତ ତାଙ୍କର ଫଟୋ ମଧ୍ୟ ସେୟାର କରିଥିବା ଦେଖିବାକୁ ମିଳିଛି । ମହିଳା ଜଣଙ୍କ ଦାବି କରିଛନ୍ତି ଯେ, ସେ ଗତ ୫ ବର୍ଷ ଧରି କ୍ରିକେଟରଙ୍କ ସହ ସମ୍ପର୍କରେ ଥିଲେ । କିନ୍ତୁ ସଂପୃକ୍ତ କ୍ରିକେଟର ତାଙ୍କୁ ବିବାହର ପ୍ରଲୋଭନ ଦେଖାଇ ମାନସିକ ଏବଂ ଶାରୀରିକ ଶୋଷଣ କରିଥିଲେ ।
କ୍ରିକେଟର ତାଙ୍କ ପରିବାର ସହ ତାଙ୍କୁ ପରିଚିତ କରାଇଥିଲେ ଏବଂ ଭବିଷ୍ୟତର ବୋହୂ ବୋଲି କହିଥିଲେ । ପରବର୍ତ୍ତୀ ସମୟରେ ସେ ଠକି ଦେଇଛନ୍ତି ବୋଲି ପୀଡ଼ିତା ଅଭିଯୋଗ କରିଛନ୍ତି । ସେହିଭଳି ୟଶ ଦୟାଲ ତାଙ୍କୁ ଶାରୀରିକ ଏବଂ ମାନସିକ ନିର୍ଯାତନା ଦେଇଛନ୍ତି । ଅନ୍ୟ ଯୁବତୀମାନଙ୍କ ସହ ମଧ୍ୟ ସେ ସଂପର୍କ ରଖିଥିବା ନେଇ ପୋଷ୍ଟରେ କହିଛନ୍ତି ପୀଡ଼ିତା । ସେପଟେ ଏଭଳି ଅଭିଯୋଗ ଉପରେ କ୍ରିକେଟର ୟଶ ଦୟାଲଙ୍କ ପ୍ରତିକ୍ରିୟା ମିଳିନାହିଁ ।
