ଭୁବନେଶ୍ୱର,୧୮/୧୧ ରାଜଧାନୀ ଭୁବନେଶ୍ୱରରେ କିଛି ଘରୋଇ ଗୁଇନ୍ଦା (ପ୍ରାଇଭେଟ୍ ଡିଟେକ୍ଟିଭ୍) ସଂସ୍ଥା ଖୋଲିଲାଣି । ଲୁଚାଛପାରେ ଲୋକଙ୍କ ଚରିତ୍ର, କାରବାର, ଚାଲିଚଳନ, ଠିକଣା ଆଦି ଠଉରାଇ କାମ ଦେଇଥିବା ଲୋକଙ୍କୁ ତଥ୍ୟ ଦେଉଛନ୍ତି । ତା’ ବଦଳରେ ସମୁଚିତ ଫି’ ନେଉଛନ୍ତି । ବିଶେଷକରି ସ୍ୱାମୀ-ସ୍ତ୍ରୀ’ଙ୍କ ପରକୀୟା ପ୍ରୀତିର ତଥ୍ୟ ପ୍ରମାଣ ଯୋଗାଡିବାରେ ଘରୋଇ ଗୁଇନ୍ଦାମାନଙ୍କୁ ଲୋଡ଼ାଯାଉଛି ।
ଏହି ପ୍ରସଙ୍ଗରେ ଭୁବନେଶ୍ୱର ବାର୍ର ବରିଷ୍ଠ ଆଇନଜୀବୀ ସିଦ୍ଧାର୍ଥ ଦାସ କହିଛନ୍ତି, ଘରୋଇ ଗୁଇନ୍ଦାଗିରି ସଂସ୍ଥା ଖୋଲିବା ପାଇଁ ଭାରତରେ ଏଯାବତ୍ କୌଣସି ପ୍ରକାର ସରକାରୀ ଅନୁମତି ମିଳିନି । ୨୦୦୭ରେ ଘରୋଇ ଗୁଇନ୍ଦା ସଂସ୍ଥା (ପରିଚାଳନା) ବିଲ୍ ଲୋକସଭାରେ ଆଗତ ହୋଇଥିଲା । ତା’ପରଠୁ ବିଲ୍ ଆଗେଇନି କି ଆଇନ୍ ପାରିତ ହୋଇନି । ତଥାପି ବିଭିନ୍ନ ରାଜ୍ୟ ସହରରେ ଘରୋଇ ସୁରକ୍ଷା ସଂସ୍ଥା ଆଢ଼ୁଆଳରେ ଅନେକ ଗୁଇନ୍ଦା ସଂସ୍ଥା ଖୋଲିଛି ।
ଅନୁରୂପ ଭାବେ ଜଣେ ବରିଷ୍ଠ ପୁଲିସ ଅଧିକାରୀ କହିଛନ୍ତି, ଗୁଇନ୍ଦାଗିରି ନାଁରେ ଅନ୍ୟର ବ୍ୟକ୍ତିଗତ ଜୀବନରେ ଦଖଲ ଦେବା, ଫଟୋ ଉଠାଇବା କିମ୍ବା ପିଛା କରି ବେଆଇନ । ଯଦି ସଂପୃକ୍ତ ବ୍ୟକ୍ତି ଅଭିଯୋଗ କରନ୍ତି ତେବେ କାର୍ଯ୍ୟାନୁଷ୍ଠାନ ନିଆଯିବ । ଓଡିଶାରେ ଏଭଳି ସଂସ୍ଥାର ସଂଖ୍ୟା ପ୍ରାୟ ୮-୧୦ ଟପିଯିବ । ପ୍ରାୟ ସବୁ ସଂସ୍ଥାର କାର୍ଯ୍ୟାଳୟ ରାଜଧାନୀରେ । ଏମାନଙ୍କ ମଧ୍ୟରୁ ଅଧିକାଂଶ ଘରୋଇ ସୁରକ୍ଷା ସଂସ୍ଥା (ପରିଚାଳନା) ଆଇନ୍ ୨୦୦୫ ଜରିଆରେ ଲାଇସେନ୍ସ ହାତେଇଛନ୍ତି ।
ଏଭଳି ଏକ ଗୁଇନ୍ଦା ସଂସ୍ଥା ପରିଚାଳକ ମହେଶ ବାରିକଙ୍କ କହିବା ମୁତାବକ, ଅନ୍ଲାଇନ୍ରେ ବିଜ୍ଞାପନ ଦେଖି ଲୋକେ ସହୟତା ଆଶାରେ ଆମକୁ ପାଖକୁ ଆସୁଛନ୍ତି । ପ୍ରାୟ ଅଧାରୁ ଅଧିକ ଗ୍ରାହକଙ୍କ ଉଦ୍ଦେଶ୍ୟ ଥାଏ ନିଜ ଲୋକଙ୍କ ଗତିବିଧି ଉପରେ ନଜର ରଖିବା । ଯେମିତିକି, ବିବାହ ପୂର୍ବରୁ ନିଜ ପାଇଁ ବାଛିଥିବା ଜୀବନସାଥୀର ଚରିତ୍ର, ଚାକିରି, ଚାଲିଚଳନ ଆଦି ଜାଣିବାକୁ ପ୍ରାୟ ସଭିଏଁ ଆଗଭର । କିଛି ମଧ୍ୟସ୍ଥିମାନଙ୍କଠୁ ଚାଲିଚଳନ ବୁଝି ନିଅନ୍ତି । କିଛି ସୋସିଆଲ ମିଡିଆରୁ କିମ୍ବା ବନ୍ଧୁ ଓ ସହକର୍ମୀଙ୍କଠାରୁ ପୁଅ-ଝିଅର ଇତିହାସ ଖୋଜନ୍ତି ।
