ଭୁବନେଶ୍ୱର/ସମ୍ବଲପୁର ୦୮/୦୮: ଗାଙ୍ଗେୟ ପଶ୍ଚିମବଙ୍ଗ ଓ ସଂଲଗ୍ନ ବାଂଲାଦେଶରେ ସୃଷ୍ଟି ଘୂର୍ଣ୍ଣିବଳୟ ପ୍ରଭାବରେ ରାଜ୍ୟର ବିଭିନ୍ନ ସ୍ଥାନରେ ନିର୍ଧୁମ ବର୍ଷିଛି । ପ୍ରବଳ ବର୍ଷାରେ ରାଜ୍ୟର ବିଭିନ୍ନ ସ୍ଥାନ ଉବୁଟୁବୁ ହୋଇଛି । କେଉଁଠି ମନ୍ଦିର ଭିତରେ ପାଣି ପଶିଯାଇଛି ତ ଆଉ କେଉଁଠି ରାସ୍ତା ଉପରେ ପାଣି ଚାଲିବା ଯୋଗୁ ଯୋଗାଯୋଗ ବିଚ୍ଛିନ୍ନ ହୋଇଯାଇଛି । ଆସନ୍ତା ୨୪ ଘଣ୍ଟାରେ ଏହା ଲଘୁଚାପ ରୂପ ନେଇପାରେ । ଏହା ପ୍ରଭାବରେ ପଶ୍ଚିମ ଓଡ଼ିଶା ସମେତ କିଛି ସ୍ଥାନରେ ପ୍ରବଳ ବର୍ଷା ହୋଇପାରେ ବୋଲି ପାଣିପାଗ ବିଭାଗ ପୂର୍ବାନୁମାନ କରିଛି । ସବୁ ଜିଲ୍ଲାପାଳ ସତର୍କ ରହିବାକୁ ଏସଆରସି ନିର୍ଦ୍ଦେଶ ଦେଇଛନ୍ତି ।
ପାଣିପାଗ ବିଭାଗର ଆକଳନ ଅନୁସାରେ, ସୃଷ୍ଟି ହୋଇଥିବା ଘୂର୍ଣ୍ଣିବଳୟ ଆସନ୍ତା ୨୪ ଘଣ୍ଟାରେ ଲଘୁଚାପରେ ପରିଣତ ହେବ । ଝାଡ଼ଖଣ୍ଡ ଓ ଏହାର ସଂଲଗ୍ନ ଅଞ୍ଚଳରେ ଏହି ଲଘୁଚାପ କେନ୍ଦ୍ରୀଭୂତ ହେବ । ଏହା ପ୍ରଭାବରେ ସୁନ୍ଦରଗଡ଼, ଝାରସୁଗୁଡ଼ା, ସମ୍ବଲପୁର, ମୟୂରଭଞ୍ଜ, କେନ୍ଦୁଝର ଓ ଦେବଗଡ଼ରେ ଭାରୀ ବର୍ଷା ହୋଇପାରେ । ଆଉ କିଛି ଅଞ୍ଚଳରେ ସ୍ୱଳ୍ପରୁ ମଧ୍ୟମ ଧରଣର ବର୍ଷା ସମ୍ଭାବନା ଅଛି ।
ଗତ ୨୪ ଘଣ୍ଟାରେ ରାଜ୍ୟର ବିଭିନ୍ନ ସ୍ଥାନରେ ପ୍ରବଳରୁ ଅତିପ୍ରବଳ ବର୍ଷା ହୋଇଛି । କଟକର ବାଙ୍କୀରେ ଅତି ଭୀଷଣ ବର୍ଷା ହୋଇଛି ।ଏଠାରେ ୩୧୭ମିମି ବର୍ଷା ରେକର୍ଡ ହୋଇଛି । ନୟାଗଡ଼ ଭାପୁରରେ ୨୧୦ମିମି ବର୍ଷିଛି । ଖୋର୍ଦ୍ଧା ବେଗୁନିଆରେ ୧୯୬ମିମି, ସୋନପୁର ବୀରମହାରାଜପୁରରେ ୧୪୭, ଢେଙ୍କାନାଳ ହିନ୍ଦୋଳରେ ୧୪୪, ନବରଙ୍ଗପୁର ଡାବୁଗାଁରେ ୧୪୨, ବଲାଙ୍ଗୀର ଓ ବରଗଡ଼ରେ ୧୩୫ମିମି, ନୟାଗଡ଼ ରଣପୁରରେ ୧୩୨.