ନୂଆଦିଲ୍ଳୀ,୧।୧୨: ଏବେ ଚାଲିଛି ବିବାହ ଋତୁ । ଏହା ଭିତରେ ବିବାହ କରୁଥିବା ଯୁବପୀଢିଙ୍କୁ ନେଇ ଏକ ମଜାଦାର ସର୍ଭେ ସାମନାକୁ ଆସିଛି। ପିତାମାତା କିମ୍ବା ଅଭିଭାବକମାନେ ସେମାନଙ୍କ ପିଲାମାନଙ୍କର ବିବାହ ଏବଂ ଏଥିରେ ଥିବା ଖର୍ଚ୍ଚ ବିଷୟରେ ବହୁତ ଚିନ୍ତାରେ ଥାଆନ୍ତି। ସେମାନେ ନିଜ ପିଲାମାନଙ୍କର ବିବାହ ପାଇଁ ଆରମ୍ଭରୁ ସଞ୍ଚୟ କରିବା ଆରମ୍ଭ କରନ୍ତି, କିନ୍ତୁ ଆପଣ ଜାଣି ଆଶ୍ଚର୍ଯ୍ୟ ହେବେ ଯେ ଆଜିର ଯୁବକ କିମ୍ବା ଯୁବତୀମାନେ ସେମାନଙ୍କ ବିବାହ ଖର୍ଚ୍ଚ ପାଇଁ ସେମାନଙ୍କ ପିତାମାତାଙ୍କ ଉପରେ ନିର୍ଭର କରିବାକୁ ଚାହାଁନ୍ତି ନାହିଁ। ଏକ ସର୍ଭେ ଅନୁଯାୟୀ, ୪୨ ପ୍ରତିଶତ ଯୁବକ ନିଜ ବିବାହ ଖର୍ଚ୍ଚ ନିଜେ ଦେବାକୁ ଚାହୁଁଛନ୍ତି।
‘ଇଣ୍ଡିଆ ଲେଣ୍ଡସ୍’ ୱେଡିଂ ସ୍ପେଣ୍ଡସ୍ ରିପୋର୍ଟ ୨.୦ ନାମରେ ଏକ ରିପୋର୍ଟ ଜାରି କରାଯାଇଛି। ‘ଇଣ୍ଡିଆ ଲେଣ୍ଡସ୍’ ଏହାର ଅଧ୍ୟୟନରେ ଜାଣିବାକୁ ପାଇଛି ଯେ, ଆଜିର ଯୁବକମାନେ ନିଜ ବିବାହର ଅର୍ଥ ନିଜେ ବହନ କରିବାକୁ ଚାହୁଁଛନ୍ତି ଏବଂ ବିବାହ ଖର୍ଚ୍ଚରେ ପିତାମାତାଙ୍କୁ ଭାର ଦେବାକୁ ଚାହୁଁ ନାହାଁନ୍ତି। ସର୍ଭେ କରାଯାଇଥିବା ଯୁବକମାନଙ୍କ ମଧ୍ୟରେ ୪୨ ପ୍ରତିଶତ ନିଜ ବିବାହର ଖର୍ଚ୍ଚ ଦେବାକୁ ଚାହୁଁଛନ୍ତି।
ବାପା-ମା ସବୁବେଳେ ନିଜ ଝିଅର ବିବାହ ଖର୍ଚ୍ଚ ବିଷୟରେ ଅଧିକ ଚିନ୍ତିତ, କିନ୍ତୁ ସର୍ଭେରେ ଏକ ଆଶ୍ଚର୍ଯ୍ୟଜନକ ଘଟଣା ସାମ୍ନାକୁ ଆସିଛି। ସର୍ବେକ୍ଷଣ ଅନୁଯାୟୀ, ୬୦ ପ୍ରତିଶତ ମହିଳା ନିଜ ବିବାହ ଖର୍ଚ୍ଚ ନିଜେ ବହନ କରିବାକୁ ଚାହାନ୍ତି, କିନ୍ତୁ ପୁରୁଷଙ୍କ ସଂଖ୍ୟା ମାତ୍ର ୫୨ପ୍ରତିଶତ। ସର୍ଭେ କରାଯାଇଥିବା ଯୁବପୀଢିଙ୍କ ମଧ୍ୟରେ ୫୮.୮ ପ୍ରତିଶତ ଲୋକ ଅତ୍ୟନ୍ତ ପାରମ୍ପାରିକ ତଥା ସରଳ ବିବାହକୁ ପସନ୍ଦ କରୁଛନ୍ତି। ସେଭଳି ୩୫.୩ ପ୍ରତିଶତ ଯୁବପୀଢି ଖୁବ୍ ବିଳାସମୟ ଢଙ୍ଗରେ ବିବାହ କରିବାକୁ ଚାହାନ୍ତି।