ହେଲେ, ଏମିତି ବି ଅନେକ ଲୋକ ଅଛନ୍ତି ଯେଉଁମାନେ ଜୀବନସାଥୀ ପାଇଁ ଖୋଜିଥିବା ପ୍ରାର୍ଥୀର ପୂରା କୁଣ୍ଡଳି ବାହାର କରିବାକୁ ଆମ ପାଖକୁ ଆସୁଛନ୍ତି । ଅନେକ ପୁଅ-ଝିଅଙ୍କ ପ୍ରେମ ସମ୍ପର୍କ ସହ ଅନ୍ୟ ବଦଭ୍ୟାସ ବି ଆମେ ଖୋଜି ବାହାର କରିଛୁ । ପ୍ରାୟ ୫୦ ପ୍ରତିଶତରୁ ଅଧିକ ଘଟଣାରେ ସ୍ୱାମୀ-ସ୍ତ୍ରୀଙ୍କ ପରକୀୟା ପ୍ରୀତିର କାହାଣୀ ଖୋଜୁ । ବର୍ତ୍ତମାନ ଅନେକ ପାଶ୍ଚାତ୍ୟ ସଭ୍ୟତାକୁ ଆଦରି ନେଉଥିବାରୁ କିଛି ବୈବାହିକ ଜୀବନରେ ଝଡ଼ ସୃଷ୍ଟି ହେଉଛି । ବ୍ୟସ୍ତବହୁଳ ଜୀବନଶୈଳୀ ଯୋଗୁ ଅନେକଙ୍କ ଜୀବନସାଥୀର ଘର ବାହାର ପ୍ରେମକାହାଣୀ ଖୋଜିବାରେ ଆମେ ଲୋଡା ପଡୁ । ଏମିତିକି ପରସ୍ପରଙ୍କ ଚରିତ୍ର ଉପରେ ସନ୍ଦେହ କରି ପତିପତ୍ନୀ ଆମକୁ ସହୟତା ମାଗନ୍ତି ବୋଲି ଶ୍ରୀ ବାରିକ କହିଛନ୍ତି ।
ବଜାରରେ ନକଲି ବ୍ରାଣ୍ଡେଡ୍ ଖାଦ୍ୟ, ପାନୀୟ ଓ ଅନ୍ୟାନ୍ୟ ଉତ୍ପାଦ ମିଳୁଛି । ନାମୀ କମ୍ପାନୀ ବ୍ରାଣ୍ଡ୍ରେ ନକଲି ଜିନିଷ ବଜାରକୁ ଛାଡ଼ୁଛନ୍ତି । ଏସବୁ ନକଲି ଉତ୍ପାଦର ଚେର ଖୋଜିବାକୁ ଘରୋଇ ଗୁଇନ୍ଦାଙ୍କ ସହାୟତା ନେଉଛନ୍ତି ଅସଲି କମ୍ପାନି । ଘରୋଇ ଗୁଇନ୍ଦା ପକ୍ଷରୁ ନକଲି ଫ୍ୟାକ୍ଟ୍ରିର ଠିକଣା ଓ ଦଲାଲଙ୍କ ତଥ୍ୟ ପରବର୍ତ୍ତୀ ସମୟରେ ପୁଲିସ ଓ ଖାଦ୍ୟ ନିରପତ୍ତା ଅଧିକାରୀଙ୍କ କାମରେ ଆସୁଛି । ଉଚ୍ଚ ଶିକ୍ଷା ପାଇଁ ଦୂର ସହରକୁ ଛାଡୁଥିବା ପିଲାଙ୍କ ଗତିବିଧି ଉପରେ ନଜର ରଖିବାକୁ କିଛି ଅଭିଭାବକ ଘରୋଇ ଗୁଇନ୍ଦା ଖୋଜୁଛନ୍ତି । କର୍ପୋରେଟ୍ ଜଗତରେ ପ୍ରତିଦ୍ୱନ୍ଦୀ ସଂସ୍ଥାର ଦୁର୍ବଳତା ଖୋଜିବାରେ, ଇନସୁରାନ୍ସ ହିତାଧିକାରୀଙ୍କ ସତ୍ୟସତ୍ୟ ଜାଣିବାରେ ଘରୋଇ ଗୁଇନ୍ଦାମାନେ କାମରେ ଆସୁଛନ୍ତି ।