୪ମିମି ବର୍ଷା ରେକର୍ଡ ହୋଇଛି । ବରଗଡ଼ ଅତାବିରାରେ ୧୩୨, କନ୍ଧମାଳ ଖଜୁରୀପଡ଼ାରେ ୧୩୦, ବରଗଡ଼ ଭଟ୍ଲିରେ ୧୩୦, ଖୋର୍ଦ୍ଧା ବୋଲଗଡ଼ରେ ୧୩୦, କଳହାଣ୍ଡି ଧର୍ମଗଡ଼ରେ ୧୨୯.୬ କୋରାପୁଟ କୋଟପାଡ଼ରେ ୧୨୮, କଳାହାଣ୍ଡି କେସିଙ୍ଗାରେ ୧୨୭, ସୋନପୁର ବିନିକାରେ ୧୨୫, କଳାହାଣ୍ଡି ନର୍ଲାରେ ୧୨୩ମିମି ବର୍ଷା ହୋଇଛି । ବୁଧବାର ସକାଳରୁ ସନ୍ଧ୍ୟା ଭିତରେ ବଲାଙ୍ଗୀରରେ ୯୨ମିମି, ପାରଳାଖେମୁଣ୍ଡିରେ ୬୧, ଅନୁଗୁଳରେ ୬୦ମିମି, ବୌଦ୍ଧ ଓ ନବରଙ୍ଗପୁରରେ ୫୭, କେନ୍ଦୁଝରରେ ୩୭, ରାଉରକେଲାରେ ୩୬ ଓ ଜଗତ୍ସିଂହପୁରରେ ୩୨ମିମି ବର୍ଷା ହୋଇଛି ।
ପ୍ରବଳ ବର୍ଷା ଯୋଗୁ କଟକର ଆଠଗଡ଼ ଓ ବାଙ୍କୀର ବିଭିନ୍ନ ସ୍ଥାନରେ ରାସ୍ତାରେ ପାଣି ଚାଲିଛି । ଅନେକ ଚାଷ ଜମିରେ ପାଣିରେ ବୁଡ଼ି ରହିଛି। ରାସରସିକପୁର ପାଖରେ ଆଠଗଡ଼-ସମ୍ବଲପୁର ରାସ୍ତା ବୁଡ଼ି ଯାଇଛି । ଆଠଗଡ଼-ସୁବର୍ଣ୍ଣପୁର ରାସ୍ତାର ଅଶୋକନଗର ପାଖରେ ଆଣ୍ଠୁଏ ଉଚ୍ଚାର ପାଣି ଜମିବା ଯୋଗୁ ଯାତାୟତ ପ୍ରଭାବିତ ହୋଇଛି । ଆଠଗଡ଼ ସହରରେ ଥିବା ଜଗନ୍ନାଥ ମନ୍ଦିର ଭିତରେ ୩ ଫୁଟର ଜମି ଯାଇଥିଲା । ଗତ ୨୪ ଘଣ୍ଟା ମଧ୍ୟରେ ହୀରାକୁଦର ତଳ ମୁଣ୍ଡରେ ପ୍ରବଳ ବର୍ଷିଛି । ତଳମୁଣ୍ଡରେ ସର୍ବାଧିକ ୮୧.୪୩ ମିମି ବର୍ଷା ହୋଇଛି । ଉପର ମୁଣ୍ଡରେ ୪୬.୯୭ ମିମି ବର୍ଷା ହୋଇଛି । ତଳମୁଣ୍ଡର ଅଧିକ ବର୍ଷା ହୋଇଥିବାରୁ ଏହା ହୀରାକୁଦ ଜଳ ପରିଚାଳନା ପାଇଁ ଅଙ୍କ ବିଗାଡିପାରେ । ତଳମୁଣ୍ଡର ଜିରା ନଦୀ ସମେତ ତେଲ ଏବଂ ହାତୀ ନଦୀ ଫୁଲିଛି । ଏହି ପାଣି ଆସନ୍ତାକାଲି ସୁଦ୍ଧା ମହାନଦୀକୁ ଫୁଲାଇବାର ଆଶଙ୍କା ସୃଷ୍ଟି ହୋଇଛି ।
