ଆଗ୍ରା : ଉତ୍ତର ପ୍ରଦେଶର ଆଗ୍ରା ସ୍ଥିତ ତାଜମହଲ ଭିତରେ ଜଣେ ମହିଳା ଉଡ଼ାଇଲେ ଗେରୁଆ ପତାକା। ଏହାସହ ବୋତଲରେ ଜଳ ଆଣି ମଧ୍ୟ ଢାଳିଲେ। ଅଖିଳ ଭାରତ ହିନ୍ଦୁ ମହାସଭା ଏହାକୁ ଗଙ୍ଗାଜଳରେ ଜଳାଭିଷେକ କରାଯାଇ ଥିବା କହିଛି। ଏପଟେ , ଘଟଣାର ସୂଚନା ପାଇବା କ୍ଷଣି ସିଆଇଏସଏଫ୍ର ଯବାନମାନେ ମହିଳାଙ୍କୁ ଧରି ନେଇଛନ୍ତି। ବର୍ତ୍ତମାନ ସଂପୃକ୍ତ ମହିଳାଙ୍କୁ ପଚରାପଚରି କରାଯାଉଛି।
ଉଲ୍ଲେଖନୀୟ ଯେ, ତାଜମହଲ ଭିତରେ ଜଳ ଢାଳିବାର ଏହା ଦ୍ୱିତୀୟ ମାମଲା। ଆଜି ଶ୍ରାବଣ ସୋମବାରରେ ଜଣେ ମହିଳା ତାଜମହଲର ଛାତରେ ଚଢି ଥିଲେ। ପ୍ରଥମେ ତ ସେ ଜଳ ଢାଳିଲେ, ପରେ ସେଠାରେ ଗେରୁଆ କପଡ଼ା ଉଡାଇ ଥିଲେ। ମହିଳାଙ୍କ ନାଁ ମୀରା ରାଠୋର ଥିବା କୁହାଯାଉଛି ଏବଂ ସେ ଅଖିଳ ଭାରତ ହିନ୍ଦୁ ମହାସଭା ସହ ଜଡ଼ିତ। ମୀରା ରାଠୋର କିଛି ଦିନ ପୂର୍ବେ କାଉଡି ନେଇ ତାଜମହଲରେ ପହଞ୍ଚି ଥିଲେ, ସେତେବେଳେ ତାଙ୍କୁ ବାହାରେ ରୋକି ଦିଆ ଯାଇଥିଲା।
ଦୁଇ ଦିନ ପୂର୍ବେ ମଧ୍ୟ ଦୁଇଜଣ ଯୁବକ ତାଜମହଲ ଭିତରେ ଓମ୍ର ଷ୍ଟିକର ଲଗାଇ ଥିଲେ ଏବଂ ଏହା ଉପରେ ପାଣି ବୋତଲରେ ଜଳ ଚଢାଇ ଥିଲେ। ଏହାର ଫଟୋ ସୋସିଆଲ ମିଡ଼ିଆରେ ଭାଇରାଲ ହୋଇଥିଲା। ଏହି ଯୁବକମାନେ ଦାବି କରିଥିଲେ ସେ ବୋତଲରେ ଗଙ୍ଗାଜଳ ନେଇ ଆସିଥିଲେ ଏବଂ ସେ ତାଜମହଲ ଭିତରେ ଗଙ୍ଗାଜଳ ଚଢାଇ ଥିଲେ। ମାମଲାରେ ଆଗ୍ରାର ଏଡିସିପି ସିଟି ସୂରଜ ରାୟ କହିଥିଲେ କି, ତାଜମହଲରେ ଶନିବାର ଦୁଇ ଯୁବକ ଗଙ୍ଗାଜଳ ଚଢାଇ ଥିଲେ। ଦୁଇ ଯୁବକ ଗଙ୍ଗାଜଳ ବୋତଲରେ ନେଇ ସେଠାକୁ ଯାଇଥିଲେ। ଏହି ସ୍ଥିତିରେ ସେଠାରେ ସୁରକ୍ଷାରେ ଥିବା ଯବାନ କିଛି ଜାଣିପାରି ନଥିଲେ। ଉଭୟ ଯୁବକ ଅଖିଳ ଭାରତ ହିନ୍ଦୁ ମହାସଭା ସହ ସଂପୃକ୍ତ ଥିବାର ଦାବି କରାଯାଉଛି।
