କିଭ୍, ୦୬/୦୯: ଓ୍ବାଗନର ମୁଖ୍ୟ ପ୍ରିଗୋଝିନଙ୍କ ମୃତ୍ୟୁ ପରେ ଏବେ ତାଙ୍କର ଆର୍ମିକୁ ଆତଙ୍କବାଦୀ ସଂଗଠନ ଘୋଷଣା କରିବାକୁ ଯାଉଛି ବ୍ରିଟେନ୍ । ଓ୍ବାଗନର ଆର୍ମିକୁ ବ୍ରିଟେନ୍ ଆତଙ୍କବାଦୀ ସଂଗଠନ ବୋଲି ଘୋଷଣା କରିବା ପରେ ଏହା ସମ୍ବନ୍ଧିତ କୌଣସି କାର୍ଯ୍ୟାକଳାପ କରିବା ଆଇନ ବିରୋଧୀ ହେବ । ଏଥିପାଇଁ ସଂସଦରେ ପ୍ରସ୍ତାବ ଆଗତ ହେବ । ଏହା ପରେ ଓ୍ବାଗନର ସଂପତ୍ତିକୁ ଆତଙ୍କବାଦୀଙ୍କ ସଂପତ୍ତି ଭାବେ ଜବତ କରିବେ ବ୍ରିଟେନ ସରକାର।
ଓ୍ବାଗନର ଗ୍ରୁପ୍ ରୁଷ ରାଷ୍ଟ୍ରପତିଙ୍କ ପାଇଁ କେବଳ ଏକ ମିଲିଟାରି ଟୁଲ୍ ଥିଲା ବୋଲି କହିଛନ୍ତି ବ୍ରିଟେନର ଗୃହ ସଚିବ ସୁଏଲା ବ୍ରେଭରମ୍ୟାନ୍ । ଏହା ସହ ଏହି ଗ୍ରୁପ ହିଂସ୍ରକ ଏବଂ ବିନାଶକାରୀ । ୟୁକ୍ରେନ୍ ଏବଂ ଆଫ୍ରିକାରେ ଓ୍ବାଗନର ଗ୍ରୁପ୍ ଯାହା କରିଛି ତାହା ସବୁ ଦେଖିଛନ୍ତି । ଓ୍ବାଗନରର ଗତିବିଧି କେବଳ ଅସ୍ଥିରତା ସୃଷ୍ଟି କରିବା ଲାଗି ବୋଲି ସେ ଅଭିଯୋଗ କରିଛନ୍ତି । ଏହା ସହ ସୁଏଲା ଆହୁରି କହିଛନ୍ତି ଯେ, ଓ୍ବାଗନର ଏକ ଆତଙ୍କବାଦୀ ସଂଗଠନ । ଏହାକୁ କେବଳ ବ୍ରିଟେନ୍ର ନିୟମ ଅନୁସାରେ ମାନିବାକୁ ବାକି ରହିଲା । ନିୟମ ବିରୋଧରେ ଯିଏ ଏହି ଗ୍ରୁପ ସହ ସଂପର୍କରେ ରହିବ ତାକୁ ୧୪ ବର୍ଷ ଜେଲ ଏବଂ ୫ ଲକ୍ଷ ଟଙ୍କା ଜରିମାନା ଦେବାକୁ ପଡ଼ିପାରେ ବୋଲି ସୁଏଲା ସ୍ପଷ୍ଟ କରିଛନ୍ତି ।
ତେବେ ୟୁକ୍ରେନ୍ ଯୁଦ୍ଧରେ ରୁଷ ପକ୍ଷରୁ ଓ୍ବାଗନର ମୁଖ୍ୟ ଭୂମିକା ନେଇଥିଲା । ଏହା ବ୍ୟତୀତ ସିରିଆ, ମାଲି ଏବଂ ଲିବିୟା ଭଳି ଆଫ୍ରିକୀୟ ଦେଶରେ ରୁଷର ଅପରେସନରେ ଅଂଶଗ୍ରହଣ କରିଥିଲା ଓ୍ବାଗନର ଗ୍ରୁପ୍ । ସୂଚନାଯୋଗ୍ୟ, ୨୦୨୩ ଜୁନ୍ ୨୩ରେ ରୁଷ ସରକାରଙ୍କ ବିରୋଧରେ ଗର୍ଜନ କରିଥିଲା ଓ୍ବାଗନର ଗ୍ରୁପ୍ । ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ଘନିଷ୍ଠ ଓ୍ବାଗନର ମୁଖ୍ୟ ପ୍ରିଗୋଝିନ ହଠାତ ବିଦ୍ରୋହ କରିବା ଆରମ୍ଭ କରିଥିଲେ। ଏହା ପରେ ମାମଲା ଯଦିଓ ଥଣ୍ଡା ପଡ଼ିଥିଲା । ହେଲେ ବିମାନ ଦୁର୍ଘଟଣାରେ ପ୍ରିଗୋଝିନଙ୍କ ମୃତ୍ୟୁ ପରେ ଓ୍ବାଗନର ଗ୍ରୁପ୍ ଆହୁରି ପ୍ରତିକ୍ରିୟଶୀଳ ହୋଇଉଠିଛି ।
You can also read: ଜଳବାୟୁ ପରିବର୍ତ୍ତନର ଭୟାବହତା, ଧ୍ୱଂସ ପାଇଥିଲେ ୯୯% ପୂର୍ବଜ