ବୁଧବାର ରାତି ୯ଟା ସୁଦ୍ଧା ମୁଣ୍ଡୁଳିରେ ୪ ଲକ୍ଷ ୬୩ ହଜାର କ୍ୟୁସେକ୍ ପାଣି ପ୍ରବାହିତ ହେଉଥିଲା । ଗୁରୁବାର ସୁଦ୍ଧା ଏହା ସାଢ଼େ୬ ଲକ୍ଷ ଛୁଇଁବା ଆକଳନ କରାଯାଉଛି । ଶୁକ୍ରବାର ସୁଦ୍ଧା ଏହା ୭ ଲକ୍ଷ ଯାଏ ଛୁଇଁପାରେ । ତେଲ ଏବଂ ହାତୀ ନଦୀରୁ ୩ ଲକ୍ଷ କ୍ୟୁସେକ୍ରୁ ଅଧିକ ପାଣି ଆସିବାର ସମ୍ଭାବନା ଥିବାରୁ ତଳମୁଣ୍ଡରେ ମହାନଦୀ ଫୁଲିପାରେ । ହୀରାକୁଦରୁ ୧୪ଟି ଗେଟ୍ ଦେଇ ଜଳ ନିଷ୍କାସନ ଚାଲିଥିଲା । ତଳମୁଣ୍ଡର ସମ୍ଭାବ୍ୟ ବନ୍ୟା ସ୍ଥିତିକୁ ଦେଖି କର୍ତ୍ତୃପକ୍ଷ ଆଜି ୬ଟି ଗେଟ୍ ବନ୍ଦ କରିଛନ୍ତି । ରାତି ୯ଟା ସୁଦ୍ଧା ହୀରାକୁଦକୁ ୧ ଲକ୍ଷ ୯୦ ହଜାର କ୍ୟୁସେକରୁ ଅଧିକ ପାଣି ପଶୁଛି । ଶୁକ୍ରବାର ଏହାର ପରିମାଣ ୨ ଲକ୍ଷ ୭୦ ହଜାର ଏବଂ ଶୁକ୍ରବାର ସୁଦ୍ଧା ୩ ଲକ୍ଷ କ୍ୟୁସେକ୍ ଟପିପାରେ । ତଥାପି ହୀରାକୁଦରୁ ଅଧିକ ଗେଟ୍ ଖୋଲାଯିବ ନାହିଁ ବୋଲି ମୁଖ୍ୟଯନ୍ତ୍ରୀ ସୁଶୀଳ କୁମାର ବେହେରା କହିଛନ୍ତି । ତଳମୁଣ୍ଡରେ ବନ୍ୟା ଆଶଙ୍କା ନାହିଁ । ଯଦି ତେଲ ଓ ହାତୀ ନଦୀରୁ ଅଧିକ ପାଣି ଆସେ ତା ହେଲେ ମୁଣ୍ଡୁଳିରେ ଛୋଟ ଧରଣର ବନ୍ୟା ସ୍ଥିତି ଉପୁଜିପାରେ ବୋଲି ସେ କହିଛନ୍ତି ।
ରାତି ୯ଟା ସୁଦ୍ଧା ହୀରାକୁଦର ଜଳସ୍ତର ୬୦୯.୯୧ ଫୁଟ୍ ରହିଛି । ଜଳଭଣ୍ଡାରକୁ ୧ ଲକ୍ଷ ୯୦ ହଜାର ୫୩୭ କ୍ୟୁସେକ୍ ପାଣି ପ୍ରବେଶ କରୁଛି । ୮ଟି ଗେଟ୍ ସମେତ ବିଭିନ୍ନ କେନାଲ ଏବଂ ପାୱାର୍ ଚ୍ୟାନେଲ ମିଶି ମୋଟ୍ ଜଳଭଣ୍ଡାରରୁ ୧ ଲକ୍ଷ ୫୬ ହଜାର ୫୧୧ କ୍ୟୁସେକ୍ ନିଷ୍କାସିତ ହେଉଛି । ପ୍ରବଳ ବର୍ଷାରେ ନୟାଗଡ଼ ଜିଲ୍ଲାର ଭାପୁର-କାଳୀଗିରି ରାସ୍ତାରେ ପାଣି ଚାଲିଥିଲା । ଭାପୁର-କଳାପଥର ବାଇପାସ୍ ରାସ୍ତାରେ ଯାତାୟତ ପ୍ରଭାବିତ ହୋଇଛି । ଭାପୁର ବ୍ଲକ୍ ବାହାଡ଼ା-ବାଘୁଆପଲ୍ଲୀ ରାସ୍ତାରେ ବି ପାଣି ଜମିଥିଲା । ଖୋର୍ଦ୍ଧା ଜିଲ୍ଲା ବାଘମାରୀ ବଜାର ଓ ସିମୋର ବଜାରରେ ପାଣିର ସୁଅ ଚାଲିଥିଲା ।
ବରଗଡ଼ କଲେକ୍ଟର ଅଫିସ୍, ଭେଟେନାରୀ ଅଫିସ, ବସ୍ଷ୍ଟାଣ୍ଡ ଓ ଏୟାରଟେଲ ଅଫିସରେ ପାଣି ପଶି ଯାଇଥିଲା । ପୌର ସଂସ୍ଥା ଓ ଅଗ୍ନିଶମ ବାହିନୀ ପାଣି ନିଷ୍କାସନ କରିଥିଲେ । ବରଗଡ଼ ଚିକିଲି ଉପରମୁଣ୍ଡ ଯାଏ ବନ୍ୟା ପାଣି ପହଞ୍ଚି ଯାଇଛି । ଅଙ୍ଗ ନଦୀ, ଦନ୍ତା ନଦୀ ଓ ଜିରା ନଦୀରେ ବନ୍ୟା ପାଣି ପ୍ରବେଶ କରିଛି । ଉପର ମୁଣ୍ଡରେ ୪୬.୯୭ ମିମି ବର୍ଷା ହୋଇଥିବାରୁ ହୀରାକୁଦକୁ ଜଳପ୍ରବେଶ ମାତ୍ରା ପ୍ରାୟ ୩ ଲକ୍ଷ କ୍ୟୁସେକ୍ ଯାଏ ବଢ଼ିପାରେ । ହୀରାକୁଦରୁ ନିର୍ଗତ ପାଣି ତଳମୁଣ୍ଡର ସ୍ଥିତି ବିଗାଡ଼ିବାର ଆଶଙ୍କା ରହିଛି । ଏଥିପାଇଁ ହୀରାକୁଦର ୧୪ଟି ଗେଟ୍ରୁ୬ଟି ଗେଟ୍ ବନ୍ଦ କରାଯାଇଛି । ସୋନପୁର ବୀରମହାରାଜପୁର-ଆମ୍ରପଲ୍ଲୀ ରାସ୍ତାର ଘୁଙ୍ଗି ନାଳ ଉପରେ ମୁଣ୍ଡ ଉପରେ ବନ୍ୟା ପାଣି ପ୍ରବାହିତ ହେଉଥିଲା । ସମ୍ବଲପୁର ଓ ରେଢାଖୋଲ ଭିତରେ ଯୋଗାଯୋଗ ପ୍ରଭାବିତ ହୋଇଛି । ବଲାଙ୍ଗୀରର ଆଗଲପୁର ବ୍ଲକ୍ ସାଲେଭଟା ଲଚ୍ଛିପୁର ରାସ୍ତାର ହରଭଙ୍ଗା ଓ ଡୁଙ୍ଗୁରପାଲ୍ଲୀ ମଝିରେ ଥିବା କୋଠି ଯୋର ପୋଲ ଉପରେ ପାଣି ଚାଲିଥିଲା । ବଲାଙ୍ଗୀର କଣ୍ଟାବାଞ୍ଜି ରେଳଷ୍ଟେସନ ଜିଆରପି ପୋଷ୍ଟ ଭିତରେ ପାଣି ଜମିଥିଲା ।
