ଭୁବନେଶ୍ୱର,୦୯/୦୬: ବରମୁଣ୍ଡାରେ ସ୍କର୍ପିଓ ଉପରକୁ ବୋମା ମାଡ଼ ଘଟଣାର ପର୍ଦ୍ଦାଫାସ୍ କରିଛି ଖଣ୍ଡଗିରି ଥାନା ପୁଲିସ । ବୋମାମାଡ଼ କରିଥିବା ମୁଖ୍ୟ ଅଭିଯୁକ୍ତ ହେଲେ ସୁନ୍ଦରପଦା ଆଜାଦ ନଗରରେ ରହୁଥିବା ଖୋର୍ଦ୍ଧା ବୋଲଗଡ଼ର ମୁଫି ଓରଫ ସେହେନବାଜ୍ ମାଲିକ (୨୪) ଓ ମଞ୍ଚେଶ୍ୱର ଚଣ୍ଡୀ ମାତା କଲୋନୀର ଉଦିତ ନାରାୟଣ ପ୍ରଧାନ(୨୬) । ପୂର୍ବ ଶତ୍ରୁତା ଓ ଗାର୍ଲଫ୍ରେଣ୍ଡ୍କୁ କମେଣ୍ଟ୍ ମରାକୁ କେନ୍ଦ୍ର କରି ବରମୁଣ୍ଡା-ଆପିକଲ୍ ରାସ୍ତାରେ ନୂଆପଲ୍ଲୀର ରାଜେଶ ସାମନ୍ତ ସିଂହାରଙ୍କ ସ୍କର୍ପିଓ ଉପରକୁ ଏମାନେ ବୋମା ମାଡ଼ କରିଥିଲେ ବୋଲି ଜଣାପଡ଼ିଛି ।
ପୁଲିସ ସୂଚନା ଅନୁଯାୟୀ, ରାଜେଶ ଓ ତାଙ୍କ ସହଯୋଗୀମାନେ ଗତ ମାସ ୨୬ ତାରିଖରେ ପୁରୀ ବୁଲିବାକୁ ଯାଉଥିଲେ । ସେହିଦିନ ସେହେନବାଜ ତାଙ୍କ ଗାର୍ଲଫ୍ରେଣ୍ଡଙ୍କ ସହ ପୁରୀ ବୁଲି ଫେରୁଥିଲେ । ସେମାନେ ପିପିଲି ନିକଟରେ ଏକ ଦୋକାନ ସମ୍ମୁଖରେ ଥଣ୍ଡା ପାନୀୟ ପିଉଥିଲେ । ସେହି ସମୟରେ ରାଜେଶ ଓ ତାଙ୍କ ସହଯୋଗୀମାନେ ସ୍କର୍ପିଓରେ ସେଠାରେ ପହଞ୍ଚିଥିଲେ । ରାଜେଶ ସେଠାରେ ସେହେନବାଜଙ୍କ ଗାର୍ଲଫ୍ରେଣ୍ଡ୍କୁ କମେଣ୍ଟ୍ ମାରି ପଳାଇଥିଲେ । ପୂର୍ବରୁ ମଧ୍ୟ ସେହେନବାଜଙ୍କର ରାଜେଶଙ୍କ ଗୋଷ୍ଠୀ ସହ ବିବାଦ ଥିଲା । ତେଣୁ ସେହେନବାଜ୍ ପ୍ରତିଶୋଧପରାୟଣ ହୋଇ ପଡ଼ିଥିଲେ । ରାଜେଶଙ୍କୁ ସେ ହତ୍ୟା କରିବା ପାଇଁ ଯୋଜନା କରିଥିଲେ । ତେଣୁ ସେହେନବାଜ ତାଙ୍କର ୫ ଜଣ ସହଯୋଗୀଙ୍କ ସହ ପ୍ରସ୍ତୁତ ହୋଇ ରହିଥିଲେ । ରାଜେଶ ଓ ତାଙ୍କ ସହଯୋଗୀମାନେ ୨୭ ତାରିଖ ସକାଳେ ପୁରୀରୁ ଫେରୁଥିଲେ । ସେହେନବାଜ ଓ ତାଙ୍କ ୫ ଜଣ ସାଙ୍ଗ ମିଶି ୩ଟି ବାଇକ୍ରେ ସେମାନଙ୍କୁ ପିଛା କରିଥିଲେ । ବରମୁଣ୍ଡା ନୀଳକଣ୍ଠେଶ୍ୱର ମନ୍ଦିର ଛକରେ ରାଜେଶ ତାଙ୍କର ୨ ବନ୍ଧୁ ଅମନ ଚମ୍ପତ୍ତି ଓ ଦୀପକ ପୃଷ୍ଟିଙ୍କୁ ଛାଡ଼ି ଏକୁଟିଆ ଆପିକଲ୍ ରାସ୍ତା ଦେଇ ନୂଆପଲ୍ଲୀକୁ ଫେରୁଥିଲେ ।
ତାଙ୍କୁ ପିଛା କରୁଥିବା ସେହେନବାଜଙ୍କ ଗୋଷ୍ଠୀ ସ୍କର୍ପିଓକୁ ଅଟକାଇବା ପାଇଁ ଚେଷ୍ଟା କରିଥିଲେ । ଏହା ଜାଣିପାରି ରାଜେଶ ଦ୍ରୁତଗତିରେ ପଳାଇବାକୁ ଉଦ୍ୟମ କରୁଥିବା ବେଳେ ସେମାନେ ସ୍କର୍ପିଓକୁ ଲକ୍ଷ୍ୟ କରି ବୋମାମାଡ଼ କରିଥିଲେ । ବୋମା ସ୍କର୍ପିଓ ବାମପଟ ଆଗ ଗ୍ଲାସ୍ରେ ମାଡ଼ ହୋଇ ପ୍ରଚଣ୍ଡ ଶବ୍ଦ କରି ଫୁଟିଥିଲା । ସ୍କର୍ପିଓ ବାମ ପଟ ସଂପୂର୍ଣ୍ଣ କ୍ଷତିଗ୍ରସ୍ତ ହୋଇଥିବା ବେଳେ ରାଜେଶ ଆହତ ହୋଇଥିଲେ । ଏହି ସମୟରେ ଆକ୍ରମଣକାରୀମାନେ ସେଠାରୁ ଖସି ପଳାଇଥିଲେ । ଖବର ପାଇ ଖଣ୍ଡଗିରି ଥାନା ପୁଲିସ ଘଟଣାସ୍ଥଳରେ ପହଞ୍ଚି ରାଜେଶଙ୍କୁ ଉଦ୍ଧାର କରି ଏକ ଘରୋଇ ଡାକ୍ତରଖାନାରେ ଭର୍ତ୍ତି କରିଥିଲା ।
ତେବେ ବୋମା ଫିଙ୍ଗିଥିବା ସେହେନବାଜ ଓ ଉଦିତଙ୍କୁ ରାଜେଶ ଚିହ୍ନି ପକାଇଥିଲେ । ତାଙ୍କ ସୂଚନା ଆଧାରରେ ପୁଲିସ ବିଭିନ୍ନ ସ୍ଥାନରେ ଚଢ଼ଉ ଜାରି ରଖିଥିଲା । ଆଜି ସକାଳେ ପୁଲିସ ସେହେନବାଜ ଓ ଉଦିତଙ୍କୁ ଗିରଫ କରିବା ସହ ସେମାନଙ୍କ ଠାରୁ ଏକ ବାଇକ୍ ଜବତ କରିଥିଲା । ତେବେ ସେହେନବାଜ ଜଣେ ପେସାଦାର ଅପରାଧୀ ଓ ସେ ନିଜେ ବୋମା ଭିଡ଼ୁଥିବା ପୁଲିସ ସୂଚନା ପାଇଛି । ଆଜି ୨ ଜଣଙ୍କୁ କୋର୍ଟ ଚାଲାଣ କରାଯାଇଥିଲା । ଜାମିନ ନାମଞ୍ଜୁର ହେବାରୁ ଉଭୟଙ୍କୁ ଜେଲ୍ ହାଜତକୁ ପଠାଇ ଦିଆଯାଇଛି । ବୋମା ମାଡ଼ ମାମଲାରେ ସଂପୃକ୍ତ ଥିବା ଅନ୍ୟ ୪ ଅଭିଯୁକ୍ତ ଏବେ ଫେରାର୍ ଅଛନ୍ତି । ସେମାନଙ୍କୁ ଗିରଫ କରିବା ପାଇଁ ପୁଲିସ ବିଭିନ୍ନ ସ୍ଥାନରେ ଚଢ଼ଉ ଜାରି ରଖିଛି ।