ନୂଆଦିଲ୍ଲୀ: ଚୀନର ଦାଦାଗିରି କେବଳ ଦକ୍ଷିଣ ଚୀନ ସାଗର ପର୍ଯ୍ୟନ୍ତ ଆଉ ସୀମିତ ହୋଇ ନାହିଁ, ବରଂ ଏହା ଜାପାନର ଦକ୍ଷିଣ-ପଶ୍ଚିମ ଉପକୂଳରୁ ନେଇ ପ୍ରଶାନ୍ତ ମହାସାଗର ପର୍ଯ୍ୟନ୍ତ ଏହାର ସାମରିକ କାର୍ଯ୍ୟକଳାପ ବୃଦ୍ଧି କରିବାରେ ଲାଗିଛି। ଜାପାନ ଏବେ ଏହାକୁ ସବୁଠାରୁ ବଡ଼ ରଣନୈତିକ ବିପଦ ବୋଲି ବିବେଚନା କରିଛି। ମଙ୍ଗଳବାର ପ୍ରକାଶିତ ଏହାର ବାର୍ଷିକ ପ୍ରତିରକ୍ଷା ରିପୋର୍ଟରେ ଜାପାନ ଚୀନର ଏହି ଦ୍ରୁତ ଗତିରେ ବଢ଼ୁଥିବା ସାମରିକ କାର୍ଯ୍ୟକଳାପକୁ ନେଇ ଏକ ଚେତାବନୀ ଜାରି କରିଛି। ଜାପାନ ଚୀନର ଏହି କାର୍ଯ୍ୟକୁ ଦେଶ ପାଇଁ ଏକ ପ୍ରମୁଖ ରଣନୈତିକ ଚ୍ୟାଲେଞ୍ଜ ଭାବରେ ବିବେଚନା କରିଛି।
ଜାପାନର ପ୍ରତିରକ୍ଷା ମନ୍ତ୍ରଣାଳୟ ରିପୋର୍ଟରେ କହିଛି ଯେ, ଚୀନ୍ ରୁଷ ସହିତ ସୈନ୍ୟ ସହଯୋଗକୁ ବର୍ଦ୍ଧିତ କରିବା, ତାଇୱାନ ଉପରେ ଜାରି ଉତ୍ତେଜନା ଏବଂ ଉତ୍ତର କୋରିଆରୁ ଆସୁଥିବା ବିପଦ, ଚୀନର ଏହି ସାମରିକ କାର୍ଯ୍ୟକଳାପ ସହିତ ଦେଶର ସୁରକ୍ଷା ପାଇଁ ଗମ୍ଭୀର ଚିନ୍ତାର ବିଷୟ। ରିପୋର୍ଟରେ କୁହାଯାଇଛି ଯେ, ଦ୍ୱିତୀୟ ବିଶ୍ୱଯୁଦ୍ଧ ପରେ ଅନ୍ତର୍ଜାତୀୟ ସମ୍ପ୍ରଦାୟ ସବୁଠାରୁ ବଡ଼ ଚ୍ୟାଲେଞ୍ଜର ଯୁଗରେ ପ୍ରବେଶ କରିଛି। ଏଥିରେ ଏହା ମଧ୍ୟ ଉଲ୍ଲେଖ କରାଯାଇଛି ଯେ, ଆମେରିକା-ଚୀନ୍ ପ୍ରତିଦ୍ୱନ୍ଦ୍ୱିତାର ବଢ଼ୁଥିବା ଉତ୍ତେଜନା ବିଶ୍ୱ ଶକ୍ତି ସନ୍ତୁଳନରେ ଏକ ବଡ଼ ପରିବର୍ତ୍ତନ ଆଣେ। ଏହି ବିପଦଗୁଡ଼ିକ ବିଶେଷ ଭାବରେ ଭାରତ-ପ୍ରଶାନ୍ତ ମହାସାଗରୀୟ ଅଞ୍ଚଳରେ କେନ୍ଦ୍ରିତ, ଯେଉଁଠାରେ ଜାପାନ ଅବସ୍ଥିତ, ଏବଂ ଭବିଷ୍ୟତରେ ପରିସ୍ଥିତି ଆହୁରି ଖରାପ ହୋଇପାରେ।
ଚୀନର ବୈଦେଶିକ ମନ୍ତ୍ରଣାଳୟର ମୁଖପାତ୍ର ଲିନ୍ ଜିଆନ୍ ଜାପାନର ଦାବିକୁ ସମାଲୋଚନା କରି କହିଛନ୍ତି ଯେ ଏହି ରିପୋର୍ଟ "ଚୀନର ଏକ ଭୁଲ ଧାରଣା ସୃଷ୍ଟି କରୁଛି ଏବଂ ଅଯଥାରେ ଏହାର ଆଭ୍ୟନ୍ତରୀଣ ବ୍ୟାପାରରେ ହସ୍ତକ୍ଷେପ କରୁଛି। ଏହା ମଧ୍ୟ କହିଛି ଯେ, ଏହି ରିପୋର୍ଟ ତଥାକଥିତ 'ଚୀନ ବିପଦ'କୁ ଅତିରଞ୍ଜିତ କରୁଛି। ଲିନ୍ ଜିଆନ୍ ଆହୁରି ମଧ୍ୟ କହିଛନ୍ତି ଯେ, ବେଜିଂ ଏହି ପ୍ରସଙ୍ଗରେ ଜାପାନ ନିକଟରେ ପ୍ରତିବାଦ କରିଛି ଏବଂ ଚୀନର ସାମରିକ କାର୍ଯ୍ୟକଳାପକୁ "ବୈଧ ଏବଂ ଯୁକ୍ତିଯୁକ୍ତ" ବୋଲି ବର୍ଣ୍ଣନା କରିଛି ।
ରିପୋର୍ଟ ଅନୁଯାୟୀ,ଚୀନ୍ ପ୍ରଶାନ୍ତ ମହାସାଗରୀୟ ଅଞ୍ଚଳକୁ ମଧ୍ୟ ବିଚଳିତ କରୁଛି। ଏହି ମହାସାଗରରେ ଚୀନ୍ ଯୁଦ୍ଧ ଜାହାଜର ଉପସ୍ଥିତି ନିରନ୍ତର ବୃଦ୍ଧି ପାଉଛି ଏବଂ ଜାପାନର ଦକ୍ଷିଣ-ପଶ୍ଚିମ ଅଞ୍ଚଳ, ବିଶେଷକରି ତାଇୱାନ ଏବଂ ଜାପାନର ୟୋନାଗୁନି ଦ୍ୱୀପ ମଧ୍ୟରେ ଏହାର ଗତିବିଧି ଗତ ତିନି ବର୍ଷ ମଧ୍ୟରେ ତିନି ଗୁଣ ବୃଦ୍ଧି ପାଇଛି।
କିଛି ଦିନ ପୂର୍ବରୁ, ଜାପାନ ଦାବି କରିଥିଲା ଯେ ଚୀନ୍ ଜାପାନୀ ଗୁପ୍ତଚର ବିମାନ ଗୁଡ଼ିକ ନିକଟରେ ତା'ର ଲଢ଼ୁଆ ବିମାନ ଉଡ଼ାଣ ବନ୍ଦ କରୁ, କାରଣ ଏହା ଧକ୍କାର ବିପଦ ସୃଷ୍ଟି କରିପାରେ। ଏହାର ଜବାବରେ ବେଜିଂ ଚୀନର ବାୟୁ ସୀମା ନିକଟରେ ଜାପାନ ଗୁପ୍ତଚର କରୁଥିବା ଅଭିଯୋଗ କରିଥିଲା।
