ନୂଆଦିଲ୍ଲୀ: ବୈଦେଶିକ ମନ୍ତ୍ରୀ ଏସ. ଜୟଶଙ୍କର ବ୍ରିଟେନ ପ୍ରତିପକ୍ଷ ଡେଭିଡ ଲାମିଙ୍କ ସହ ଆଲୋଚନା କରିଛନ୍ତି । ବାଂଲାଦେଶର ବର୍ତ୍ତମାନ ସ୍ଥିତି ଏବଂ ଶେଖ ହସିନା ଭାରତ ଚାଲିଆସିବା ପରେ ଜୟଶଙ୍କର ବ୍ରିଟେନ୍ର ବୈଦେଶିକ ମନ୍ତ୍ରୀଙ୍କ ସହ କଥା ହୋଇଥିବା ନେଇ ବୈଦେଶିକ ମନ୍ତ୍ରାଳୟ ପକ୍ଷରୁ ସୂଚନା ଦିଆଯାଇଛି । ବୈଦେଶିକ ମନ୍ତ୍ରାଳୟର ମୁଖପାତ୍ର ରଣଧୀର ଜୟସ୍ବାଲ କହିଛନ୍ତି ଯେ, ‘କିଛି ଘଣ୍ଟା ପୂର୍ବରୁ ବୈଦେଶିକ ମନ୍ତ୍ରୀ ବ୍ରିଟେନର ଡେଭିଡ ଲାମିଙ୍କ ସହ ଆଲୋଚନା କରିଛନ୍ତି । ଦୁଇ ନେତା ବାଂଲାଦେଶ ଏବଂ ପଶ୍ଚିମ ଏସିଆରେ ଜାରି ରହିଥିବା ଘଟଣାକ୍ରମ ଉପରେ କଥା ହୋଇଛନ୍ତି ।’ ସେପଟେ ବିଶେଷ ବ୍ୟକ୍ତିଙ୍କୁ ରାଜନୈତିକ ଶରଣ ଦେବାକୁ ଦେଶ ଅନୁମତି ଦିଏ ନାହିଁ ବୋଲି ବ୍ରିଟେନର ବୈଦେଶିକ ମନ୍ତ୍ରାଳୟ ସୂତ୍ରରୁ ସୂଚନା ମିଳିଛି ।
ଅନ୍ୟପଟେ ବାଂଲାଦେଶରେ ସଂଖାଲଘୁଙ୍କ ସୁରକ୍ଷା ସଂପର୍କରେ ସମୀକ୍ଷା ହୋଇଛି । ଏହା ସହ ଭାରତୀୟ ସୁରକ୍ଷା ପାଇଁ ବାଂଲାଦେଶର ଅଧିକାରୀଙ୍କ ସହ ଯୋଗାଯୋଗ କରାଯାଉଛି ବୋଲି ବୈଦେଶିକ ମନ୍ତ୍ରାଳୟ ପକ୍ଷରୁ ସୂଚନା ଦିଆଯାଇଛି । ରଣଧୀର ଜୟସ୍ବାଲ କହିଛନ୍ତି, ବାଂଲାଦେଶର ଲୋକମାନଙ୍କ ଆମେ ନିକଟତମ ବନ୍ଧୁ ହୋଇଥିବାରୁ, ଆମର ଆଶା ଯେ ଖୁବଶୀଘ୍ର ଦେଶରେ ଶାନ୍ତି ପ୍ରତିଷ୍ଠା ହେଉ । ବଂଲାଦେଶରେ ୯୦୦୦ ଛାତ୍ରଛାତ୍ରୀଙ୍କ ସମେତ ୧୯ ହଜାର ଭାରତୀୟ ଅଛନ୍ତି । ସେମାନଙ୍କ ମଧ୍ୟରୁ ଅଧିକାଂଶ ଲୋକ ଭାରତ ଫେରିଆସିଛନ୍ତି ।
ଯେଉଁମାନେ ଭାରତ ଆସିବାକୁ ଚାହୁଁଛନ୍ତି ଆମର ଦୂତାବାସ ସେମାନଙ୍କୁ ସହାୟତା କରୁଛି । ଏୟାର ଲାଇନ୍ସ ପରିଚାଳନା ହେଉଛି । ଦୂତାବାସର ଅଣ ଜରୁରି କର୍ମଚାରୀ ଏବଂ ସେମାନଙ୍କ ପରିବାର ସଦସ୍ୟଙ୍କୁ ଭାରତ ନେଇଆସିଛୁ । ଆଶା ଅଛି ଖୁବଶୀଘ୍ର ସମସ୍ୟାର ସମାଧାନ ହେବ ବୋଲି ରଣଧୀର ଜୟସ୍ବାଲ କରିଛନ୍ତି ।
