ଆନନ୍ଦପୁର,୨୭/୧୧: ଆନନ୍ଦପୁର ବିଧାୟକ ଭାଗିରଥି ସେଠୀ ଆଣ୍ଠୁ ଅସ୍ତ୍ରୋପଚାର ପାଇଁ ମାସାଧିକ କାଳ ଭୁବନେଶ୍ୱରରେ ରହିବା ପରେ ଫକୀରପୁରସ୍ଥିତ ବାସ ଭବନକୁ ଫେରିଛନ୍ତି । ଫେରିବା ପରେ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମରେ ଯୋଗଦାନ କରୁଛନ୍ତି । ତେବେ ରବିବାର ନିଜ ବାସଭବନରେ ବନ୍ଧୁ ମିଳନ କାର୍ଯ୍ୟକ୍ରମର ଆୟୋଜନକୁ ନେଇ ଚର୍ଚ୍ଚା ଜୋର ଧରିଛି ।
କାର୍ଯ୍ୟକ୍ରମରେ ବହୁ ସଂଖ୍ୟାରେ ଦଳୀୟ କର୍ମୀ ଏକଜୁଟ୍ ହୋଇଥିଲେ । କର୍ମୀଙ୍କ ସହ କିଛି ବିରୋଧୀ ଗୋଷ୍ଠୀର କର୍ମୀ ବି ନଜରକୁ ଆସିଥିଲେ। ତେଣୁ ବନ୍ଧୁମିଳନ ଆଳରେ ଦଳୀୟ ବିରୋଧୀଙ୍କୁ ଏକଜୁଟ୍ କରିବା ପାଇଁ ଏଭଳି ବନ୍ଧୁ ମିଳନର ଆୟୋଜନ ହୋଇଥିବା କୁହାଯାଉଛି । ଯଦିଓ ବିଧାୟକ ମାସାଧିକ କାଳ କର୍ମୀଙ୍କ ଠାରୁ ଦୂରରେ ରହିଥିବା ଏବଂ ସେମାନଙ୍କୁ ଦେଖିବା ଲାଗି ଏଭଳି ବନ୍ଧୁ ମିଳନର ଆୟୋଜନ କରାଯାଇଥିବା ନିଜେ ପ୍ରକାଶ କରିଛନ୍ତି । କିନ୍ତୁ ଏତେ ସଂଖ୍ୟକ କର୍ମୀଙ୍କୁ ଦେଖି କିଛି ଅଲଗା ହାୱା ଚାଲିଥିବା ଚର୍ଚ୍ଚା ହେଉଛି ।
କାର୍ଯ୍ୟକ୍ରମରେ ଜିଲ୍ଲା ଦଳୀୟ ପର୍ଯ୍ୟବେକ୍ଷକ ସୁବ୍ରେତ ଛାଟୋଇ, ଯୁବ ନେତା ଦେବପ୍ରିୟ ପାତ୍ର, ଜିଲ୍ଲା ପରିଷଦ ଉପାଧ୍ୟକ୍ଷ ସୋମନାଥ ଦାସ, ହାଟଡିହି ବ୍ଲକ୍ ଅଧ୍ୟକ୍ଷା ସାବିତ୍ରୀ ସେଠୀ, ଜିଲ୍ଲା ଯୁବ ବିଜେଡି ସଭାପତି ରାକେଶ ରାମ, ସମ୍ପାଦକ ସତ୍ୟବ୍ରତ ରାମ, ଆନନ୍ଦପୁର ବ୍ଲକ ସଭାପତି ରାମ ଚନ୍ଦ୍ର ପଲେଇ, ପୌର ଉପାଧ୍ୟକ୍ଷ ଦୁର୍ଗାଚରଣ ଦଳେଇ ପ୍ରମୁଖଙ୍କ ସମେତ ବହୁ ଦଳୀୟ ନେତୃବୃନ୍ଦ ଓ ହଜାରେରୁ ଊଦ୍ଧ୍ୱର୍ କର୍ମୀ ଏହି ବନ୍ଧୁ ମିଳନରେ ଏକଜୁଟ ହୋଇଥିଲେ । କିନ୍ତୁ ଦଳୀୟ ସଂଗଠନକୁ ସୁଦୃଢ କରିବାକୁ ଶପଥ ନେଇଥିଲେ । ତେଣୁ ଏହା ବନ୍ଧୁମିଳନ କି ନିର୍ବାଚନୀ ପ୍ରସ୍ତୁତି ତାହା ଦେଖିବାକୁ ବାକି ରହିଲା ।
