ନୂଆଦିଲ୍ଲୀ: ଚୀନ୍ ସହ ପାକିସ୍ତାନର ସଂପର୍କ ଖୁବ ଭଲ । ଆଉ ଏବେ ଆମେରିକା ସହ ସୁସଂପର୍କ ସ୍ଥାପନ କରିବାକୁ ଯୋଜନା କରୁଛି ପାକିସ୍ତାନ । ଏବେ ଆମେରିକାକୁ ମଧ୍ୟ ଆକର୍ଷିତ କରିବାକୁ ଚେଷ୍ଟା କରୁଛି ଇସଲାମାବାଦ । ପାକ୍ ସେନା ମୁଖ୍ୟ ଅସୀମ ମୁନିର ଆମେରିକା ଗସ୍ତ କରିଥିଲେ ଏବଂ ଡୋନାଲ୍ଡ ଟ୍ରମ୍ପଙ୍କୁ ଭେଟିଥିଲେ। ଆଉ ଏବେ ଆମେରିକୀୟ ରାଷ୍ଟ୍ରପତି ଟ୍ରମ୍ପ ପାକିସ୍ତାନ ଗସ୍ତ କରିବେ ବୋଲି ଖବର ପ୍ରସାରିତ ହେଉଛି । ପାକିସ୍ତାନୀ ଗଣମାଧ୍ୟମରେ ଏଭଳି ଖବର ପ୍ରକାଶ ପାଇଛି । କିନ୍ତୁ ସବୁଠାରୁ ବଡ଼ କଥା ହେଉଛି ଏହି ସବୁ ଖବର ମିଛ । ପାକିସ୍ତାନୀ ଗଣମାଧ୍ୟମରେ ଖବର ପ୍ରକାଶ ପାଇଥିଲା ଯେ, ଟ୍ରମ୍ପ ସେପ୍ଟେମ୍ବରରେ ପାକିସ୍ତାନ ଗସ୍ତରେ ଆସିପାରନ୍ତି ।
ହ୍ୱାଇଟ୍ ହାଉସ୍ ପାକିସ୍ତାନର ସେନା ମୁଖ୍ୟ ଏବଂ ଫିଲ୍ଡ ମାର୍ଶାଲ୍ ଅସୀମ୍ ମୁନିରଙ୍କୁ ସ୍ୱାଗତ କରିଥିଲା। ମୁନିରଙ୍କ ଆମେରିକା ଗସ୍ତ ପରେ ଦୁଇ ଦେଶ ମଧ୍ୟରେ ସମ୍ପର୍କ ମଜବୁତ ହେଉଥିବା ଜଣାପଡ଼ିଛି। ଏବେ ଟ୍ରମ୍ପ୍ ମଧ୍ୟ ପାକିସ୍ତାନ ଆଡକୁ ମୁହାଁଇଛନ୍ତି ବୋଲି ଚର୍ଚ୍ଚା ହେଉଥିଲା । ସେ ସେପ୍ଟେମ୍ବରରେ ଇସ୍ଲାମାବାଦ ଆସିପାରନ୍ତି ବୋଲି ପାକ୍ ମିଡିଆ ପ୍ରଚାର କରିଥିଲା । କିନ୍ତୁ ପାକିସ୍ତାନର ବୈଦେଶିକ ମନ୍ତ୍ରଣାଳୟର ମୁଖପାତ୍ର କହିଛନ୍ତି ଯେ, ତାଙ୍କ ପାଖରେ ଟ୍ରମ୍ପଙ୍କ ଗସ୍ତ ବିଷୟରେ କୌଣସି ସୂଚନା ନାହିଁ ଏବଂ ହ୍ୱାଇଟ୍ ହାଉସ୍ ମଧ୍ୟ ଏପର୍ଯ୍ୟନ୍ତ ଏ ବିଷୟରେ କୌଣସି ସରକାରୀ ସୂଚନା ଦେଇନାହିଁ ।
