ନୂଆଦିଲ୍ଲୀ,୦୭/୦୯: ରାଜସ୍ଥାନ ରୟାଲ୍ସ ଆଗାମୀ ଆଇପିଏଲ୍‌ ସିଜନ ପାଇଁ ପ୍ରସିଦ୍ଧ ବ୍ୟାଟର ରାହୁଲ ଦ୍ରାବିଡ଼ଙ୍କୁ ନୂଆ ମୁଖ୍ୟ କୋଚ୍‌ ନିଯୁକ୍ତ କରିଛି । ସେ ଦୀର୍ଘ ୮  ବର୍ଷ ପରେ ରୟାଲ୍ସ ପରିବାରକୁ ଫେରିଛନ୍ତି । ପୂର୍ବରୁ ଦ୍ରାବିଡ଼  ୨୦୧୨ ଓ ୨୦୧୩ରେ ରୟାଲ୍ସ ଦଳ ଅଧିନାୟକ ଥିଲେ ।  ଏହାପରେ ସେ ୨୦୧୪ ଓ ୨୦୧୫ ଦୁଇ ବର୍ଷ ଧରି ଟିମ୍‌  ମେଣ୍ଟର ଭାବେ କାର୍ଯ୍ୟ କରିଥିଲେ । ସେ ଖୁବଶୀଘ୍ର ରୟାଲ୍ସ  ଦଳର କ୍ରିକେଟ୍‌ ନିର୍ଦ୍ଦେଶକ କୁମାର ସାଙ୍ଗାକାରାଙ୍କ ସହ  ଯୋଗଦେଇ ଆଗାମୀ ସିଜନ ପାଇଁ ରଣନୀତି ପ୍ରସ୍ତୁତ କରିବେ । ରୟାଲ୍ସ ପରିବାରକୁ ଫେରିବା ନେଇ ଦ୍ରାବିଡ଼ ବେଶ ଖୁସି  ଥିବା ପ୍ରକାଶ କରିଛନ୍ତି ।

ସେ କହିଛନ୍ତି, ରୟାଲ୍ସକୁ ମୋ ଘର  ଭଳି ଦେଖିଆସିଛି । ପୂର୍ବରୁ ଦଳ ସହ କାମ କରିଛି । ଟି-ଟ୍ୱେଣ୍ଟି ବିଶ୍ୱକପ୍‌ ପରେ ମୁଁ ନୂଆ ଚ୍ୟାଲେଞ୍ଜ ଗ୍ରହଣ କରିବାକୁ  ଚାହୁଁଥିଲି । ଆଜି ରୟାଲ୍ସର ମୁଖ୍ୟ କୋଚ୍‌ ଦାୟିତ୍ୱ ଗ୍ରହଣ  କରିଛି । ପୂର୍ବରୁ ଦଳ ସପୋର୍ଟ ଷ୍ଟାଫ୍‌ମାନେ ବହୁତ ଭଲ କାର୍ଯ୍ୟ  କରିଛନ୍ତି । ଆଗାମୀ ସଂସ୍କରଣରେ ଦଳକୁ ସଫଳ କରାଇବାକୁ  ଚେଷ୍ଟା କରିବି ।’ ଚଳିତ ବର୍ଷ ଦ୍ରାବିଡ଼ଙ୍କ ଅଧିନରେ ଭାରତ  ଟି-ଟ୍ୱେଣ୍ଟି ବିଶ୍ୱକପ୍‌ ଚାମ୍ପିଅନ ହୋଇଥିଲା । ବିଶ୍ୱକପ୍‌ ଶେଷ  ହେବା ପରେ ମୁଖ୍ୟ କୋଚ୍‌ ଭାବେ ତାଙ୍କ କାର୍ଯ୍ୟକାଳ ଶେଷ  ହୋଇଥିଲା । ସେ ଆଉ ଚୁକ୍ତି ବଢ଼ାଇବାକୁ ମନା କରିଥିଲେ ।