ପ୍ୟାରିସ୍,୦୩/୦୮: ପ୍ୟାରିସ୍ ଅଲିମ୍ପିକ୍ସରେ ୨ଟି ବ୍ରୋଞ୍ଜ ପଦକ ଜିତି ଇତିହାସ ରଚିଥିବା ଭାରତର ଷ୍ଟାର୍ ସୁଟର ମନୁ ଭାକରଙ୍କ ସ୍ୱପ୍ନର ଯାତ୍ରା ଜାରି ରହିଛି । ଶୁକ୍ରବାର ସେ ମହିଳା ୨୫ମିଟର ପିସ୍ତଲ ଇଭେଣ୍ଟର ଫାଇନାଲ୍ରେ ପ୍ରବେଶ କରି ଆଉ ଏକ ପଦକ ଆଶା ଉଜ୍ଜୀବିତ ରଖିଛନ୍ତି । ଶନିବାର ସେ ପଦକ ଲଢ଼େଇରେ ଅବତୀର୍ଣ୍ଣ ହେବେ । ଏଥର ତାଙ୍କଠୁ ଏକ ବଡ଼ ପଦକ ଆଶା କରାଯାଉଛି ।
ମହିଳା ପିସ୍ତଲ ଇଭେଣ୍ଟର ଯୋଗ୍ୟତା ରାଉଣ୍ଡ୍ରେ ମନୁ ଓ ଈଶା ସିଂହଙ୍କ ଉପରେ ସମସ୍ତଙ୍କ ନଜର ରହିଥିଲା । ପୂର୍ବରୁ ୧୦ମିଟର ଏୟାର ପିସ୍ତଲ୍ ଏବଂ ୧୦ମିଟର ଏୟାର ପିସ୍ତଲ ମିକ୍ସଡ୍ ଟିମ୍ରେ ବ୍ରୋଞ୍ଜ ପଦକ ଭେଟି ଦେଇଥିବା ମନୁ ଆଜି ମଧ୍ୟ ଲକ୍ଷ୍ୟଚ୍ୟୁତ ହୋଇ ନଥିଲେ । ସେ ଯୋଗ୍ୟତା ରାଉଣ୍ଡ୍ର ପ୍ରିସିସନ୍ ଓ ରାପିଡ୍ରେ ମୋଟ ୫୯୦ ପଏଣ୍ଟ ସହ ଦ୍ୱିତୀୟ ସ୍ଥାନରେ ରହି ଫାଇନାଲ୍ରେ ପ୍ରବେଶ କରିଥିଲେ । ମାତ୍ର ଈଶା ୫୮୧ପଏଣ୍ଟ ସହ ୧୮ତମ ସ୍ଥାନରେ ରହି ବିଦାୟ ନେଇଥିଲେ । ଅଲିମ୍ପିକ୍ସ କ୍ରୀଡ଼ା ଇତିହାସରେ ମନୁ ପ୍ରଥମ ଭାରତୀୟ ଭାବେ ଗୋଟିଏ ଅଲିମ୍ପିକ୍ସରେ କ୍ରମାନ୍ୱୟରେ ୩ଟି ଇଭେଣ୍ଟର ଫାଇନାଲ୍ରେ ପ୍ରବେଶ କରି ଇତିହାସ ରଚିଛନ୍ତି । ଏଥର ସେ ପଦକର ରଙ୍ଗ ବଦଳାଇବାକୁ ଲକ୍ଷ୍ୟ ରଖିଛନ୍ତି ।
ମହିଳା ପିସ୍ତଲ ଇଭେଣ୍ଟରେ ୨ଟି ପର୍ଯ୍ୟାୟ (ପ୍ରିସିସନ୍, ରାପିଡ୍)ରେ ୩ଟି ଲେଖାଏଁ ସିରିଜ ଅନୁଷ୍ଠିତ ହୋଇଥିଲା । ପ୍ରଥମେ ପ୍ରିସିସନ୍ରେ ମନୁ ଯଥାକ୍ରମେ ୯୭, ୯୮, ୯୯ ସ୍କୋର ସହ (ମୋଟ ୨୯୪) ତୃତୀୟ ସ୍ଥାନ ଅଧିକାର କରିଥିଲେ । ଈଶା ଯଥାକ୍ରମେ ୯୫, ୯୬, ୧୦୦ ସ୍କୋର ସହ (ମୋଟ ୨୯୧) ଦଶମ ସ୍ଥାନରେ ରହିଥିଲେ । ଏହାପରେ ରାପିଡ୍ରେ ମନୁ ପ୍ରଥମ ସିରିଜରେ ୧୦୦ ଏବଂ ପରବର୍ତ୍ତୀ ୨ଟି ସିରିଜରେ ୯୮ ସ୍କୋର ଲେଖାଏଁ ସଂଗ୍ରହ କରି ଦ୍ୱିତୀୟ ସ୍ଥାନରେ ରହି ଫାଇନାଲ୍ରେ ପହଞ୍ଚିଥିଲେ। ଉଭୟ ସିରିଜରେ ମନୁ ଶୀର୍ଷ ସ୍ଥାନ ଅଧିକାର କରିଥିବା ହଙ୍ଗେରୀର ଭେରୋନିକା ମେଜର (୫୯୨)ଙ୍କୁ ମାତ୍ର ୨ପଏଣ୍ଟ ପଛୁଆ ରହିଥିଲା । ମେଜର ଅଲିମ୍ପିକ୍ସ ରେକର୍ଡ଼ର ସମକକ୍ଷ ହୋଇଥିଲେ ।
