ନୂଆଦିଲ୍ଲୀ: ନାଟୋ ମହାସଚିବ ମାର୍କ ରୁଟେ ଭାରତ, ଚୀନ ଏବଂ ବ୍ରାଜିଲକୁ ରୁଷ ସହ ବାଣିଜ୍ୟ, ବିଶେଷତଃ ତେଲ ଓ ଗ୍ୟାସ କ୍ରୟ ଜାରି ରଖିବା ଉପରେ କଡ଼ା ଚେତାବନୀ ଦେଇଛନ୍ତି। ସେ କହିଛନ୍ତି ଯେ, ଏହି ଦେଶଗୁଡ଼ିକ ରୁଷ ସହ ବାଣିଜ୍ୟ ବନ୍ଦ ନକଲେ ୧୦୦% ସେକେଣ୍ଡାରୀ ନିର୍ବନ୍ଧନ (secondary sanctions) ଲାଗୁ କରାଯାଇପାରେ। ଏହି ଚେତାବନୀ ଆମେରିକୀ ସିନେଟରମାନଙ୍କ ସହ ଏକ ବୈଠକ ପରେ ଦିଆଯାଇଛି। ଏହା ପୂର୍ବରୁ ଆମେରିକୀୟ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ୟୁକ୍ରେନ ପାଇଁ ନୂଆ ଅସ୍ତ୍ର ପ୍ୟାକେଜ ଘୋଷଣା କରିବା ସହ ରୁଷ ସହ ବାଣିଜ୍ୟ ଜାରି ରଖୁଥିବା ଦେଶଗୁଡ଼ିକ ଉପରେ ୧୦୦% ପାଲଟା ଶୁଳ୍କ ଲଗାଇବା ନେଇ ଧମକ ଦେଇଥିଲେ। ଯଦି ୫୦ ଦିନ ମଧ୍ୟରେ ୟୁକ୍ରେନ ସହ ଶାନ୍ତି ଚୁକ୍ତି ହୁଏ ନାହିଁ ତେବେ ରୁଷ ଏହାର ପରିଣାମ ଭୋଗିବ ବୋଲି ଟ୍ରମ୍ପ ଚେତାବନୀ ଜାରି କରିଛନ୍ତି।

ମାର୍କ ରୁଟେ କହିଛନ୍ତି ଯେ, "ଯଦି ଆପଣ ଚୀନର ରାଷ୍ଟ୍ରପତି, ଭାରତର ପ୍ରଧାନମନ୍ତ୍ରୀ କିମ୍ବା ବ୍ରାଜିଲର ରାଷ୍ଟ୍ରପତି ଅଟନ୍ତି ଏବଂ ରୁଷ ସହ ବାଣିଜ୍ୟ ଜାରି ରଖନ୍ତି, ତେବେ ଜାଣି ରଖନ୍ତୁ: ଯଦି ମସ୍କୋର ନେତା (ପୁଟିନ) ଶାନ୍ତି ଆଲୋଚନାକୁ ଗମ୍ଭୀରତାର ସହ ଗ୍ରହଣ ନକରନ୍ତି, ତେବେ ମୁଁ ୧୦୦% ସେକେଣ୍ଡାରୀ ନିର୍ବନ୍ଧନ ଲାଗୁ କରିବି।" ସେ ଦିଲ୍ଲୀ, ବେଜିଂ ଓ ବ୍ରାସିଲିଆର ନେତାମାନଙ୍କୁ ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କୁ ଶାନ୍ତି ଆଲୋଚନା ପାଇଁ ଚାପ ପ୍ରୟୋଗ କରିବାକୁ ଆହ୍ୱାନ ଦେଇଛନ୍ତି। ନଚେତ ଏହି ଦେଶଗୁଡ଼ିକ ରୁଷିଆ ନିକଟତର ହୋଇଥିବାରୁ ଏହି ନିଷ୍ପତ୍ତି ପ୍ରଭାବ  ପକାଇବ ବୋଲି ସେ ଅନୁମାନ କରୁଛନ୍ତି।

