ନୂଆଦିଲ୍ଲୀ, ୫।୭: ଆପଣ ଏନର୍ଜି ଡ୍ରିଙ୍କ୍ସ ପିଉଛନ୍ତି କି ? ଯଦି ପିଉଛନ୍ତି ତେବେ ଏହି ଖବର ଆପଣଙ୍କ ପାଇଁ । ଶରୀରକୁ ଆକ୍ଟିଭ୍ ରଖିବାକୁ ଆପଣ ଯେଉଁ ଏନର୍ଜି ଡ୍ରିଙ୍କ୍ସ, ପ୍ରୋଟିନ୍ ସେକ୍ ଏବଂ ସ୍ପୋର୍ଟସ୍ ଡ୍ରିଙ୍କ୍ସ ପିଉଛନ୍ତି, ଥରେ ସେହି କେନ୍‌ରେ ଲେଖାଥିବା ଇନଗ୍ରେଡିଏଣ୍ଟ୍ସ ଉପରେ ନଜର ପକାନ୍ତୁ । ଏଥିରେ ଥିବା ଇନଗ୍ରେଡିଏଣ୍ଟ ସ୍ଲୋ ପଏଜନ୍ ଭଳି କାମ କରେ । ଏହା ଶରୀରକୁ କେତେ ମାତ୍ରାରେ କ୍ଷତି ପହଞ୍ଚାଇପାରେ ଏହା ଜାଣିବା ପରେ ଆପଣ କଦାପି ଏନର୍ଜି ଡ୍ରିଙ୍କ୍ସ ପିଇବା ତ ଦୂରର କଥା ଏଥିପାଇଁ ଟଙ୍କାଟିଏ ବି ଖର୍ଚ୍ଚ କରିବେନି । 

ଆଜିକାଲିର ଯୁବପିଢ଼ି ବଜାରରେ ଉପଲବ୍ଧ ଏନର୍ଜି ଡ୍ରିଙ୍କ୍ସକୁ ଅଧିକ ଗୁରୁତ୍ୱ ଦେବା ଆରମ୍ଭ କରିଛନ୍ତି । ଘରେ ତିଆରି ଜୁସ୍ କିମ୍ବା ସରବତ୍ ପିଇବା ଅପେକ୍ଷା ବଜାରରୁ ମହଙ୍ଗା ମୂଲ୍ୟରେ ଏନର୍ଜି ଡ୍ରିଙ୍କ୍ସ କିଣିବାକୁ ପସନ୍ଦ କରନ୍ତି । ଯଦିଓ ଏହା ପିଇବା ଦ୍ୱାରା ଆପଣଙ୍କୁ ତୁରନ୍ତ ଶକ୍ତି ମିଳିବ ବୋଲି ଏହି କେନ୍‌ ଉପରେ ଲେଖାଯାଇଛି, କିନ୍ତୁ ଏହାକୁ ସ୍ୱାସ୍ଥ୍ୟ ପାଇଁ କ୍ଷତିକାରକ ବୋଲି ବିବେଚନା କରାଯାଏ । ଏହା ଶରୀରର ଓଜନ ବୃଦ୍ଧି କରିପାରେ । ଏପରିକି ଏହାକୁ ପିଇବା ଦ୍ୱାରା କିଛି ବିପଦପୂର୍ଣ୍ଣ ରୋଗ ମଧ୍ୟ ହୋଇପାରେ । ପାଟିକୁ ସୁଆଦିଆ ଲାଗୁଥିବା ଏହି ଏନର୍ଜି ଡ୍ରିଙ୍କ୍ସ ଶରୀର ପାଇଁ ଆଦୌ ହିତକର ନୁହେଁ । ସବୁଠୁ ବିପଦପୂର୍ଣ୍ଣ କଥା ହେଉଛି ଏହି ଏନର୍ଜି ଡ୍ରିଙ୍କ୍ସ ପିଇବା ଦ୍ୱାରା ରକ୍ତ କର୍କଟ ହେବାର ଆଶଙ୍କା ଅଧିକ ରହିଛି । ଏକଥା ଆମେ କହୁନୁ ଏନେଇ ନେଚର ଜର୍ଣ୍ଣାଲରେ ପ୍ରକାଶିତ ହୋଇଛି ଏକ ରିପୋର୍ଟ । କେତେକ ନିର୍ଦ୍ଦିଷ୍ଟ ଏନର୍ଜି ଡ୍ରିଙ୍କ୍ସରେ ପ୍ରଚୁର ମାତ୍ରାର କେଫିନ୍, କୃତ୍ରିମ ଚିନି ଏବଂ ଆମିନୋ ଏସିଡ୍ ଟରିନ୍ ଥାଏ । ତେବେ ଯେଉଁମାନଙ୍କର ଆଗରୁ ଶରୀରରେ ଲ୍ୟୁକେମିଆ ଥାଏ, ସେମାନେ ଏହି ଏନର୍ଜି ଡ୍ରିଙ୍କ୍ସ ନେବା ଦ୍ୱାରା ଏଥିରେ ମିଳୁଥିବା ଟରିନ୍ ଲ୍ୟୁକୋମିଆକୁ ବଢ଼ାଇ କର୍କଟ ଆଶଙ୍କାକୁ ବଢ଼ାଇଥାଏ । 

ଗବେଷକଙ୍କ ମୁତାବକ, ଲ୍ୟୁକେମିଆ କୋଷ ଗ୍ଲାଇକୋଲାଇସିସ୍ ନାମକ ପ୍ରକ୍ରିୟା ମାଧ୍ୟମରେ ନିଜର ବୃତ୍ତି ପ୍ରକ୍ରିୟାକୁ ଇନ୍ଧନ ଦେବା ପାଇଁ ଟରିନ୍‌ର ଉପଯୋଗ କରିଥାଏ । ଏହି ପ୍ରକ୍ରିୟାରେ କୋଷଗୁଡ଼ିକ ଶକ୍ତି ଉତ୍ପନ୍ନ କରିବାକୁ ଗ୍ଲୁକୋଜକୁ ଭାଙ୍ଗି କର୍କଟ କୋଷିକାକୁ ବୃଦ୍ଧି କରନ୍ତି । ଟରିନ୍ ମଣିଷ ଶରୀରରେ ପ୍ରାକୃତିକ ଉପାୟରେ ତିଆରି ହୋଇଥାଏ । ମାଂସ ଏବଂ ମାଛରେ ମଧ୍ୟ ଟରିନ୍ ମିଳିଥାଏ । କିଛି ନିର୍ଦ୍ଦିଷ୍ଟ ଏନର୍ଜି ଡ୍ରିଙ୍କ୍ସରେ ଟରିନ୍ ମିଶାଯାଉଥିବାରୁ ଶରୀରରେ ଟରିନ୍ ଲ୍ୟୁକେମିଆକୁ କିପରି ବଢ଼ାଇବାରେ ସାହାଯ୍ୟ କରୁଛି ତାହା ଜାଣିବାକୁ ଗବେଷକମାନେ ଏକ ସ୍ୱତନ୍ତ୍ର ଜିନ୍ SLC6A6 ସହିତ ମୂଷା ଉପରେ ଗବେଷଣା କରିଥିଲେ । ସେହି ମୂଷାଙ୍କୁ ମଣିଷ ଲ୍ୟୁକେମିଆ କୋଷ ଦିଆଯାଇଥିଲା । ଏହି ଗବେଷଣାରୁ ମୂଷାଙ୍କ ଶରୀରର ଅସ୍ଥିମଜ୍ଜାର ସୁସ୍ଥ କୋଷଗୁଡ଼ିକ ଟରିନ୍ ଉତ୍ପାଦନ କରି ଏହାକୁ SLC6A6 ଜିନ୍ କର୍କଟ କୋଷ ଯାଏଁ ପହଞ୍ଚାଉଥିବା ଦେଖିବାକୁ ମିଳିଥିଲା । ଏହାଦ୍ୱାରା ରକ୍ତ କର୍କଟ ହେବାର ଆଶଙ୍କା ବଢ଼ିଯାଏ ।