ଭଞ୍ଜନଗର,୫/୭: ଭଞ୍ଜନଗର ତନରଡାସ୍ଥିତ ଅଷ୍ଟମ ସ୍ବତନ୍ତ୍ର ଭାରତ ସଂରକ୍ଷିତ ବାହିନୀର ଜଣେ ଜବାନ ଅଶୋକ କୁମାର ଦଣ୍ଡସେନା ବିଶ୍ଵ ପୁଲିସ କ୍ରୀଡା ଦୌଡ ପ୍ରତିଯୋଗିତାରେ ଅଂଶଗ୍ରହଣ କରି ମୋଟ ୪ଟି ସ୍ବର୍ଣ୍ଣ ପଦକ ଜିତି ଦେଶ ତଥା ଆମ ରାଜ୍ୟ ପାଇଁ ଗୌରବ ଆଣିଛନ୍ତି।
ଆମେରିକାର ବର୍ମିହାମ୍ ଠାରେ ଆୟୋଜିତ ହେଉଥିବା ଆର୍ନ୍ତଜାତୀୟ ପୁଲିସ ଆଣ୍ଡ ଫାୟାର କ୍ରୀଡା ପ୍ରତିଯୋଗିତା- ୨୦୨୫ ରେ ପୁରୁଷ ବର୍ଗରେ ଦେଶ ପାଇଁ ପ୍ରତିନିଧିତ୍ୱ କରି ୧୦ ହଜାର, ୫ହଜାର, ୧୫ଶହ ଓ ୮ଶହ ମିଟର ଦୌଡକୁଦ ପ୍ରତିଯୋଗିତାରେ ସେ ସ୍ବର୍ଣ୍ଣପଦକ ହାସଲ କରିଛନ୍ତି। ଏଭଳି ଖବର ପ୍ରଚାରିତ ହେବାପରେ ରାଜ୍ୟ ମୁଖ୍ୟମନ୍ତ୍ରୀ ମୋହନ ଚରଣ ମାଝି ତୁରନ୍ତ ଟୁଇଟ୍ କରି ଏଭଳି ବିରଳ ସଫଳତା ପାଇଁ ଶ୍ରୀ ଦଣ୍ଡସେନାଙ୍କୁ ଶୁଭେଚ୍ଛା ଓ ଅଭିନନ୍ଦନ ଜଣାଇଛନ୍ତି।
ସେହିପରି ତନରଡା ଅଷ୍ଟମ ବଟାଲିୟନ୍ ଦୁର୍ଗପତି ସୁଧାକର ମିଶ୍ର ମଧ୍ୟ ଶ୍ରୀ ଦଣ୍ଡସେନାଙ୍କ ଏଭଳି କୃତୀତ୍ଵ ପାଇଁ ପ୍ରଶଂସା କରିବା ସହ ଏହା ଆମ ବଟାଲିୟନ୍ ପାଇଁ ଏକ ବିରଳ ମୁହୂର୍ତ୍ତ ଥିଲା ବୋଲି ଉଲ୍ଲେଖ କରିଛନ୍ତି। ଏଭଳି ବିଜୟ ସହ ସେ କେବଳ ୮ମ ଆଇଆରବି ବଟାଲିୟନ୍ ପାଇଁ ନୁହଁ ସାରା ରାଜ୍ୟ ତଥା ଦେଶ ପାଇଁ ଏକ ଉଦାହରଣ ପାଲଟି ଯାଇଛନ୍ତି ବୋଲି ଆଇଆରବି କମାଣ୍ଡେଣ୍ଟ ସୁଧାକର ମିଶ୍ର ନିଜ ପ୍ରତିକ୍ରିୟାରେ ଉଲ୍ଲେଖ କରିଛନ୍ତି। ଅପରପକ୍ଷରେ ଏଭଳି ଖୁସି ଖବର ପ୍ରଚାରିତ ହେବାମାତ୍ରେ ତନରଡାସ୍ଥିତ ଆଇଆରବି ବଟାଲିୟନ ପରିସରରେ ଖୁସିର ମାହୋଲ ଖେଳିଯାଇଛି। ପରସ୍ପର ପରସ୍ପରକୁ ମିଠା ଖୁଆଇ ଜବାନ ମାନେ ଖୁସି ମନାଇଛନ୍ତି।
