ନୂଆଦିଲ୍ଲୀ, ୧୩।୭: ଯଦି କଡ଼ା ଫିଟନେସ୍ ରୁଟିନ୍ରେ ବାନ୍ଧି ହେଉଛନ୍ତି, ତେବେ ଏହା ପୁରୁଷଙ୍କ ପ୍ରଜନନ କ୍ଷମତାକୁ ବିପଦରେ ପକାଇପାରେ । କେବଳ ଏତିକି ନୁହେଁ, ପ୍ରାକୃତିକ ହରମୋନ୍ ଉତ୍ପାଦନକୁ ଦମନ କରି ଶୁକ୍ରାଣୁ ସଂଖ୍ୟାକୁ ଶୂନ କରିଦେଇପାରେ । ମସଲ୍ ଗ୍ରୋଥ୍ ପାଇଁ ଯଦି ଆପଣ ଆନାବୋଲକ୍ ଷ୍ଟେରଏଡ୍ ନେଉଥାନ୍ତି ତେବେ ଏହା ପ୍ରଜନନ ସ୍ୱାସ୍ଥ୍ୟ ଲାଗି ସବୁଠାରୁ ହାନିକାରକ । ବର୍ତ୍ତମାନ ଯୁବପିଢ଼ିଙ୍କ ମଧ୍ୟରେ ଫିଟନେସ୍ କଲଚର୍ ବ୍ୟାପିବାରେ ଲାଗିଛି । ଅଧିକାଂଶ ଯୁବକ ନିଜର ଶାରୀରିକ କାର୍ଯ୍ୟଦକ୍ଷତା ବଢ଼ାଇବା ଏବଂ ଚେହେରାକୁ ଆକର୍ଷଣୀୟ କରିବା ନିଶାରେ କଡ଼ା ଫିଟନେସ୍ ରୁଟିନ୍ରେ ବାନ୍ଧି ହେଉଛନ୍ତି । ମାତ୍ର, ଏହା ପରୋକ୍ଷରେ ସେମାନଙ୍କ ପ୍ରଜନନ କ୍ଷମତାକୁ ପ୍ରଭାବିତ କରେ ।
ଫିଟନେସ୍ ପାଇଁ ବ୍ୟବହୃତ କାର୍ଯ୍ୟଦକ୍ଷତା ବୃଦ୍ଧିକାରୀ ପଦାର୍ଥର ଅପବ୍ୟବହୃତ ପୁରୁଷଙ୍କ ପ୍ରଜନନ କ୍ଷମତାକୁ ବିପଦରେ ପକାଇଥାଏ । କଠିନ ଓ ଦୀର୍ଘକାଳୀନ ଫିଟନେସ୍ ରୁଟିନରେ ବାନ୍ଧି ହେବା ଦ୍ୱାରା ଟେଷ୍ଟୋଷ୍ଟେରନ୍, ଲ୍ୟୁଟିନାଇନିଂ ହରମୋନ୍ ଓ ଫଲିକ୍ଲ-ଷ୍ଟିମୁଲେଟିଂ ହରମୋନ୍ ଭଳି ପ୍ରମୁଖ ପ୍ରଜନନ ହରମୋନ୍ ବାଧାପ୍ରାପ୍ତ ହୋଇଥାଏ । ଦୀର୍ଘ ସମୟ ଧରି ବ୍ୟାୟାମ କରିବା ଦ୍ୱାରା କର୍ଟିସୋଲ୍ ସ୍ତର ବଢ଼ି ଟେଷ୍ଟୋଷ୍ଟେରନ୍କୁ ହ୍ରାସ କରେ, ଯାହା ଶୁକ୍ରାଣୁ ଉତ୍ପାଦନକୁ କମାଇ ଦେଇଥାଏ । ସେହିପରି ସାଉନାରେ ସ୍ନାନ କିମ୍ୱା ଦୀର୍ଘ ସମୟ ଧରି ସାଇକେଲିଂ ପରି କାର୍ଯ୍ୟକଳାପ ସ୍କ୍ରୋଟାଲ୍ ତାପମାତ୍ରା ବୃଦ୍ଧି କରେ, ଯାହା ଶୁକ୍ରାଣୁ ଉତ୍ପାଦନ ଓ ଗୁଣବତ୍ତାରେ ବାଧା ସୃଷ୍ଟି କରେ । ଅତ୍ୟଧିକ ପ୍ରଶିକ୍ଷଣ ଅକ୍ସିଡେଟିଭ୍ ଚାପ, ଶୁକ୍ରାଣୁରେ ଡିଏନ୍ଏ କ୍ଷତି ଓ ଦୀର୍ଘକାଳୀନ ପ୍ରଦାହ ସୃଷ୍ଟି କରିପାରେ, ଯାହା ସମଗ୍ର ପ୍ରଜନନ କ୍ଷମତାକୁ ହ୍ରାସ କରେ । ଖାଦ୍ୟ ନିୟନ୍ତ୍ରଣ, ଚାପ ଓ ନିଦ୍ରାଭାବ ମଧ୍ୟ ପ୍ରଜନନ ସ୍ୱାସ୍ଥ୍ୟରେ ବାଧା ସୃଷ୍ଟି କରେ ।
ସବୁଠାରୁ ଚିନ୍ତାଜନକ ବିପଦ ହେଉଛି ଫିଟନେସ୍ ପାଇଁ ଆନାବୋଲିକ୍ ଷ୍ଟେରଏଡ୍ ବ୍ୟବହାର, ଯାହାକୁ ପୁରୁଷମାନେ ମସଲ୍ ଗ୍ରୋଥ୍ ପାଇଁ ସେବନ କରନ୍ତି । ଏହା ଶରୀରର ପ୍ରାକୃତିକ ହରମୋନ୍ ଉତ୍ପାଦନକୁ ଦମନ କରିଦିଏ । ଏହା ଶୁକ୍ରାଣୁ ସଂଖ୍ୟାକୁ ହ୍ରା କିମ୍ୱା ଶୂନ କରିଦେଇପାରେ । ତେଣୁ ସ୍ୱାସ୍ଥ୍ୟ ବିଶେଷଜ୍ଞଙ୍କ ପରାମର୍ଶ ଅନୁଯାୟୀ, ମଧ୍ୟମ ଫିଟନେସ୍ ରୁଟିନରେ ନିୟୋଜିତ ହେବା ଉଚିତ୍ । ଯାହା ପ୍ରଜନନ ସ୍ୱାସ୍ଥ୍ୟ ପାଇଁ ଉତ୍ତମ । ସର୍ବୋପରି ସନ୍ତାନସନ୍ତତି ଇଚ୍ଛା କରୁଥିବା ପୁରୁଷମାନେ କଠିନ ବ୍ୟାୟାମ ରୁଟିନ୍ ଓ ଅନିୟନ୍ତ୍ରିତ ପରିପୂରକ ସେବନଠାରୁ ଦୂରରେ ରହିବା ସହ ବିଶେଷଜ୍ଞ ଡାକ୍ତରଙ୍କ ସହିତ ପରାମର୍ଶ କରିବା ଉଚିତ୍ ।
