କେନ୍ଦୁଝର/ଭୁବନେଶ୍ୱର,୦୪/୦୩: ତେଲକୋଇ  ବିଧାୟକ ତଥା ପୂର୍ବତନ ମନ୍ତ୍ରୀ ଇଂ ପ୍ରେମାନନ୍ଦ  ନାଏକ ଦଳର ପ୍ରାଥମିକ ସଦସ୍ୟ ପଦରୁ ଇସ୍ତଫା ଦେଇଥିଲେ । ସେ ବିଜେପିରେ ଯୋଗ ଦେବେ ବୋଲି ସୂଚନା ମିଳିଛି । ବିଜେପିରେ ମିଶିବା ପରେ ଦଳ ତାଙ୍କୁ  ଟିକେଟ୍‌ ଦେବ ନାଁ ଡାକ୍ତର ଚାକିରି ଛାଡି ବିଜେପିରେ ମିଶି ସଙ୍ଗଠନ ସଜାଡୁଥିବା ଡାକ୍ତର ଫକୀର ନାଏକ ପ୍ରାର୍ଥୀ ହେବେ ସେ ନେଇ ରାଜନୀତି ଚଳଚଞ୍ଚଳ ହୋଇପଡିଛି । ପ୍ରେମାନନ୍ଦ ନାଏକ ଇଞ୍ଜିନିୟରିଂ ଚାକିରି ଛାଡି ୨୦୦୯ରେ ତେଲକୋଇ ଆସନରୁ ବିଜେଡି ପ୍ରାର୍ଥୀ ହୋଇ ବିଜୟୀ ହୋଇଥିଲେ ।  

୨୦୧୪ରେ ଟିକଟ୍‌ରୁ ବଞ୍ଚିତ ହେବା ପରେ ମଧ୍ୟ  ପ୍ରେମାନନ୍ଦ ବିଜେଡିରେ ରହିଥିଲେ । ୨୦୧୯ରେ  ବିଜେଡି ସୁପ୍ରିମୋ ପ୍ରେମାନନ୍ଦଙ୍କ ଉପରେ ଆସ୍ଥା ରଖି ପୁଣି ଦଳୀୟ ପ୍ରାର୍ଥୀ କରିଥିଲେ । ୬ ହଜାର ଭୋଟ ବ୍ୟବଧାନରେ ବିଜେପି ପ୍ରାର୍ଥୀ ଧର୍ନୁଜୟ ସିଦ୍ଧୁଙ୍କୁ ପରାସ୍ତ କରି ବିଜୟୀ ହୋଇଥିଲେ । ବିଧାୟକ ହେବା ପରେ ନବୀନ ପଟ୍ଟନାୟକଙ୍କ  ୫ମ ପାଳିରେ ଦକ୍ଷତା ବିକାଶ ଓ ବୈଷୟିକ ଶିକ୍ଷା ମନ୍ତ୍ରୀ ଭାବେ ପ୍ରେମାନନ୍ଦ ଦାୟିତ୍ୱ ତୁଲାଇଥିଲେ । ପ୍ରେମାନନ୍ଦଙ୍କ ମୁଖ୍ୟ ପ୍ରତିଦ୍ୱନ୍ଦ୍ୱୀ ଧର୍ନୁଜୟ ସିଦ୍ଧୁ ପଞ୍ଚାୟତ ନିର୍ବାଚନ ପୂର୍ବରୁ ବିଜେପି ଛାଡି  ବିଜେଡିରେ ଯୋଗ ଦେବା ପରେ ତେଲକୋଇ  ନିର୍ବାଚନ ମଣ୍ଡଳୀରେ ସମାନ୍ତରାଳ ସଙ୍ଗଠନ  ଆରମ୍ଭ ହୋଇଯାଇଥିଲା । ପ୍ରେମାନନ୍ଦ ଦଳୀୟ  କାର୍ଯ୍ୟକ୍ରମରୁ ଦୂରେଇ ରହିଥିଲେ । ଅକ୍ଟୋବର ୧୨  ତାରିଖରେ ମୁଖ୍ୟମନ୍ତ୍ରୀଙ୍କ ନିକଟକୁ ଇସ୍ତଫାପତ୍ର  ପଠାଇଥିଲେ । ଏଥର ଧର୍ନୁଜୟ ବିଜେଡିରୁ  ଲଢ଼ିବା ପାଇଁ ଲବିରେ ରହିଥିବା ବେଳେ  ପ୍ରେମାନନ୍ଦ ବିଜେପିରୁ ଲଢିଲେ ପୁଣି ଦୁଇ  ପ୍ରତିନ୍ଦ୍ୱନ୍ଦ୍ୱୀ ମୁହାଁମୁହିଁ ହେବେ । 

ସୋମବାର ବିଜେପିରେ ମିଶିବେ ଭଦ୍ରକ ରାଜନୀତିର ଦୁଇ ହେଭିୱେଟ ନେତା । ଧାମନଗରର ପୂର୍ବତନ ବିଧାୟକ ରାଜେନ୍ଦ୍ର ଦାସ ଓ ଭଦ୍ରକର ପୂର୍ବତନ ବିଧାୟକ ନରେନ ପଲେଇ । ଉଭୟ ନେତା ସମର୍ଥକଙ୍କ  ସହ ଭୁବନେଶ୍ୱର ଆସି ବିଜେପି ରାଜ୍ୟ ମୁଖ୍ୟ କାର୍ଯ୍ୟାଳୟରେ ସାମିଲ ହେବେ । ବିଜେପିରେ ଯୋଗ ଦେବା ପୂର୍ବରୁ ଶ୍ରୀ ପଲେଇ ରବିବାର  ସନ୍ଧ୍ୟାରେ କଂଗ୍ରେସରୁ ଇସ୍ତଫା ଦେଇଛନ୍ତି ।