ତିରୁପତି, ୧୨।୭: ଟିଟିଡି ଭାରତର ସବୁଠାରୁ ପ୍ରସିଦ୍ଧ ମନ୍ଦିର ଭିତରୁ ଗୋଟିଏ ଶ୍ରୀ ଭେଙ୍କଟେଶ୍ୱର ସ୍ୱାମୀ ମନ୍ଦିରର ପରିଚାଳନା ଦାୟିତ୍ୱ ନେଇଛି । ଏହି ମନ୍ଦିରକୁ ଦେଶବିଦେଶରୁ କୋଟି କୋଟି ଭକ୍ତ ଆସିଥାନ୍ତି । ଏଠାରେ କେବଳ ହିନ୍ଦୁ କର୍ମଚାରୀ ନିଯୁକ୍ତ ହେବା ସହ ସଠିକ୍ ଧାର୍ମିକର ପରମ୍ପରାର ପାଳନ ହେବା ଉଚିତ୍ । କେନ୍ଦ୍ର ଗୃହ ରାଜ୍ୟ ମନ୍ତ୍ରୀ ବନ୍ଦୀ ସଞ୍ଜୟ କୁମାର ତିରୁମାଳା ତିରୁପତି ଦେବସ୍ଥାନମ୍ରେ ଅଣ ହିନ୍ଦୁ କର୍ମଚାରୀଙ୍କ ନିଯୁକ୍ତିକୁ ନେଇ ପ୍ରଶ୍ନ ଉଠାଇଛନ୍ତି । ସେ କହିଛନ୍ତି, ମନ୍ଦିରରେ ପାଖାପାଖି ୧ ହଜାର ଅଣ ହିନ୍ଦୁ କର୍ମଚାରୀଙ୍କୁ ଟିଟିଡି ନିଯୁକ୍ତି ଦେଇଛି । ଭଗବାନ ଭେଙ୍କଟେଶ୍ୱରଙ୍କ ଉପରେ ଆସ୍ଥା ନଥାଇ ସନାତନ ଧର୍ମର ପାଳନ ନ କରି ଟିଟିଡିରେ କାମ କରୁଛନ୍ତି ।
କେନ୍ଦ୍ର ଗୃହ ରାଜ୍ୟ ମନ୍ତ୍ରୀ ବନ୍ଦୀ ସଞ୍ଜୟ କୁମାର ପ୍ରଶ୍ନ କରିଛନ୍ତି ଯେ, ଯଦି ଅଣ ହିନ୍ଦୁ କର୍ମଚାରୀଙ୍କୁ ବହୁ ପୂର୍ବରୁ ନିଯୁକ୍ତି ଦିଆଯାଇଥିଲା, ତେବେ ଏ ପର୍ଯ୍ୟନ୍ତ ଏଥିରେ କାହିଁକି କୌଣସି ପରିବର୍ତ୍ତନ କରାଯାଇନାହିଁ । ଯଦି ମସଜିଦ୍-ଚର୍ଚ୍ଚରେ ହିନ୍ଦୁ କର୍ମଚାରୀ ନାହାନ୍ତି, ତେବେ ତିରୁପତି ମନ୍ଦିରରେ କାହିଁକି ? ଏହା କୌଣସି ଘୃଣାଭାବ ନୁହଁ, ଏହା ସାମ୍ପ୍ରଦାୟିକ କଥା । ଟିଟିଡି ମନ୍ଦିରର ସମସ୍ତ ଦାୟିତ୍ୱ କେବଳ ହିନ୍ଦୁଙ୍କୁ ଦେବା ଉଚିତ୍ । ଭାଜପାର ଜଣେ ନେତା କହିଛନ୍ତି ଯେ, ଏଥିରେ କୌଣସି ଲୁଚାଛପା କାରବାର ହୋଇଥାଇପାରେ । ଏହାର ସଠିକ୍ ଯାଞ୍ଚ ହେବା ଆବଶ୍ୟକ । ବନ୍ଦୀ ସଞ୍ଜୟ କୁମାର କହିଛନ୍ତି ଯେ, ଯେଉଁ ଅଣ ହିନ୍ଦୁମାନେ ଭଗବାନ ଭେଙ୍କଟେଶ୍ୱର ମନ୍ଦିରକୁ ଦର୍ଶନ ଲାଗି ଆସୁଛନ୍ତି, ଭଗବାନଙ୍କ ଉପରେ ଆସ୍ଥା ରଖିବାକୁ ସେମାନଙ୍କୁ କୁହାଯାଏ । ତେବେ ମନ୍ଦିରରେ ନିୟୋଜିତ ଥିବା ୧ ହଜାର ଅଣହିନ୍ଦୁ କର୍ମଚାରୀ ଯେଉଁମାନେ ଭଗବାନଙ୍କ ଉପରେ ଆସ୍ଥା ରଖୁନାହାନ୍ତି, ସେମାନଙ୍କୁ ମନ୍ଦିରରେ ଟିଟିଡି କେମିତି ନିଯୁକ୍ତି ଦେଇଛି ବୋଲି ସେ ପ୍ରଶ୍ନ ଉଠାଇଛନ୍ତି ।
