ବେଙ୍ଗାଲୁରୁ,୧୨/୦୭: ମୁଖ୍ୟମନ୍ତ୍ରୀଙ୍କ ପଦକୁ ନେଇ କର୍ଣ୍ଣାଟକ ରାଜନୀତିରେ ଅସ୍ଥିରତା ଦେଖିବାକୁ ମିଳିଛି । ସିଏମ୍ ସିଦ୍ଧରମୈୟା ପ୍ରଥମରୁ ହିଁ ସ୍ପଷ୍ଟ କରିଥିଲେ କି ନେତୃତ୍ବରେ ପରିବର୍ତ୍ତନ ହେବ ନାହିଁ । ହେଲେ ଉପମୁଖ୍ୟମନ୍ତ୍ରୀ ଡିକେ ଶିବକୁମାର ନିକଟରେ ଦେଇଥିବା ବୟାନରୁ କଂଗ୍ରେସରେ ଏବେ ବି ସିଏମ୍ ଚୌକି ବିବାଦ ଥମି ନଥିବା ସ୍ପଷ୍ଟ ହୋଇଛି ।
କର୍ଣ୍ଣାଟକର ଉପମୁଖ୍ୟମନ୍ତ୍ରୀ ଡିକେ ଶିବକୁମାର ପୁଣି ଥରେ ଏପରି ବୟାନ ଦେଇଛନ୍ତି, ଯାହା ପରେ ରାଜନୈତିକ କରିଡରରେ ମୁଖ୍ୟମନ୍ତ୍ରୀଙ୍କ ଚୌକି ପାଇଁ ବିବାଦର ଆଲୋଚନା ପୁଣି ଆରମ୍ଭ ହୋଇଛି। ଡିକେ ଶିବକୁମାର କହିଛନ୍ତି ଯେ, ''ଆମେ ସମସ୍ତେ ଚୌକି ପାଇଁ ଲଢୁଛୁ। ଏଠାରେ ଅନେକ ଚୌକି ଖାଲି ରହିଛି । ଆସି ବସିଯାଅ । ଚୌକି ପାଇବା ବହୁତ କଷ୍ଟକର । ଯେତେବେଳେ ତୁମେ ଚୌକି ପାଇବ, ତୁମେ ବସିବା ଉଚିତ୍ ।'' ବେଙ୍ଗାଲୁରୁ ସିଟି ସିଭିଲ୍ କୋର୍ଟରେ ବାଙ୍ଗାଲୋର ବାର ଆସୋସିଏସନ୍ ଦ୍ୱାରା ଆୟୋଜିତ କେମ୍ପାଗୌଡା ଜୟନ୍ତୀ କାର୍ଯ୍ୟକ୍ରମରେ ଉପମୁଖ୍ୟମନ୍ତ୍ରୀ ଶିବକୁମାର ଏହା କହିଛନ୍ତି ।
ମୁଖ୍ୟମନ୍ତ୍ରୀ ପଦକୁ ନେଇ କଂଗ୍ରେସରେ କନ୍ଦଳ ଥମିନାହିଁ- ଡେପୁଟି ସିଏମ୍ ଡିକେଙ୍କ ଚୌକି ମନ୍ତବ୍ୟ ପୁଣି ଥରେ ମୁଖ୍ୟମନ୍ତ୍ରୀ ଏବଂ ଉପମୁଖ୍ୟମନ୍ତ୍ରୀଙ୍କ ମଧ୍ୟରେ କ୍ଷମତା ସଂଘର୍ଷର କଳ୍ପନାଜଳ୍ପନାକୁ ଖୋରାକ ଯୋଗାଇଛି । ଯଦିଓ ସିଦ୍ଧରମୈୟା ପୂର୍ବରୁ ସ୍ପଷ୍ଟ କରିସାରିଛନ୍ତି ଯେ, ନେତୃତ୍ୱ ପରିବର୍ତ୍ତନ ହେଉନାହିଁ, କିନ୍ତୁ ଶିବକୁମାରଙ୍କ ବୟାନରୁ ସ୍ପଷ୍ଟ ଯେ କଂଗ୍ରେସରେ ଶୀର୍ଷ ପଦବୀକୁ ନେଇ ଅନ୍ତକନ୍ଦଳ ଏପର୍ଯ୍ୟନ୍ତ ଥମିନାହିଁ ।
ମୁଖ୍ୟମନ୍ତ୍ରୀ ସିଦ୍ଧରମୈୟାଙ୍କ ମତ କ’ଣ? ଗୁରୁବାର ଦିନ ସିଦ୍ଧରମୈୟା କହିଥିଲେ ଯେ, କଂଗ୍ରେସ ସରକାର ତାର ୫ ବର୍ଷର କାର୍ଯ୍ୟକାଳ ପୂରଣ କରିବ । ମୁଁ ମୁଖ୍ୟମନ୍ତ୍ରୀ ରହିବି । ଏହା ହାଇକମାଣ୍ଡଙ୍କ ନିଷ୍ପତ୍ତି ଏବଂ ଏଥିରେ କୌଣସି ପରିବର୍ତ୍ତନ ହେବ ନାହିଁ ।'' ହେଲେ ଡିକେ ଶିବକୁମାରଙ୍କ ଏହି ବିବୃତ୍ତି ଏମିତି ସମୟରେ ଆସିଛି ଯେତେବେଳେ, ଦଳ ଭିତରେ ବିବାଦର ଖବର ତାଜା ରହିଛି । ହେଲେ ସିଦ୍ଧରମୈୟାଙ୍କ ବିବୃତ୍ତି ସୂଚାଇଛି ଯେ, କଂଗ୍ରେସ ହାଇକମାଣ୍ଡ ବର୍ତ୍ତମାନ କର୍ଣ୍ଣାଟକରେ ନେତୃତ୍ୱ ପରିବର୍ତ୍ତନ କରିବା ମନୋଭାବରେ ନାହାନ୍ତି ।
