କୋଲକାତା,୦୩/୦୨: ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ନିର୍ବାଚନରେ କଂଗ୍ରେସର ବିଜୟ କ୍ଷମତା ଉପରେ ପ୍ରଶ୍ନ ଉଠାଇଛନ୍ତି । ଆଗାମୀ ଲୋକସଭା ନିର୍ବାଚନରେ କଂଗ୍ରେସକୁ ରାଜ୍ୟରେ ୨ଟି ଲୋକସଭା ଆସନ ଛାଡ଼ିଥିବା ମମତା କହିଛନ୍ତି, ସାଧାରଣ ନିର୍ବାଚନରେ କଂଗ୍ରେସ ଯଦି ୩୦୦ ଆସନରେ ବି ଲଢ଼େ ତେବେ ୪୦ ଆସନ ଜିତିବା ମଧ୍ୟ କଷ୍ଟକର ହୋଇଯିବ । ବୁଝାପଡ଼ୁନି କଂଗ୍ରେସର ଏତେ ଗର୍ବ କାହିଁକି । ଯଦି କଂଗ୍ରେସର ଦମ୍ ଅଛି ତେବେ ଉତ୍ତରପ୍ରଦେଶ, ରାଜସ୍ଥାନ ଏବଂ ମଧ୍ୟପ୍ରଦେଶରେ ବିଜେପିକୁ ହରାଇ ଦେଖାଉ।ବାରାଣସୀରେ ବିଜେପିକୁ ପରାଜିତ କରି କଂଗ୍ରେସ ନିଜ ପାରିବାପଣିଆ ପ୍ରମାଣିତ କରୁ ବୋଲି ମମତା ଏହି ସର୍ବପୁରାତନ ଦଳକୁ ଚ୍ୟାଲେଞ୍ଜ କରିଛନ୍ତି ।
ମୁର୍ଶିଦାବାଦରେ ଏକ ଜନସଭାକୁ ସମ୍ବୋଧିତ କରି ମମତା କହିଛନ୍ତି, ଭାରତ ଯୋଡ଼ୋ ଯାତ୍ରା ସେମାନେ ତାଙ୍କ ରାଜ୍ୟକୁ କାର୍ଯ୍ୟକ୍ରମରେ ଆସିଲେ । କିନ୍ତୁ ଇଣ୍ଡିଆ ମେଣ୍ଟ ସଦସ୍ୟ ହିସାବରେ ବି ଏ ନେଇ ତାଙ୍କୁ ଜଣାଗଲାନାହିଁ । ପ୍ରଶାସନିକ ସୂତ୍ରରୁ ଏ ବାବଦରେ ଜାଣିବାକୁ ପାଇଥିଲି । ସେହିପରି ମଣିପୁର ଜଳୁଥିବାବେଳେ କଂଗ୍ରେସ କେଉଁଠି ଥିଲା । ମହିଳାଙ୍କୁ ଉଲଗ୍ନ ପରେଡ୍ କରାଗଲା । ୨ ଶହ ଚର୍ଚ୍ଚ ଜାଳିଦିଆଗଲା । ପଶ୍ଚିମବଙ୍ଗ ସରକାର ସେଠାକୁ ଟିମ୍ ପଠାଇଥିଲେ । କିନ୍ତୁ ଏବେ ସେମାନେ ସେଠାକୁ ଯାଇ ଟି’ ଷ୍ଟଲରେ ଫଟୋ ଉଠାଉଛନ୍ତି ବୋଲି ମମତା କଂଗ୍ରେସକୁ ଜୋରଦାର ଟାର୍ଗେଟ କରିଛନ୍ତି ।
ଟିଏମ୍ସି ସୁପ୍ରିମୋ କହିଛନ୍ତି, ଆଗରୁ କଂଗ୍ରେସ ଯେଉଁ ସ୍ଥାନରୁ ଜିତୁଥିଲା ଏବେ ସେଠାରୁ ବି ହାରୁଛି । ରାହୁଲଙ୍କ ନାଁ ନ ନେଇ ସେ କହିଥିଲେ, ଆଜିକାଲି ଫଟୋଶୁଟ୍ର ନୂଆ ପରମ୍ପରା ଦେଖିବାକୁ ମିଳୁଛି । ଯିଏ କେବେ ଦିନେ ଚା’ ଷ୍ଟଲକୁ ଯାଇ ନ ଥିଲେ ସେ ଏବେ ବିଡ଼ି ଶ୍ରମିକଙ୍କ ସହ ବସି ଫଟୋ ଉଠାଉଛନ୍ତି ।
ପ୍ରକାଶଥାଉ କି, କଂଗ୍ରେସ ପଶ୍ଚିମବଙ୍ଗରେ ୧୦ରୁ ୧୨ ଲୋକସଭା ଆସନ ମାଗିଥିଲା । ଟିଏମ୍ସିକୁ କଂଗ୍ରେସ କେବଳ ୨ଟି ସିଟ୍ ଛାଡ଼ିଥିଲା । ଏଥିରେ ମମତା ଅସନ୍ତୁଷ୍ଟ ହୋଇ ଟିଏମ୍ସି ଏକାକୀ ନିର୍ବାଚନ ଲଢ଼ିବ ବୋଲି ଗତ ୨୪ ତାରିଖରେ ଘୋଷଣା କରିଥିଲେ । ଏବେ ଟିଏମ୍ସି କଂଗ୍ରେସକୁ କେବଳ ୨ଟି ସିଟ୍ ଦେଇପାରିବ ବୋଲି କହିଛି।
