ନୂଆଦିଲ୍ଲୀ: କଂଗ୍ରେସ ନେତା ରାହୁଲ ଗାନ୍ଧୀ ଏବଂ ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ୱଶର୍ମାଙ୍କ ମଧ୍ୟରେ ତୁତୁ ମେଁମେଁ ଆରମ୍ଭ ହୋଇଯାଇଛି ।  ରାହୁଲ ଗାନ୍ଧୀ ଆସାମ ମୁଖ୍ୟମନ୍ତ୍ରୀଙ୍କୁ ଜେଲ୍‌ରେ ପୂରାଇବେ ବୋଲି ଦୃଢ଼ୋକ୍ତି ବାଢ଼ିଛନ୍ତି । ସେପଟେ ହିମନ୍ତ ବିଶ୍ୱଶର୍ମା ରାହୁଲ ଗାନ୍ଧୀଙ୍କୁ ପାଲଟା ଜବାବ ଦେଇଛନ୍ତି । ରାହୁଲ ଏବେ ବି ଜାମିନରେ ଥିବା କଥା ମନେ ପକାଇ ଦେଇଛନ୍ତି ଆସାମ ମୁଖ୍ୟମନ୍ତ୍ରୀ । ଆସାମର ଚାୟଗାଓଁରେ ଅନୁଷ୍ଠିତ ଦଳୀୟ ବୈଠକରେ ରାହୁଲ ଦାବି କରିଛନ୍ତି ଯେ, ଆସାମର ମୁଖ୍ୟମନ୍ତ୍ରୀ ନିଜକୁ 'ରାଜା' ଭାବନ୍ତି, କିନ୍ତୁ ସେ ଖୁବଶୀଘ୍ର ଜେଲ ଯିବେ। ସେହିପରି ରାହୁଲଙ୍କ ଏହି ବୟାନର କଡ଼ା ଜବାବ ଦେଇଛନ୍ତି ହିମନ୍ତ। 

ସେ କହିଛନ୍ତି, ‘ଲେଖିକି ନିଅନ୍ତୁ, ହିମନ୍ତ ବିଶ୍ୱଶର୍ମାଙ୍କୁ ଜେଲ୍‌ରେ ପୂରାଇବୁ । ଏକଥା ଲୋକସଭାର ବିରୋଧୀ ଦଳ ନେତା ଦଳୀୟ କାର୍ଯ୍ୟକ୍ରମରେ କହିଛନ୍ତି । ସେ ଏହି କଥା କହିବାକୁ ଆସାମ ଆସିଛନ୍ତି । କିନ୍ତୁ ନେତା ଜୀ ଭୁଲି ଗଲେ ଯେ, ସେ ନିଜେ ଅପରାଧିକ ମାମଲାରେ ଜାମିନ ପାଇ ବାହାରେ ଅଛନ୍ତି ।’




ଆସାମ ମୁଖ୍ୟମନ୍ତ୍ରୀ ଏକ୍ସରେ ଲେଖିଛନ୍ତି, ‘ଯିଏ ଅନେକ ମାମଲାରେ ଜାମିନ ପାଇ ବାହାରେ ଅଛନ୍ତି, ସେ ଅନ୍ୟମାନଙ୍କୁ ଜେଲ ପଠାଇବା କଥା କହୁଛନ୍ତି । ରାହୁଲ ଗାନ୍ଧୀ ସହଜରେ ଭୁଲିଯାଇଛନ୍ତି ଯେ, ସେ ନିଜେ ଦେଶବ୍ୟାପୀ ପଞ୍ଜିକୃତ ଅନେକ ଅପରାଧିକ ମାମଲାରେ ଜାମିନରେ ଅଛନ୍ତି।’ ବିଶ୍ୱଶର୍ମା ରାହୁଲଙ୍କୁ ତାଚ୍ଛଲ୍ୟ କରି କହିଛନ୍ତି, ‘ମୋର ଶୁଭେଚ୍ଛା ଆପଣଙ୍କ ସହିତ ଅଛି, ରାହୁଲ ଜୀ । ଆସାମର ଆତିଥ୍ୟ ଉପଭୋଗ କରନ୍ତୁ। ରାହୁଲ ଗାନ୍ଧୀ କେବଳ ମୋତେ ଜେଲ ପଠାଇବା କଥା କହିବା ପାଇଁ ଆସାମ ଆସିଛନ୍ତି।’ ସେପଟେ ଦୁଇ ବରିଷ୍ଠ ନେତାଙ୍କ ମନ୍ତବ୍ୟ ପରେ ରାଜ୍ୟ ରାଜନୀତି ସରଗରମ ହୋଇଛି ।