ଏହି ଚେତାବନୀ ଆମେରିକୀ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଘୋଷଣା ପରେ ଆସିଛି। ଯେଉଁଥିରେ ସେ ୟୁକ୍ରେନକୁ ପ୍ୟାଟ୍ରିଅଟ ମିସାଇଲ ସିଷ୍ଟମ ଭଳି ଉନ୍ନତ ଅସ୍ତ୍ରଶସ୍ତ୍ର ଯୋଗାଇବାର ଯୋଜନା ପ୍ରକାଶ କରିଛନ୍ତି। ଏହା ରୁଷର ବାୟୁ ଆକ୍ରମଣକୁ ପ୍ରତିହତ କରିବା ପାଇଁ ୟୁକ୍ରେନ ପାଇଁ ଗୁରୁତ୍ୱପୂର୍ଣ୍ଣ ବୋଲି ବିବେଚନା କରାଯାଉଛି। ଟ୍ରମ୍ପ ମଧ୍ୟ ରୁଷର ରପ୍ତାନୀ ଉପରେ ୧୦୦% ଟାରିଫ ଏବଂ ରୁଷ ସହ ବାଣିଜ୍ୟ ଜାରି ରଖୁଥିବା ଦେଶଗୁଡ଼ିକ ଉପରେ ସେକେଣ୍ଡାରୀ ନିର୍ବନ୍ଧନ ଲାଗୁ କରିବାର ଧମକ ଦେଇଛନ୍ତି। ଯଦି ଆସନ୍ତା ୫୦ ଦିନ ମଧ୍ୟରେ ଶାନ୍ତି ଚୁକ୍ତି ସମ୍ପାଦନ ନ ହୁଏ ତେବେ ଆମେରିକା ଏହି ପାଲଟା ଶୁଳ୍କ ଲାଗୁ କରିବ ବୋଲି ଧମକ ଦେଇଛି।

ଆମେରିକାର ସିନେଟରମାନଙ୍କ ମଧ୍ୟରେ ୮୫ ଜଣ "ସାଙ୍କସନିଂ ରଶିଆ ଆକ୍ଟ ୨୦୨୫" ନାମକ ଏକ ବିଧେୟକକୁ ସମର୍ଥନ କରୁଛନ୍ତି। ଯାହା ରୁଷ ସହ ବାଣିଜ୍ୟ କରୁଥିବା ଦେଶଗୁଡ଼ିକ ଉପରେ ୫୦୦% ପର୍ଯ୍ୟନ୍ତ ଟାରିଫ ଲାଗୁ କରିବା ନେଇ ପ୍ରସ୍ତାବ ଦେଇଛି। ଏହି ବିଧେୟକର ନେତୃତ୍ୱ ସିନେଟର ଲିଣ୍ଡସେ ଗ୍ରାହାମ ଏବଂ ରିଚାର୍ଡ ବ୍ଲମେନଥାଲ ନେଇଛନ୍ତି। ଏହା ଭାରତ, ଚୀନ ଓ ବ୍ରାଜିଲ ଭଳି ଦେଶଗୁଡ଼ିକୁ ରୁଷ ସହ ଅର୍ଥନୈତିକ ସମ୍ପର୍କ ଉପରେ ପୁନର୍ବିଚାର କରିବାକୁ ଚାପ ସୃଷ୍ଟି କରିଛି।

ଭାରତ, ଚୀନ ଓ ବ୍ରାଜିଲ ରୁଷରୁ ତେଲ ଓ ଗ୍ୟାସ କ୍ରୟ ଜାରି ରଖିଛନ୍ତି, ଯାହା ସେମାନଙ୍କ ଅର୍ଥନୀତି ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ଏହି ଚେତାବନୀ ଏବଂ ସମ୍ଭାବ୍ୟ ନିର୍ବନ୍ଧନ ଏହି ଦେଶଗୁଡ଼ିକର ଅର୍ଥନୈତିକ ନୀତି ଏବଂ ବୈଦେଶିକ ସମ୍ପର୍କ ଉପରେ ଗଭୀର ପ୍ରଭାବ ପକାଇପାରେ। ରୁଟେଙ୍କ ଏହି ବୟାନ ରୁଷ-ୟୁକ୍ରେନ ଯୁଦ୍ଧର ବିଶ୍ୱବ୍ୟାପୀ ପ୍ରଭାବକୁ ଆହୁରି ଜୋରଦାର କରୁଛି।