ସାନଖେମୁଣ୍ଡି,୦୧/୦୮: ସାନଖେମୁଣ୍ଡି ବ୍ଲକର ଆଡପଡା ଅଞ୍ଚଳରେ ବ୍ୟାପିଲା ଝାଡ଼ାବାନ୍ତି । ପ୍ରାୟ  ୫୦ରୁ ଉଦ୍ଧ୍ୱର୍ ଲୋକ ଝାଡ଼ାବାନ୍ତିରେ ଆକ୍ରାନ୍ତ ହୋଇଛନ୍ତି । ଦୂଷିତ ପାନୀୟ  ଜଳ ଓ ଖାଦ୍ୟ ଯୋଗୁଁ ଲୋକ ଅସୁସ୍ଥ  ହେଉଥିବା ଆଶଙ୍କା କରାଯାଉଛି ।  ସପ୍ତାହେ ହେଲା ଏଭଳି ସ୍ଥିତି ଲାଗି  ରହିଥିବା ବେଳେ ସ୍ଥାନୀୟ ଅଞ୍ଚଳରେ  ଜିଲ୍ଲା ସ୍ୱାସ୍ଥ୍ୟ ବିଭାଗ ଟିମ୍‌ ପହଞ୍ଚିନାହିଁ ।  ଫଳରେ ଆଗକୁ ସ୍ଥିତି ସଙ୍ଗିନ ହେବା  ଆଶାଙ୍କା କରାଯାଉଛି । 

ପାଞ୍ଚଦିନ ତଳେ ଆଡପଡା ଗ୍ରାମର ରଘୁ ନାୟକ ଓ ତାଙ୍କ  ଭାଉଜ କାଞ୍ଚନ ନାୟକଙ୍କ ଝାଡ଼ାବାନ୍ତିରେ  ମୃତ୍ୟୁ ହୋଇଥିବା ଅଭିଯୋଗ ହୋଇଛି। ଉଭୟେ ଝାଡ଼ାବାନ୍ତିରେ ଆକ୍ରାନ୍ତ ହେବା  ପରେ ଆଡପଡା ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି  ହୋଇଥିଲେ । ଚିକିତ୍ସା ହୋଇ ଘରକୁ  ଫେରିବା ପରେ ପୁଣି ଝାଡ଼ା ହୋଇ  ମୃତ୍ୟୁ ହୋଇଥିବା ଅଭିଯୋଗ ହୋଇଛି । ଖଲିଙ୍ଗି, ମୁହିଗୁଡ଼ା, କଉଡ଼ିଆ, ହିଞ୍ଜିଳି, ଏସ୍‌.ଗୋପାଳପୁର, ଜଗନ୍ନାଥପୁର ଏବଂ  ଆଖପାଖ ଅଞ୍ଚଳର ଲୋକ ଝାଡ଼ାବାନ୍ତିରେ  ଆକ୍ରାନ୍ତ ହେଉଛନ୍ତି । ଆଡ଼ପଡ଼ା ଗୋଷ୍ଠୀ  ସ୍ୱାସ୍ଥ୍ୟକେନ୍ଦ୍ରର ମେଡିକାଲ ଟିମ୍‌ ଆକ୍ରାନ୍ତଙ୍କ  ଘରେ ପହଞ୍ଚି ସେମାନଙ୍କ ଲକ୍ଷଣ ଦେଖି  ରୋଗ ଚିହ୍ନଟ କରିବା ସହ ମାଗଣା  ଔଷଧ ପ୍ରଦାନ କରାଯାଇଛି ବୋଲି  ଆଡପଡା ସ୍ୱାସ୍ଥ୍ୟକେନ୍ଦ୍ର ଇନ୍‌ଚାର୍ଜ ଡା.  ବାହାନ ଦାଶ ସୂଚନା ଦେଇଛନ୍ତି।