ମୁମ୍ବାଇ: ମୁମ୍ବାଇର ଘାଟକୋପାର ମେଟ୍ରୋ ଷ୍ଟେସନରେ ସୋମବାର ସକାଳେ ଏକ ଦଲାଚକଟା ପରିସ୍ଥିତି ସୃଷ୍ଟି ହୋଇଥିଲା। ଯାହା ସହରର ଜନଗହଳିପୂର୍ଣ୍ଣ ଜନସାଧାରଣ ପରିବହନ ବ୍ୟବସ୍ଥାରେ ସୁରକ୍ଷା ସମସ୍ୟାକୁ ନେଇ ପୁଣିଥରେ ଆଲୋଚନାର ପରିସରକୁ ଆସିଛି। ବିଭିନ୍ନ ସାମାଜିକ ଗଣମାଧ୍ୟମରେ ଏକ ଭିଡିଓ ଭାଇରାଲ ହୋଇଛି। ଯେଉଁଥିରେ ଅତ୍ୟଧିକ ଭିଡ଼ ହେତୁ ଯାତ୍ରୀମାନେ ମେଟ୍ରୋ ଷ୍ଟେସନରେ ପରସ୍ପରକୁ ଠେଲାପେଲା କରୁଥିବା ଦେଖାଯାଇଛି। ଏହି ଘଟଣା ମୁମ୍ବାଇ ମେଟ୍ରୋ ଲାଇନ୍ ୧ (ଭରସୋଭା-ଆନ୍ଧେରୀ-ଘାଟକୋପାର) ରେ ଟେକ୍ନିକାଲ ତ୍ରୁଟି ହେତୁ ଟ୍ରେନ୍ ବିଳମ୍ବ ହେବା ଓ ଗୋଟିଏ ସେବା ପ୍ରତ୍ୟାହାର କରାଯିବା ପରେ ଘଟିଥିବା ନେଇ ଜଣାପଡିଛି।
ସୋସିଆଲ ମିଡିଆ ପ୍ଲାଟଫର୍ମ ଏକ୍ସରେ ପୋଷ୍ଟ କରାଯାଇଥିବା ଅନେକ ଭିଡିଓରେ ଦେଖାଯାଇଛି ଯେ, ଯାତ୍ରୀମାନେ ମେଟ୍ରୋରୁ ଓହ୍ଲାଇବା ଓ ଚଢ଼ିବା ସମୟରେ ପରସ୍ପରକୁ ଠେଲାପେଲା କରୁଛନ୍ତି। ଯେଉଁଥିପାଇଁ ଏହା ଏକ ବିପଜ୍ଜନକ ପରିସ୍ଥିତି ସୃଷ୍ଟି କରିଛି। ଜଣେ ସୋସିଆଲ ମିଡିଆ ୟୁଜର ଏହି ଘଟଣାକୁ "ଦଳାଚକଟା ପରିସ୍ଥିତି" ବୋଲି ବର୍ଣ୍ଣନା କରି ମୁମ୍ବାଇ ମେଟ୍ରୋ କର୍ତ୍ତୃପକ୍ଷଙ୍କୁ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଆହ୍ୱାନ ଦେଇଛନ୍ତି। ସେ ଆହୁରି ମଧ୍ୟ ପ୍ରସ୍ତାବ ଦେଇଛନ୍ତି ଯେ ମେଟ୍ରୋ ଲାଇନ୍ ୧ ରେ ୪ କାର ବଦଳରେ ୬ କାର ରେକ୍ ଏବଂ ଅଧିକ ଟ୍ରେନ୍ ଚଳାଚଳ କରାଇବା ଆବଶ୍ୟକତା ରହିଛି।
