ସାଧାରଣତଃ ଆମେ ବଳକା ଖାଦ୍ୟକୁ ଫ୍ରିଜରେ ରଖିଥାଉ। ପନିପରିବା ଓ ଫଳମୂଳ ଦୀର୍ଘ ଦିନ ପର୍ଯ୍ୟନ୍ତ ସତେଜ ରହିବା ଓ ନଷ୍ଟ ନ ହେବା ପାଇଁ ଫ୍ରିଜରେ ରଖୁ । କିନ୍ତୁ ଏପରି କିଛି ଖାଦ୍ୟ ଅଛି, ଯାହାକୁ ଆଦୌ ଫ୍ରିଜରେ ରଖିବା ଠିକ୍ ନୁହେଁ । କାରଣ ଏହି ସବୁ ଖାଦ୍ୟକୁ ଫ୍ରିଜରେ ରଖି ଖାଇଲେ ସ୍ବାସ୍ଥ୍ୟ ପ୍ରତି କ୍ଷତିକାରକ ହେବା ସହ ସ୍ବାଦ ମଧ୍ୟ ବଦଳିଯାଏ ।ତେବେ ଆସନ୍ତୁ ଜାଣିବା କେଉଁସବୁ ଖାଦ୍ୟକୁ ଫ୍ରିଜରେ ରଖି ଖାଇବା ଉଚିତ ନୁହେଁ। 

ଟମାଟୋ: ଥଣ୍ଡା ତାପମାତ୍ରା ଟମାଟୋ ସ୍ବାଦ ଖରାପ କରିପାରେ । ତେଣୁ ଏହାକୁ ସବୁବେଳେ ରୁମ୍ ତାପମାତ୍ରାରେ ରଖିବା ଓ ବଜାରରୁ ଆଣିବାର କିଛି ଦିନ ମଧ୍ୟରେ ବ୍ୟବହାର କରିବା ଉଚିତ୍ । 

ପିଆଜ: ଫ୍ରିଜରେ ପିଆଜ ମଧ୍ୟ ରଖିବା ଅନୁଚିତ୍ । ଏହାକୁ ସବୁବେଳେ କମ୍ ଥଣ୍ଡା ଓ ଶୁଖିଲା ଜାଗାରେ ରଖିବା ଆବଶ୍ୟକ, ଯେଉଁଠି ଠିକ୍ ଭାବେ ବାୟୁ ଚଳାଚଳ ହେଉଥିବ । 

ଆଳୁ: ଏହାକୁ ଫ୍ରିଜରେ ରଖିବା ଦ୍ବାରା ଆଳୁରେ ଥିବା ଷ୍ଟାର୍ଚ ସୁଗାରରେ ପରିଣତ ହୋଇଯାଏ । ଆଉ ସୁଗାର ଆମ ସ୍ବାସ୍ଥ୍ୟ ପାଇଁ ଖରାପ ।ତେଣୁ ଆଳୁକୁ ଫ୍ରିଜରେ ରଖିବା ବଦଳରେ ଏକ ଥଣ୍ଡା ଓ ଅନ୍ଧାରିଆ ସ୍ଥାନରେ ରଖନ୍ତୁ । 

କଦଳୀ: ଫ୍ରିଜରେ କଦଳୀ ରଖିଲେ ଏହାର ଚୋପା ବ୍ରାଉନ ହୋଇଯାଇପାରେ । ଯଦିଓ ଏହାର ଭିତର ଅଂଶ ଖାଇବା ଯୋଗ୍ୟ ରହିଥାଏ, କିନ୍ତୁ ସତେଜତା ଓ ସ୍ବାଦ କମିଯାଏ । ତେଣୁ ସବୁବେଳେ କଦଳୀକୁ ରୁମ୍ ତାପମାତ୍ରାରେ ରଖିବା ଉଚିତ୍ ।

ରସୁଣ: ପିଆଜ ଭଳି ରସୁଣ ମଧ୍ୟ ଫ୍ରିଜରେ ରଖନ୍ତୁ ନାହିଁ । ହେଲେ ଅନେକ ଲୋକ ଚୋପା ଛଡାଇ ରସୁଣ ଫ୍ରିଜରେ ରଖିଦିଅନ୍ତି । ଏମିତି କଲେ ଏହା ନରମ ହୋଇ ଅଙ୍କୁରିତ ହେବାରେ ଲାଗେ । 

ବ୍ରେଡ: ଫ୍ରିଜରେ ବ୍ରେଡ ରଖିଲେ ଏହା ଶୀଘ୍ର ଶୁଖିଯାଏ ଓ ବାସି ହେବା ସହ ଏଥିରେ ଫଙ୍ଗସ୍ ହୋଇଯାଏ । ସାମାନ୍ୟ ତାପମାତ୍ରାରେ ରହିଲେ ବ୍ରେଡ ଅଧିକ ଦିନ ଯାଏଁ ଭଲ ରହେ । ତେଣୁ ବ୍ରେଡକୁ ଫ୍ରିଜରେ ରଖନ୍ତୁ ନାହିଁ। 

ମହୁ: ତେଲ ପରି ମହୁ ଅନେକ ଦିନ ଯାଏଁ ନଷ୍ଟ ହୁଏ ନାହିଁ ଓ କୋଠରୀର ତାପମାତ୍ରାରେ ଖରାପ ହୁଏନି । ହେଲେ ମହୁ ଫ୍ରିଜରେ ରଖିଲେ ଏହା କ୍ରିଷ୍ଟାଲାଇଜ ହୋଇ କଠିନ ହୋଇଯାଇପାରେ । ଏହାର ନ୍ୟାଚୁରାଲ ଗୁଣ ମଧ୍ୟ ନଷ୍ଟ ହେବାରେ ଲାଗେ । ତେଣୁ ସବୁବେଳେ ମହୁ ରୁମ୍‌ ତାପମାତ୍ରାରେ ଶୁଖିଲା ଜାଗାରେ ରଖିବା ଭଲ । 

ଆଭୋକାଡୋ: ରେଫ୍ରିଜରେସନ ଦ୍ବାରା ଆଭୋକାଡୋ ପାଚିବା ପ୍ରକ୍ରିୟା ଧୀମା ହୋଇଯାଏ । ଯଦି ଏହା କଞ୍ଚା ଥାଏ, ତାହେଲେ ନରମ ହେବା ଯାଏଁ ଏହାକୁ ରୁମ୍ ତାପମାତ୍ରାରେ ରଖନ୍ତୁ । ଏହା ପାଚିଯିବା ପରେ କିଛି ଦିନ ଯାଏଁ ଫ୍ରିଜରେ ରଖିପାରିବେ ।