ନୂଆଦିଲ୍ଲୀ: ମଙ୍ଗଳବାର ଦିନ ଇଡି (ପ୍ରବର୍ତ୍ତନ ନିର୍ଦ୍ଦେଶାଳୟ)ର ଜଳନ୍ଧର ଶାଖା ପଞ୍ଜାବ ଏବଂ ହରିୟାଣାର ଅନେକ ଜିଲ୍ଲାରେ ଏକକାଳୀନ ଚଢାଉ କରିଛି । ଏହି ଚଢାଉ ବେଆଇନ ଭାବରେ ଆମେରିକା ପଠାଯାଇଥିବା ଲୋକଙ୍କ ସହିତ ଜଡିତ ଡଙ୍କି ରୁଟ୍ ମାମଲା ସହିତ ଜଡିତ । ହରିୟାଣା ଏବଂ ପଞ୍ଜାବର ଅମୃତସର, ସଂଗ୍ରୁର, ପଟିଆଲା, ମୋଗା, ଅମ୍ବାଲା, କୁରୁକ୍ଷେତ୍ର ଏବଂ କର୍ନାଲରେ ଚଢାଉ କରାଯାଉଛି । ଇଡି ଏକ ମନି ଲଣ୍ଡରିଂ ମାମଲାରେ ତଦନ୍ତ ଆରମ୍ଭ କରିଛି । ପଞ୍ଜାବ ଏବଂ ହରିୟାଣା ପୁଲିସ ଦ୍ୱାରା ପଞ୍ଜିକୃତ ୧୭ ଟି ଏଫଆଇଆର ଉପରେ ଏହି ଚଢ଼ାଉ କରିଛି ଇଡି । 

କିଛି ଟ୍ରାଭେଲ୍ ଏବଂ ଭିସା ଏଜେଣ୍ଟ ଓ ଦଲାଲ ଲୋକଙ୍କୁ ଆମେରିକା ପଠାଇବା ନାଁରେ ଲକ୍ଷ ଲକ୍ଷ ଟଙ୍କା ଆଦାୟ କରିବାର ଅଭିଯୋଗ ରହିଛି । ତଦନ୍ତରୁ ଜଣାପଡିଛି ଯେ, ଏଜେଣ୍ଟମାନେ ନିରୀହ ଲୋକଙ୍କୁ ଫ୍ଲାଇଟ୍ ମାଧ୍ୟମରେ ଆଇନଗତ ଭାବରେ ବିଦେଶ ପଠାଇବେ କହି ଠକୁଥିଲେ । ସେମାନେ ପ୍ରତି ବ୍ୟକ୍ତି ପାଇଁ ୪୫ ରୁ ୫୦ ଲକ୍ଷ ଟଙ୍କା ଲେଖାଏଁ ଆଦାୟ କରୁଥିଲେ । କିନ୍ତୁ ବାସ୍ତବରେ, ଏହି ଲୋକମାନଙ୍କୁ ଡଙ୍କି ରୁଟ୍‌ ଅର୍ଥାତ୍ ଜଙ୍ଗଲ ଏବଂ ବିପଦପୂର୍ଣ୍ଣ ରାସ୍ତା ଦେଇ ଅନେକ ଦେଶର ସୀମା ପାର କରି ଆମେରିକା ପଠାଉଥିଳେ । କେବଳ ଏତିକି ନୁହେଁ, ଏହି ଏଜେଣ୍ଟମାନେ ଡଙ୍କି ରୁଟ୍‌ରେ କାମ କରୁଥିବା ମାଫିଆମାନଙ୍କ ସହ ମିଶି ଲୋକଙ୍କୁ ଧମକ ଦେଇ ଟଙ୍କା ଆଦାୟ କରୁଥିଲେ। 

ସେମାନଙ୍କ ପରିବାରକୁ ବି ଧମକ ଦେଉଥିଲେ । ଯଦି ସେମାନେ ଟଙ୍କା ନ ଦିଅନ୍ତି, ତେବେ ସେମାନଙ୍କ ସମ୍ପର୍କୀୟମାନେ ଗମ୍ଭୀର ବିପଦରେ ପଡ଼ିପାରନ୍ତି ବୋଲି କହୁଥିଲେ ଏଜେଣ୍ଟ । ଆମେରିକାରୁ ନିର୍ବାସିତ ହୋଇଥିବା ଲୋକଙ୍କ ବୟାନ ମଧ୍ୟ ED ରେକର୍ଡ କରିଛି ।ଏହା ପରେ ଅନ୍ୟ କେତେକ ବ୍ୟକ୍ତିଙ୍କ ନାଁ ମଧ୍ୟ ସାମ୍ନାକୁ ଆସିଛି ।  ସେମାନଙ୍କ ଆଡ୍ଡା ଉପରେ ଆଜି ଚଢାଉ କରାଯାଇଛି । ଇଡିର ଏହି କାର୍ଯ୍ୟାନୁଷ୍ଠାନକୁ ଗୁରୁତ୍ୱପୂର୍ଣ୍ଣ ବୋଲି ବିବେଚନା କରାଯାଉଛି । ଏହି ତଦନ୍ତରୁ ଆହୁରି ଅନେକ ଆଶ୍ଚର୍ଯ୍ୟଜନକ ଖୁଲାସା ହୋଇପାରିବ ବୋଲି ଆଶା କରାଯାଉଛି ।