ଏହି ଘଟଣା ମୁମ୍ବାଇର ଜନସାଧାରଣ ପରିବହନ ବ୍ୟବସ୍ଥାରେ ଦୀର୍ଘଦିନୀୟ ସମସ୍ୟା ଉପରେ ଆଲୋକପାତ କରିଛି। ନିକଟ ଅତୀତରେ ଘାଟକୋପାର ଓ ଥାନେ ଷ୍ଟେସନଗୁଡ଼ିକରେ ଅତ୍ୟଧିକ ଭିଡ଼ ହେତୁ ଦୁର୍ଘଟଣା ଘଟି କିଛି ଯାତ୍ରୀଙ୍କ ମୃତ୍ୟୁ ଘଟିଥିବା ବେଳେ ଅନେକ ଯାତ୍ରୀ ଆହତ ମଧ୍ୟ ହୋଇଛନ୍ତି। ଏହା ମୁମ୍ୱାଇର ବିକଶିତ ଭିତ୍ତିଭୂମି ଏବଂ ଯାତ୍ରୀ ସୁରକ୍ଷା ଉପରେ ମଧ୍ୟ ପ୍ରଶ୍ନ ଉଠାଇଛି।
ମେଟ୍ରୋରେ ଯାତ୍ରା କରୁଥିବା ଯାତ୍ରୀମାନେ କହିଛନ୍ତି ଯେ ଘାଟକୋପାର, କଲ୍ୟାଣ, ଥାନେ, କୁର୍ଲା, ଦାଦର, ଆନ୍ଧେରୀ ଏବଂ ବାନ୍ଦ୍ରା ଭଳି ଷ୍ଟେସନଗୁଡ଼ିକରେ ଏଭଳି ଭିଡ଼ ଏକ ନିୟମିତ ଘଟଣା। ଏକ ରେଡ଼ିଟ୍ ପୋଷ୍ଟରେ ଜଣେ ବ୍ୟବହାରକାରୀ ଉଲ୍ଲେଖ କରିଛନ୍ତି ଯେ ଏହା ମୁମ୍ବାଇର ନିୟମିତ ଯାତାୟାତ ସମସ୍ୟାର ଏକ ଅଂଶ।
ଏହି ଘଟଣାକୁ ନେଇ ସୋସିଆଲ ମିଡିଆରେ ଭିନ୍ନଭିନ୍ନ ପ୍ରତିକ୍ରିୟା ଦେଖାଦେଇଛି। କେହି କେହି ମେଟ୍ରୋ କର୍ତ୍ତୃପକ୍ଷଙ୍କ ଉପରେ ଦାୟିତ୍ୱ ଝାଡିଥିବା ବେଳେ କେତେକ ଯାତ୍ରୀଙ୍କ ଅନିୟମିତ ଆଚରଣକୁ ଦାୟୀ କରିଛନ୍ତି। ଜଣେ ସୋଶିଆଲ ମିଡିଆ ବ୍ୟବହାରକାରୀ ମହାରାଷ୍ଟ୍ର ମୁଖ୍ୟମନ୍ତ୍ରୀ ଓ ଉପମୁଖ୍ୟମନ୍ତ୍ରୀଙ୍କୁ ଟାଗ୍ କରି ଏନେଇ ତୁରନ୍ତ କାର୍ଯ୍ୟାନୁଷ୍ଠାନ ନେବାକୁ ଦାବି କରିଛନ୍ତି।
ମୁମ୍ବାଇ ମେଟ୍ରୋ କର୍ତ୍ତୃପକ୍ଷଙ୍କ ପକ୍ଷରୁ ଏହି ଘଟଣା ସମ୍ପର୍କରେ କୌଣସି ଆନୁଷ୍ଠାନିକ ବିବୃତି ଜାରି ହୋଇନାହିଁ। ତେବେ ଏହି ଘଟଣା ପରେ ସହରର ପରିବହନ ବ୍ୟବସ୍ଥାରେ ଉନ୍ନତି ଓ ଯାତ୍ରୀ ସୁରକ୍ଷା ନିଶ୍ଚିତ କରିବା ପାଇଁ ତୁରନ୍ତ ପଦକ୍ଷେପ ନେବାର ଆବଶ୍ୟକତା ରହିଛି ବୋଲି ବିଶେଷଜ୍ଞମାନେ ମତ୍ତ ପ୍ରକାଶ କରିଛନ୍ତି।
