ନୂଆଦିଲ୍ଲୀ: ଶେଷରେ ଷ୍ଟାରଲିଙ୍କ୍ ତାର ଅପେକ୍ଷାର ଫଳ ପାଇଛି । ଭାରତୀୟ ମହାକାଶ ଯୋଗାଯୋଗ ସେବା ନିୟାମକ INSPACe ଏଲନ୍ ମସ୍କଙ୍କ କମ୍ପାନୀକୁ ଭାରତରେ ସେବା ଆରମ୍ଭ କରିବା ପାଇଁ ଲାଇସେନ୍ସ ଦେଇଛି । ଜିଓ, ଏୟାରଟେଲ୍ ଏବଂ ଅନନ୍ତ ଟେକ୍ନୋଲୋଜି ପରେ, ଏଲନ୍ ମସ୍କଙ୍କ କମ୍ପାନୀ ସାଟେଲାଇଟ୍ ସେବା ଆରମ୍ଭ କରିବା ପାଇଁ ଲାଇସେନ୍ସ ପାଇଛି । ଏଲନ୍ ମସ୍କ ୨୦୨୨ରୁ ଭାରତରେ ତାଙ୍କର ଷ୍ଟାରଲିଙ୍କ୍ ସାଟେଲାଇଟ୍ ବ୍ରଡବ୍ୟାଣ୍ଡ ସେବା ଆରମ୍ଭ କରିବାକୁ ପ୍ରସ୍ତୁତ ହେଉଥିଲେ । ତଥାପି, ଷ୍ଟାରଲିଙ୍କ୍ ଏବେ ଭାରତରେ ଏହାର ବାଣିଜ୍ୟିକ ସେବା ଆରମ୍ଭ କରିବ ନାହିଁ । ଏଥିପାଇଁ କମ୍ପାନୀକୁ ସ୍ପେକ୍ଟ୍ରମ୍ ଆବଣ୍ଟନ ପାଇଁ ଅପେକ୍ଷା କରିବାକୁ ପଡିବ ।
ପିଟିଆଇର ଏକ ରିପୋର୍ଟ ଅନୁଯାୟୀ, ଏଲନ ମସ୍କଙ୍କ କମ୍ପାନୀ ଭାରତରେ ମହାକାଶ-ଭିତ୍ତିକ ଇଣ୍ଟରନେଟ୍ ସେବା ଆରମ୍ଭ କରିବା ପାଇଁ ଲାଇସେନ୍ସ ପାଇଛି । ଷ୍ଟାରଲିଙ୍କ୍ ଜେନ ୧ କ୍ଷମତା ସହିତ LEO ସାଟେଲାଇଟ୍ ମାଧ୍ୟମରେ ଭାରତରେ ବ୍ରଡବ୍ୟାଣ୍ଡ ସେବା ପ୍ରଦାନ କରିବ । ନିୟାମକ ଦ୍ୱାରା କମ୍ପାନୀକୁ ୫ ବର୍ଷର ଲାଇସେନ୍ସ ଦିଆଯାଇଛି । କେନ୍ଦ୍ର ଟେଲିକମ୍ ମନ୍ତ୍ରୀ ଜ୍ୟୋତିରାଦିତ୍ୟ ସିନ୍ଧିଆ କହିଥିଲେ ଯେ, ଷ୍ଟାରଲିଙ୍କର ସୁଲଭ ସାଟେଲାଇଟ୍-ଭିତ୍ତିକ ସେବାର ପ୍ରବେଶ ସମ୍ପର୍କିତ ସମସ୍ତ ପ୍ରକ୍ରିୟା ସରକାରଙ୍କ ଦ୍ୱାରା ସମାପ୍ତ ହୋଇଛି । ଏହା ବ୍ୟତୀତ, ଇନସ୍ପେସ୍ ଅଧ୍ୟକ୍ଷ ପଓ୍ବନ ଗୋଏଙ୍କା କହିଛନ୍ତି ଯେ, ଷ୍ଟାରଲିଙ୍କର ସମସ୍ତ ଲାଇସେନ୍ସ-ସମ୍ବନ୍ଧୀୟ ଆବଶ୍ୟକତା ପୂରଣ କରାଯାଇଛି ।
ଷ୍ଟାରଲିଙ୍କ ସାଟେଲାଇଟ୍ ସେବା ଆରମ୍ଭ ହେବା ସହିତ, ଜରୁରୀକାଳୀନ ପରିସ୍ଥିତିରେ ମୋବାଇଲ୍ ନେଟୱାର୍କ ବିନା ମଧ୍ୟ କଲ୍ କରାଯାଇପାରିବ। ଏହା ସହିତ ବ୍ୟବହାରକାରୀମାନଙ୍କୁ ହାଇ ସ୍ପିଡ୍ ଇଣ୍ଟରନେଟ୍ ସୁବିଧା ମଧ୍ୟ ମିଳିବ । ରିପୋର୍ଟ ଅନୁଯାୟୀ, ଷ୍ଟାରଲିଙ୍କ ସେବା ପାଇବାକୁ ପ୍ରତି ମାସରେ ପ୍ରାୟ ୩୩୦୦ ଟଙ୍କା ପର୍ଯ୍ୟନ୍ତ ଖର୍ଚ୍ଚ କରିବାକୁ ପଡ଼ିପାରେ । ଏଲନ୍ ମସ୍କଙ୍କ କମ୍ପାନୀ ସ୍ପେସଏକ୍ସର ଲୋୟର ଆର୍ଥ ଅର୍ବିଟରେ ସ୍ଥାପିତ ସାଟେଲାଇଟ୍ ମାଧ୍ୟମରେ ଇଣ୍ଟରନେଟ୍ ସେବା ଯୋଗାଇବ। କମ୍ପାନୀ ଏବେ କେବଳ ସ୍ପେକ୍ଟ୍ରମ୍ ଆବଣ୍ଟନ ପାଇଁ ଅପେକ୍ଷା କରିଛି। ଏହା ସହିତ, ବେସ୍ ଷ୍ଟେସନ୍ ପ୍ରସ୍ତୁତ ହେବା ମାତ୍ରେ କମ୍ପାନୀ ଭାରତରେ ଏହାର ବ୍ରଡବ୍ୟାଣ୍ଡ ସେବା ଆରମ୍ଭ କରିପାରିବ ।
