ଫ୍ଲୋରିଡ଼ା,୧୫/୦୬: ଆଜି ରୋହିତ ଶର୍ମାଙ୍କ ନେତୃତ୍ୱାଧିନ ଭାରତ ପ୍ରାଥମିକ ଗ୍ରୁପ୍ ଲିଗ୍ ପର୍ଯ୍ୟାୟର ଅନ୍ତିମ ମ୍ୟାଚ୍ରେ କାନାଡ଼ାକୁ ଭେଟିବାକୁ ଯାଉଛି । ଲାଉଡରହିଲ ଗ୍ରାଉଣ୍ଡ୍ରେ ଏହି ମ୍ୟାଚ୍ ଖେଳାଯିବ । ମାତ୍ର ଫ୍ଲୋରିଡ଼ା ସହରରେ ଲାଗି ରହିଥିବା ବର୍ଷା ମ୍ୟାଚ୍ରେ ବାଧକ ସାଜିବାର ଆଶଙ୍କା ଉପୁଜିଛି । ଉଭୟ ଦଳ ଅଭ୍ୟାସ କରିପାରି ନାହାନ୍ତି । ଅବଶ୍ୟ ଗ୍ରୁପ୍-ଏ’ରୁ ଭାରତ ସୁପର-୮ ରାଉଣ୍ଡରେ ପ୍ରବେଶ କରିସାରିଛି । କାନାଡ଼ା ୩ଟି ମ୍ୟାଚ୍ରୁ ଗୋଟିଏ ବିଜୟ ସହ ୨ ପଏଣ୍ଟ ହାସଲ କରିସାରିଛି । ଶନିବାର ମ୍ୟାଚ୍ରେ ଭାରତକୁ ହରାଇ କାନାଡ଼ା ପଏଣ୍ଟ ସଂଖ୍ୟା ୪କୁ ବୃଦ୍ଧି କରିବାକୁ ଆଶା ବାନ୍ଧିଛି ।
ଭାରତୀୟ ଦଳ ପ୍ରଥମ ୩ଟି ମ୍ୟାଚ୍ରେ ଯଥାକ୍ରମେ ଆୟର୍ଲାଣ୍ଡ, ପାକିସ୍ତାନ ଓ ୟୁଏସଏକୁ ହରାଇଥିଲା । ନାସାଉ କାଉଣ୍ଟି ଅନ୍ତର୍ଜାତୀୟ ଷ୍ଟାଡ଼ିୟମ୍ର ପିଚ୍ରେ ରନ୍ ସଂଗ୍ରହ କରିବା କଷ୍ଟକର ହୋଇଯାଇଥିଲା । ମାତ୍ର ଲାଉଡରହିଲ ଗ୍ରାଉଣ୍ଡ୍ରେ ଭାରତୀୟ ଦଳ ବିଶାଳ ସ୍କୋର ସଂଗ୍ରହ କରବାକୁ ପ୍ରୟାସ କରିବ । ଏହି ମ୍ୟାଚ୍ ପୂର୍ବରୁ ଷ୍ଟାର ବ୍ୟାଟର ବିରାଟ କୋହଲିଙ୍କ ଫର୍ମ ଗଣମାଧ୍ୟମରେ ଚର୍ଚ୍ଚାର ବିଷୟ ସାଜିଥିଲେହେଁ ଭାରତୀୟ ଦଳ ଏଥିପ୍ରତି ଧ୍ୟାନ ଦେଉ ନାର୍ହି । କୋହଲିଙ୍କ ଉପରେ ଦଳର ଯଥେଷ୍ଟ ଭରସା ରହିଛି । କୋହଲି ପ୍ରଥମ କରି ଓପନର ଭାବେ ଖେଳୁଥିବାରୁ ଟିମ ମ୍ୟାନେଜମେଣ୍ଟ ତାଙ୍କୁ ଯଥେଷ୍ଟ ସମୟ ଦେବାକୁ ନିଷ୍ପତ୍ତି ନେଇଛି ।
