ନୂଆଦିଲ୍ଲୀ: ଲୋକସଭା ନିର୍ବାଚନକୁ ନେଇ ଦେଶରେ ଆରୋପ ପ୍ରତ୍ୟାରୋପ ରାଜନୀତି ଜୋର ଧରିଛି । ସୋମବାର କଂଗ୍ରେସ ଏବଂ ବିଜେପି ପରଷ୍ପର ବିରୋଧରେ ଅଭିଯୋଗ ଧରି ନିର୍ବାଚନ କମିଶନଙ୍କ ପାଖରେ ପହଞ୍ଚିଛନ୍ତି । ପ୍ରଥମେ କଂଗ୍ରେସ ପ୍ରଧାନମନ୍ତ୍ରୀ ମୋଦୀଙ୍କ ବିରୋଧରେ ୧୭ଟି ଅଭିଯୋଗ ଧରି ନିର୍ବାଚନ କମିଶନଙ୍କ ପାଖରେ ଫେରାଦ ହୋଇଥିଲା । ପରେ ବିଜେପି ରାହୁଲ ଗାନ୍ଧୀଙ୍କ ମନ୍ତବ୍ୟ ଏବଂ ସେ ବ୍ୟବହାର କରିଥିବା ଶବ୍ଦ ବିରୋଧରେ ନିର୍ବାଚନ କମିଶନରେ ପହଞ୍ଚିଛି । 

ନିଜ ଅଭିଯୋଗରେ ରାହୁଲ ଗାନ୍ଧୀଙ୍କୁ ଅଭ୍ୟାସଗତ ଅପରାଧୀ ବୋଲି ଦର୍ଶାଇଛି ବିଜେପି । ଦେଶ ଭିତରେ ଯେଉଁଭଳି ଭାଷା ପ୍ରୟୋଗ କରୁଛନ୍ତି ଏବଂ ଲୋକମାନଙ୍କୁ ପରଷ୍ପର ବିରୋଧରେ ଲଢ଼େଇ କରିବାକୁ ଉସୁକାଉଛନ୍ତି, ସେନେଇ ନିର୍ବାଚନ କମିଶନରଙ୍କୁ ଅଭିଯୋଗ କରିବା ସହ ଦୃଢ଼ କାର୍ଯ୍ୟାନୁଷ୍ଠାନ ଦାବି କରିଛୁ ବୋଲି ବିଜେପିର ପ୍ରତିନିଧିମଣ୍ଡଳୀ କହିଛନ୍ତି । 

ବିଜେପି ନେତା ଅଭିଯୋଗ କରିଛନ୍ତି ଯେ, ରାହୁଲ ଗାନ୍ଧୀ ଦେଶର ଉତ୍ତର ଓ ଦକ୍ଷିଣ ଭାଗକୁ ଲଢ଼ାଇବାକୁ ଷଡ଼ଯନ୍ତ୍ର କରୁଛନ୍ତି । କଂଗ୍ରେସ ଉତ୍ତର ଓ ଦକ୍ଷିଣ ମଧ୍ୟରେ ମତଭେଦ ସୃଷ୍ଟି କରିବାକୁ ଚାହୁଁଛି ବୋଲି ବିଜେପି ନେତା ତରୁଣ ଚୁଘ୍ କହିଛନ୍ତି । ଦେଶ ବିକାଶ କରୁଥିବା ବେଳେ ରାହୁଲ ଗାନ୍ଧୀ ଦେଶକୁ ଭାଗ ଭାଗ କରିବାକୁ ଚାହୁଁଛନ୍ତି ବୋଲି ସେ ଅଭିଯୋଗ କରିଛନ୍ତି । ତେଣୁ ଆମେ ରାହୁଲ ଗାନ୍ଧୀଙ୍କ ବିରୋଧରେ ଲିଖିତ ଅଭିଯୋଗ କରିବା ସହ କଠୋର କାର୍ଯ୍ୟାନୁଷ୍ଠାନ ପାଇଁ ଦାବି କରିଛୁ ବୋଲି ତରୁଣ ଚୁଘ୍‌ କହିଛନ୍ତି ।