ମିଳିଥିବା ସୂଚନା ଅନୁସାରେ, ୧୭ରୁ ୧୯ ସେପ୍ଟେମ୍ବର ଯାଏଁ ବ୍ରିଟେନ ଗସ୍ତ କରିବେ ଆମେରିକା ରାଷ୍ଟ୍ରପତି ଟ୍ରମ୍ପ । ସେଠାରେ ରାଜା ଚାର୍ଲସ୍ ତୃତୀୟଙ୍କୁ ସାକ୍ଷାତ କରିବାର କାର୍ଯ୍ୟକ୍ରମ ମଧ୍ୟ ରହିଛି । ପାକିସ୍ତାନର ସାମା ଟିଭି ରିପୋର୍ଟ କରିଥିଲା ଯେ, ଟ୍ରମ୍ପ ସେପ୍ଟେମ୍ବର ୧୮ରେ ଇସଲାମାବାଦ ଆସିପାରନ୍ତି । ସେପଟେ ଗତ ଦୁଇ ଦଶନ୍ଧୀ ମଧ୍ୟରେ କୌଣସି ଆମେରିକୀୟ ରାଷ୍ଟ୍ରପତି ପାକିସ୍ତାନ ଗସ୍ତ କରିନାହାନ୍ତି। ପୂର୍ବତନ ଆମେରିକୀୟ ରାଷ୍ଟ୍ରପତି ଜର୍ଜ ବୁଶ୍ ମାର୍ଚ୍ଚ ୨୦୦୬ରେ ପାକିସ୍ତାନ ଗସ୍ତ କରିଥିଲେ । ବୁଶଙ୍କ ପୂର୍ବରୁ ବିଲ୍ କ୍ଲିଣ୍ଟନ୍ ୨୦୦୦ ମସିହାରେ ପାକିସ୍ତାନ ଗସ୍ତ କରିଥିଲେ । ସେ କେବଳ କିଛି ଘଣ୍ଟା ପାଇଁ ରହିଥିଲେ।
ସୂଚନାଯୋଗ୍ୟ, ପହଲଗାମ ଆତଙ୍କବାଦୀ ଆକ୍ରମଣ ପରେ, ଭାରତ ଅପରେସନ ସିନ୍ଦୂର ଆରମ୍ଭ କରିଥିଲା। ଏହି ସମୟରେ ଭାରତୀୟ ସେନା ପିଓକେ ଏବଂ ପାକିସ୍ତାନରେ ଅବସ୍ଥିତ ଅନେକ ଆତଙ୍କବାଦୀ ଆଡ୍ଡାକୁ ଧ୍ୱଂସ କରିଥିଲା। ଭାରତର ଅପରେସନରେ ୧୦୦ ରୁ ଅଧିକ ଆତଙ୍କବାଦୀ ନିହତ ହୋଇଥିଲେ। ଏହାର ଜବାବରେ ପାକିସ୍ତାନ ସେନା ଭାରତୀୟ ସହର ଉପରେ ଆକ୍ରମଣ କରିବାକୁ ଚେଷ୍ଟା କରିଥିଲା। କିନ୍ତୁ ଏହା ପରେ ଦୁଇ ଦେଶ ମଧ୍ୟରେ ଯୁଦ୍ଧବିରତି ପାଇଁ ସହମତି ହୋଇଥିଲା। ଟ୍ରମ୍ପ ଦାବି କରିଥିଲେ ଯେ, ଦୁଇ ଦେଶ ଯୁଦ୍ଧବିରତି ପାଇଁ ରାଜି ହୋଇଛନ୍ତି । ଏହା ପରେ ପରେ ପାକିସ୍ତାନର ସେନା ମୁଖ୍ୟ ଅସୀମ ମୁନିର ଆମେରିକା ଗସ୍ତ କରିଥିଲେ ଏବଂ ରାଷ୍ଟ୍ରପତି ଟ୍ରମ୍ପଙ୍କୁ ଭେଟିଥିଲେ । ମୁନିର ଏବଂ ଟ୍ରମ୍ପଙ୍କ ଏହି ଭେଟଘାଟକୁ ନେଇ ସମଗ୍ର ବିଶ୍ବରେ ଚର୍ଚ୍ଚା ହୋଇଥିଲା ।