ଭାରତ ତୁଳନାରେ କାନାଡ଼ା ଅପେକ୍ଷାକୃତ ଦୁର୍ବଳ ମନେ ହେଉଥିଲେ ହେଁ କିଛି ଖେଳାଳିଙ୍କ ପ୍ରଦର୍ଶନ ବଳରେ ବିପର୍ଯ୍ୟୟ ପାଇଁ ପ୍ରୟାସ କରିବ। ଓପନର ଆରୋନ ଜନସନ, ନିକୋଲାସ କିର୍ଟନ, ଶ୍ରେୟାସ ମୋଭାଙ୍କ ଭଳି ଦକ୍ଷ ବ୍ୟାଟର ଦଳରେ ରହିଛନ୍ତି । ସେହିପରି ଡିଲନ ହେଲିଗର, ଜେରେମି ଗର୍ଡନ ଓ କଲିମ ସାନାଙ୍କ ଉପରେ ଦଳର ବୋଲିଂ ବିଭାଗ ନିର୍ଭର କରିବ ।
ଭାରତ ଏକାଦଶରେ ପରିବର୍ତ୍ତନ କରିପାରେ । ଓପନର ଯଶସ୍ୱୀ ଜୈସ୍ୱାଲ ଏକାଦଶକୁ ଫେରିବା ଅଶା କରାଯାଉଛି । ଫଳରେ କୋହଲି ତାଙ୍କ ପୂର୍ବ ୩ନଂ ସ୍ଥାନକୁ ଫେରିବେ । ସେହିପରି ମଧ୍ୟ ଭାଗରେ ରିଷଭ ପନ୍ତଙ୍କୁ ବିଶ୍ରାମ ଦେଇ ସଞ୍ଜୁ ସାମସନଙ୍କୁ ଖେଳାଇବା ସମ୍ଭାବନା ରହିଛି । ସୁପର-୮ ରାଉଣ୍ଡ ପୂର୍ବରୁ ପେସ ବୋଲର ଯଶପ୍ରୀତ ବୁମରାଙ୍କୁ ମଧ୍ୟ ବିଶ୍ରାମ ମିଳିପାରେ । ତାଙ୍କ ସ୍ଥାନରେ ବାମ ହାତି ସ୍ପିନର କୁଲଦୀପ ଯାଦବ ଖେଳିବେ।
ସମ୍ଭାବ୍ୟ ଏକାଦଶ
ଭାରତ: ରୋହିତ ଶର୍ମା(ଅଧିନାୟକ), ଯଶସ୍ୱୀ ଜୈସ୍ୱାଲ, ବିରାଟ କୋହଲି, ସୂର୍ଯ୍ୟକୁମାର ଯାଦବ, ସଞ୍ଜୁ ସାମସନ, ହାର୍ଦ୍ଦିକ ପାଣ୍ଡ୍ୟା, ରବିନ୍ଦ୍ର ଜାଡେଜା, ଅକ୍ଷର ପଟେଲ, କୁଲଦୀପ ଯାଦବ, ଶିବମ ଦୁବେ/ମହମ୍ମଦ ସିରାଜ, ଅର୍ଶଦୀପ ସିଂହ ।
କାନାଡ଼ା: ଆରନ ଜନସନ, ନବନୀତ ଧଲିୱାଲ, ପରଗତ ସିଂହ, ନିକୋଲାସ କିର୍ଟନ, ଶ୍ରେୟାସ ମୋଭା, ରବିନ୍ଦର ପାଲ ସିଂହ, ସାଦ ବିନ ଜାଫର(ଅଧିନାୟକ), କଲିମ ସାନା, ଡିଲନ ହେଲିଗର, ଜୁନୈଦ ସିଦ୍ଦିକି, ଜେରେମି ଗର୍ଡନ ।
