କଟକ,୦୫/୦୭: ଅନ୍ତର୍ଜାତୀୟ ସ୍ତରରେ ଅତିଥିଙ୍କୁ ଉପହାର ଦେବା କଥା ଉଠିଲେ ରୁପା ତାରକସି ଏବେ ମୋଦି ସରକାରଙ୍କ ପ୍ରଥମ ପସନ୍ଦ ପାଲଟିଛି । ନିକଟରେ ଘାନା ଗସ୍ତରେ ଯାଇଥିବା ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସେଠାକାର ରାଷ୍ଟ୍ରପତିଙ୍କ ପତ୍ନୀଙ୍କୁ ଏକ ସୁନ୍ଦର ରୁପା ତାରକସିର ପର୍ସ ଉପହାର ଦେଇଥିବା ଜାତୀୟ ଗଣମାଧ୍ୟମରେ ସୂଚନା ଆସିଛି । ସେହିପରି କିଛି ଦିନ ପୂର୍ବରୁ କାନାଡ଼ାର ଗଭର୍ଣ୍ଣର ଜେନେରାଲ୍ ମ୍ୟାରି ସିମନ୍ଙ୍କୁ ରୁପା ତାରକସି ପର୍ସ ଉପହାର ଦେଇଥିଲେ ପ୍ରଧାନମନ୍ତ୍ରୀ । କେବଳ ସେତିକି ନୁହେଁ, ବୈଦେଶିକ ଅତିଥିଙ୍କୁ ସ୍ୱାଗତ ସମ୍ବର୍ଦ୍ଧନା ଦେବା ବେଳେ ରୁପାର କୋଣାର୍କ ଚକ୍ର ପ୍ରଦାନ କରାଯାଉଛି । ଏ ସବୁଥିରେ ରୁପାର ଚମକ ଦେଖିବାକୁ ମିଳୁଥିବାରୁ ସାରା ବିଶ୍ୱରେ କଟକର ଆଦର ବଢୁଛି । କିନ୍ତୁ ଉପହାର ଦିଆଯାଉଥିବା ଏସବୁ ରୁପାର ଉପହାର ଯେ ପ୍ରକୃତରେ ଜିଆଇ ମାନ୍ୟତାପ୍ରାପ୍ତ କଟକ ତାରକସି, ତାହାକୁ ନେଇ ଏବେ ଦ୍ୱନ୍ଦ୍ୱ ଉପୁଜିଛି ।
ଏ ପ୍ରସଂଗରେ ରୁପା ତାରକସି ଉତ୍ପାଦକ ଗୋଷ୍ଠୀ, ବିଶେଷଜ୍ଞ ବି ପ୍ରଶ୍ନ ଉଠାଉଛନ୍ତି । କଟକର ସାମଗ୍ରୀ ଉପହାର ଦେବା ଦ୍ୱାରା ସାରା ବିଶ୍ୱରେ କଟକ ତାରକସିର ପରିଚୟ ବ୍ୟାପକ ହେଉଛି ସତ କିନ୍ତୁ ସାମଗ୍ରୀ କେଉଁଠାରୁ ନିଆଯାଉଛି, ଏହା ପ୍ରକୃତରେ କଟକର ତାରକସି କି ନାହିଁ ତାର ଯାଞ୍ଚ୍ କରାଯାଉ । ତାରକସି ଜିଆଇ ମାନ୍ୟତା ପାଇବା ପରେ ବୈଦେଶିକ କ୍ଷେତ୍ରରେ ବ୍ୟବହାର କରିବା ପୂର୍ବରୁ ପ୍ରକୃତ ଜିଆଇ ସାମଗ୍ରୀ କିଣାଯିବା ଉଚିତ୍ । ସାମଗ୍ରୀ ଯାଞ୍ଚ୍ କରିବାକୁ ଏକ ଅନୁଧ୍ୟାନକାରୀ ଦଳ(ଇନ୍ସପେକ୍ସନ୍ ଟିମ୍) ବ୍ୟବସ୍ଥା ସଂପର୍କରେ ବି ଜିଆଇ ମାନ୍ୟତା ପାଇବା ପର ସର୍ତ୍ତରେ ଉଲ୍ଲେଖ ରହିଛି । କିନ୍ତୁ ଏବେ ଯାଏ ଏ ପ୍ରକ୍ରିୟା ଆରମ୍ଭ ହୋଇନାହିଁ । ଫଳରେ କଟକର ରୁପା ତାରକସି ନାଁ ଓ ରୂପ ନେଇ ଅନ୍ୟ ରାଜ୍ୟର ସାମଗ୍ରୀ ଆଜି ବି ମାର୍କେଟ୍ରେ ଉପଲବ୍ଧ ରହିଛି ।
