ନୂଆଦିଲ୍ଲୀ: ପଞ୍ଜାବର ସ୍ୱର୍ଣ୍ଣ ମନ୍ଦିରକୁ ଆରଡିଏକ୍ସ ଲଗାଇ ଉଡ଼ାଇ ଦେବାକୁ ଧମକ ମିଳିଛି । କେହି ଦୁର୍ବୃତ୍ତ ଇମେଲ୍ ଜରିଆରେ ଏହି ଧମକ ଦେଇଛନ୍ତି । ଏହା ପରେ ଶିରୋମଣୀ ଗୁରୁଦ୍ବାର ପ୍ରବନ୍ଧକ କମିଟି (ଏସଜିପିସି) ନିଜ ସ୍ତରରେ ଘଟଣାର ଯାଞ୍ଚ କରିଛି । ମନ୍ଦିରରେ ସୁରକ୍ଷା ବ୍ୟବସ୍ଥା ବଢ଼ାଇ ଦିଆଯାଇଛି। ସେପଟେ ଇମେଲ୍ ସଂପର୍କରେ ସ୍ଥାନୀୟ ଥାନା ଏବଂ ପୁଲିସ କମିଶନରଙ୍କୁ ସୂଚନା ଦିଆଯାଇଛି ବୋଲି ଏସଜିପିସିର ମୁଖ୍ୟ ସଚିବ କୁଲଓ୍ବନ୍ତ ସିଂହ କହିଛନ୍ତି । ଘଟଣା ସଂପର୍କରେ ପୁଲିସ ପକ୍ଷରୁ କୌଣସି ସୂଚନା ମିଳିପାରି ନାହିଁ ।
ହରିମନ୍ଦିର ସାହିବ ଶିଖମାନଙ୍କର ସବୁଠାରୁ ପବିତ୍ର ଧାର୍ମିକ ସ୍ଥଳ । ସବୁଠାରୁ ପ୍ରମୁଖ ଗୁରୁଦ୍ୱାର, ଯାହାକୁ ଦରବାର ସାହିବ ବା ସ୍ୱର୍ଣ୍ଣ ମନ୍ଦିର ମଧ୍ୟ କୁହାଯାଏ। ଏହା ପଞ୍ଜାବର ଅମୃତସର ସହରରେ ଅବସ୍ଥିତ ଏବଂ ଏଠାକାର ସବୁଠାରୁ ବଡ଼ ଆକର୍ଷଣ । ସମ୍ପୂର୍ଣ୍ଣ ଅମୃତସର ସହର ସ୍ୱର୍ଣ୍ଣ ମନ୍ଦିର ଚାରିପାଖରେ ଅବସ୍ଥିତ। ହଜାର ହଜାର ଭକ୍ତ ଏବଂ ପର୍ଯ୍ୟଟକ ସ୍ୱର୍ଣ୍ଣ ମନ୍ଦିର ପରିଦର୍ଶନ କରିବାକୁ ଆସନ୍ତି ।
ଅମୃତସରର ନାମକରଣ ପ୍ରକୃତରେ ଗୁରୁ ରାମ ଦାସ ନିଜ ହାତରେ ତିଆରି କରିଥିବା ସରୋବର ଅନୁସାରେ କରାଯାଇଛି। ଏହି ଗୁରୁଦ୍ୱାର ଏହି ସରୋବର ମଧ୍ୟଭାଗରେ ଅବସ୍ଥିତ। ଏହି ଗୁରୁଦ୍ୱାରର ବାହାର ଅଂଶ ସୁନାରେ ତିଆରି, ତେଣୁ ଏହାକୁ 'ସ୍ୱର୍ଣ୍ଣ ମନ୍ଦିର' ବୋଲି କୁହାଯାଏ। ସ୍ୱର୍ଣ୍ଣ ମନ୍ଦିରର ଲୋକପ୍ରିୟତା ବହୁତ । ଏଠକୁ ପ୍ରତିଦିନ ହଜାର ହଜାର ଶ୍ରଦ୍ଧାଳୁ ଆସିଥାନ୍ତି । ଏଭଳି ସ୍ଥିତିରେ ମନ୍ଦିରକୁ ବୋମା ଧମକ ମିଳିବା ଚିନ୍ତାର ବିଷୟ ।
