ପାଟନା: ବିହାରର ଲୋକପ୍ରିୟ ୟୁଟ୍ୟୁବର ଏବଂ ପୂର୍ବତନ ବିଜେପି ନେତା ମନୀଷ କଶ୍ୟପ ସୋମବାର ଜନ ସୁରାଜ ପାର୍ଟିରେ ଯୋଗ ଦେଇଛନ୍ତି । ପ୍ରଶାନ୍ତ କିଶୋରଙ୍କ ଉପସ୍ଥିତିରେ ସେ ଜନ ସୁରାଜ ପାର୍ଟିରେ ସାମିଲ ହୋଇଛନ୍ତି । ମନୀଷ କଶ୍ୟପ ଦଳରେ ଯୋଗ ଦେବା ପରେ ଦଳର ପ୍ରତିଷ୍ଠାତା ପ୍ରଶାନ୍ତ କିଶୋର କହିଛନ୍ତି ଯେ, ମନୀଷ କଶ୍ୟପ ଜନ ସୁରାଜ ପାଇଁ ଜଣେ ୟୁଟ୍ୟୁବର ନୁହଁନ୍ତି କିମ୍ବା  ସେ ଜଣେ ପୂର୍ବତନ ବିଜେପି ନେତା ନୁହଁନ୍ତି । ସେ ବିହାରର ଜଣେ ପୁଅ । ଯିଏ ନିଜ ଶକ୍ତି, କଠିନ ପରିଶ୍ରମ ଏବଂ ଜ୍ଞାନ ଦ୍ୱାରା ନିଜର ପରିଚୟ ସୃଷ୍ଟି କରିଛନ୍ତି ଏବଂ ବିହାର ପାଇଁ କିଛି କରିବାକୁ ଚାହୁଁଛନ୍ତି । 

ପ୍ରଶାନ୍ତ କିଶୋର ଆହୁରି କହିଛନ୍ତି ଯେ, ଜନ ସୁରାଜ ଏକ ଏପରି ବ୍ୟବସ୍ଥା ଯାହା ବିହାର ପାଇଁ କିଛି କରିବାକୁ ଚାହୁଁଥିବା ପ୍ରତ୍ୟେକ ବ୍ୟକ୍ତିଙ୍କୁ ସୁଯୋଗ ଦିଏ। ଯଦି ସେମାନେ ଜନ ସୁରାଜ ସହ ଯୋଡ଼ି ହୁଅନ୍ତି, ତେବେ ସେମାନେ ବିହାରର ପରିବର୍ତ୍ତନ ଅଭିଯାନରେ ଏକ ବଡ଼ ଭୂମିକା ଗ୍ରହଣ କରିବେ ।

मशहूर यूट्यूबर मनीष कश्यप जन सुराज से जुड़े!! pic.twitter.com/TgfdfAZaPg

— Jan Suraaj (@jansuraajonline) July 7, 2025

ଏହା ପୂର୍ବରୁ ମନୀଷ କଶ୍ୟପ ଜୁନ୍ ୨୦୨୫ରେ ବିଜେପିରୁ ଇସ୍ତଫା ଦେଇଥିଲେ । ପରେ ସେ ପ୍ରଶାନ୍ତ କିଶୋରଙ୍କ ଜନ ସୁରାଜ ପାର୍ଟିରେ ଯୋଗ ଦେଇପାରନ୍ତି ବୋଲି କଳ୍ପନା ଜଳ୍ପନା ଲାଗି ରହିଥିଲା। ଏବେ ସେ ଜନ ସୁରାଜ ପାର୍ଟିରେ ସାମିଲ ହୋଇସାରିଛନ୍ତି । ତେବେ ମନୀଷ କଶ୍ୟପ ଜନ ସୁରାଜ ଟିକେଟରେ ଚାନପାଟିଆ ଆସନରୁ ବିହାର ବିଧାନସଭା ନିର୍ବାଚନ ଲଢ଼ିପାରନ୍ତି ବୋଲି ଚର୍ଚ୍ଚା ହେଉଛି । ଏ ସଂପର୍କରେ ଏପର୍ଯ୍ୟନ୍ତ କୌଣସି ସ୍ପଷ୍ଟ ସୂଚନା ମିଳିପାରି ନାହିଁ । 

ଜନ ସୁରାଜ ପାର୍ଟିରେ ମନୀଷ କଶ୍ୟପ ସାମିଲ ହେବା, ବିହାର ରାଜନୀତିରେ ଏକ ବଡ଼ ପରିବର୍ତ୍ତନ ଭାବରେ ଦେଖାଯାଉଛି । ମନୀଷ ସୋସିଆଲ ମିଡିଆରେ ତାଙ୍କର ଏକ ପୋଷ୍ଟରେ କହିଛନ୍ତି ଯେ, ‘ଆମେ ମଉଳି ଯାଇଥିବା ଆଶାକୁ ଛଜ୍ଜିବୀତ କରିବୁ । ଆମେ ପ୍ରତ୍ୟେକ ଘରେ ଆଲୋକ ଆଣିବୁ, ଆମେ ପ୍ରବାସର ଯନ୍ତ୍ରଣାକୁ ଶେଷ କରିବୁ, ଆମେ ପୁଣି ଏକ ନୂତନ ବିହାର ନିର୍ମାଣ କରିବୁ।’