ବିଶେଷକରି ତେଲେଙ୍ଗାନାର କରିମ୍ନଗର, ଜୟପୁର ଓ ପଶ୍ଚିମବଙ୍ଗରୁ ରୁପା ତିଆରି ସାମଗ୍ରୀ ତାରକସିର ଭ୍ରମ ସୃଷ୍ଟି କରୁଛି । ପୂର୍ବରୁ ଜି-୭ ସମ୍ମିଳନୀରେ ରୁପା କୋଣାର୍କ ଚକ୍ର ଉପହାର ପ୍ରଦାନ କରାଯାଇଥିଲା, ଯାହା ଓଡ଼ିଶାର ଉତ୍ପାଦନ ନଥିଲା । କୋଣାର୍କ ଚକ୍ର ପଡ଼ୋଶୀ ରାଜ୍ୟର କଳାକାରମାନେ ତିଆରି କରି ଯୋଗାଇଥିଲେ । ଏ ସମ୍ପର୍କରେ ଓଡ଼ିଶା ଫିଲିଗ୍ରୀର ପରିଚାଳକ ତବରେଜ୍ ଖାନ୍ କହନ୍ତି, ରୁପା ତାରକସି କାମର ସୂକ୍ଷ୍ମତା ବେଶ୍ ସ୍ପଷ୍ଟ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଯେଉଁ ପର୍ସ ଉପହାର ଦେଉଛନ୍ତି ତାହା ରୁପା ତାରକସି ନୁହେଁ । ପର୍ସର କାରିଗରି ଦେଖିବାରେ ଏହା ଜୟପୁରର ବୋଲି ଅନୁମାନ କରାଯାଉଛି । ଏ ଦିଗରେ ରାଜ୍ୟ ସରକାର ଗୁରୁତ୍ୱ ଦେବା ଜରୁରି ।
ସେହିପରି ଓଡ଼ିଶା ସ୍ୱର୍ଣ୍ଣ ରୌପ୍ୟ ସଂଘର ବରିଷ୍ଠ କାର୍ଯ୍ୟକର୍ତ୍ତା ଭାନୁପ୍ରତାପ ସାହୁଙ୍କୁ ପଚାରିବାରେ ସେ କହିଛନ୍ତି, ଉପହାର କଟକ ରୁପା ତାରକସି ବୋଲି ଜାତୀୟ ଗଣମାଧ୍ୟମ ତଥ୍ୟରୁ ଜଣାପଡୁଛି । ରୁପା ତାରକସି କାର୍ଯ୍ୟରେ ଏମିତି ପର୍ସ ତିଆରି ସମ୍ଭବ । ତେବେ ଉପହାର ପାଇଁ କେଉଁ ଉତ୍ପାଦକ ଗୋଷ୍ଠୀ କାର୍ଯ୍ୟ କରୁଛନ୍ତି ତାହା ଜଣାପଡ଼ିଲେ ତଥ୍ୟ ସ୍ପଷ୍ଟ ହେବ । ଜିଆଇ ବିଶେଷଜ୍ଞ ଡ. ଅନୀତା ସାବତ କିନ୍ତୁ ଏହାକୁ କଟକ ରୁପା ତାରକସିର ପର୍ସ ନୁହେଁ ବୋଲି ସ୍ପଷ୍ଟ ମନା କରିଛନ୍ତି ।
ସେ କହିଛନ୍ତି, କଟକ ରୁପା ତାରକସି ଜିଆଇ ମାନ୍ୟତା ପାଇସାରିଛି । ମୋଦିଜୀ ଏହାକୁ ଉପହାରରେ ଦେଉଛନ୍ତି, ଯାହା ଆମ ପାଇଁ ଗର୍ବ ଓ ଗୌରବର ବିଷୟ । କିନ୍ତୁ ଏହା ଯେ ପ୍ରକୃତରେ ରୁପା ତାରକସି ତାହା କେମିତି ଜଣାପଡ଼ିବ? କାରଣ ଏମିତି ବହୁତ ବିକ୍ରେତା ରହିଛନ୍ତି ଯେଉଁମାନେ ଅନ୍ୟ ରାଜ୍ୟରୁ ଆମଦାନୀ କରୁଥିବା ରୁପା ସାମଗ୍ରୀକୁ ତାରକସି କହି ବିକ୍ରି କରୁଛନ୍ତି । ଯଦି କେନ୍ଦ୍ର ସରକାର ସିଧାସଳଖ ଉତ୍ପାଦକ ଗୋଷ୍ଠୀଙ୍କ ଠାରୁ ପର୍ସ ଆମଦାନୀ କରନ୍ତି ତେବେ ଆମେ ଅସଲି ରୁପା ତାରକସି ବୋଲି ଏହାକୁ କହିପାରିବା ।
