ନୂଆଦିଲ୍ଲୀ,୦୮/୦୯: କ୍ଷମା ଆବେଦନ ଖାରଜ ପରେ  ଫାଶୀଦଣ୍ଡକୁ କାର୍ଯ୍ୟକାରୀ କରିବାରେ ହେଉଥିବା ବିଳମ୍ବକୁ ରୋକିବା ଲାଗି ସୁପ୍ରିମକୋର୍ଟ ନୀତି ପ୍ରସ୍ତୁତ କରିବେ । ଯାହାକୁ  ବିଭିନ୍ନ ରାଜ୍ୟ ସରକାର ଓ କୋର୍ଟ କାର୍ଯ୍ୟକାରୀ  କରିବେ । ଗୁରୁବାର ଏକ ମାମଲାର ଶୁଣାଣି ବେଳେ ସୁପ୍ରିମକୋର୍ଟ ପଚାରିଥିଲେ କି କ୍ଷମା  ଆବେଦନ ବିଚାରାଧୀନ ରହିଛି କି ନାହିଁ ତାହା  ନ ଜାଣି ଯଦି ସେସନ୍ସ କୋର୍ଟ ୱରେଣ୍ଟ ଜାରି କରନ୍ତି, ସେଭଳି କ୍ଷେତ୍ରରେ କେଉଁ ପ୍ରକ୍ରିୟା  ଗ୍ରହଣ କରାଯିବ । ମୃତ୍ୟୁଦଣ୍ଡକୁ ସୁପ୍ରିମକୋର୍ଟ  ଅନୁମୋଦନ କରିବା ପରେ ରାଜ୍ୟ ସରକାର ତାକୁ କାର୍ଯ୍ୟକାରୀ କରିବା ଲାଗି ସେସନ୍ସ କୋର୍ଟ  ସହ ସମ୍ପର୍କ କରିବା ଆବଶ୍ୟକ । ଏହା ପରେ  ଦୋଷୀଙ୍କୁ ସୂଚୀତ କରାଯିବ । ଆଇନଗତ ପ୍ରତିନିଧିତ୍ୱ ଅଧିକାର  ସମ୍ପର୍କରେ ଅବଗତ କରାଯିବ । କୌଣସି କ୍ଷମା ଆବେଦନ  ଅଛି କି ନାହିଁ ତାହା ସ୍ପଷ୍ଟ କରିବା ଲାଗି ସୁଯୋଗ ଦିଆଯିବ। 

ବିଚାରପତି ଅଭୟ ଏସ୍‌. ଓକା, ଅହସାନୁଦ୍ଦିନ ଅମାନୁଲ୍ଲା  ଓ ଅଗଷ୍ଟିନ ଜର୍ଜ ମସିଙ୍କୁ ନେଇ ଗଠିତ ଖଣ୍ଡପୀଠ ମହାରାଷ୍ଟ୍ର  ସରକାରଙ୍କ ପକ୍ଷରୁ ବମ୍ବେ ହାଇକୋର୍ଟଙ୍କ ରାୟକୁ ଚାଲେଞ୍ଜ  କରି ଆଗତ ପିଟିସନ ଉପରେ ଶୁଣାଣି କରିବା ଅବସରରେ  ଏହା କହିଛନ୍ତି । ୨୦୦୭ ପୁନେ ବିପିଓ ଗଣବଳାତ୍କାର ଓ  ହତ୍ୟା ମାମଲାରେ ବମ୍ବେ ହାଇକୋର୍ଟ ୨୦୧୯ରେ ଦୁଇ  ଦୋଷୀ ପୁରୁଷୋତ୍ତମ ବୋରାଟେ ଓ ପ୍ରଦୀପ କୋକାଡେଙ୍କ  ମୃତ୍ୟୁଦଣ୍ଡକୁ କୋହଳ କରିଥିଲେ । ଯାହାକୁ  ରାଜ୍ୟ ସରକାର ସୁପ୍ରିମକୋର୍ଟରେ ଚାଲେଞ୍ଜ  କରିଥିଲେ । ୨୦୧୭ ମେ ୨୬ରେ ରାଷ୍ଟ୍ରପତି  ଉଭୟ ଦୋଷୀଙ୍କ କ୍ଷମା ଆବେଦନକୁ  ଖାରଜ କରିଥିଲେ । ପୁନେସ୍ଥିତ ଏକ  ବିପିଓରେ କାର୍ଯ୍ୟ କରୁଥିବା ଜଣେ ୨୨ ବର୍ଷୀୟ ମହିଳାଙ୍କୁ ଉଭୟ ପୁରୁଷୋତ୍ତମ ଓ  ପ୍ରଦୀପ ବଳାତ୍କାର ପରେ ହତ୍ୟା କରିଥିଲେ ।  ତଳକୋର୍ଟ ଉଭୟଙ୍କୁ ମୃତ୍ୟୁ ଦଣ୍ଡରେ ଦଣ୍ଡିତ କରିଥିଲେ । 

୨୦୧୫ରେ ସୁପ୍ରିମକୋର୍ଟ  ଏହାକୁ ଅନୁମୋଦନ କରିଥିଲେ । କିନ୍ତୁ ଉଭୟେ ରାଜ୍ୟପାଳଙ୍କ  ନିକଟରେ କ୍ଷମା ଆବେଦନ କରିଥିଲେ । ଯାହା ୨୦୧୬ରେ ଖାରଜ  ହୋଇଥିଲା । ସେମାନଙ୍କ ମୃତ୍ୟୁଦଣ୍ଡକୁ କାର୍ଯ୍ୟକାରୀ କରିବାରେ  ଅହେତୁକ ବିଳମ୍ବ ହୋଇଥିବା ଦର୍ଶାଇ ବମ୍ବେ ହାଇକୋର୍ଟ  ଉଭୟଙ୍କ ମୃତ୍ୟୁଦଣ୍ଡକୁ କୋହଳ କରି ଆଜୀବନ ଜେଲ୍‌ଦଣ୍ଡ  କରିଥିଲେ । ଉଭୟଙ୍କୁ ୩୫ ବର୍ଷ ଜେଲ୍‌ରେ କାଟିବାକୁ ପଡ଼ିବ  ବୋଲି ହାଇକୋର୍ଟ ସ୍ପଷ୍ଟ କରିଥିଲେ