ମୁମ୍ୱାଇ, ୧୩/୦୭: ବଲିଉଡ୍ର କଣ୍ଟ୍ରୋଭର୍ସି କ୍ଵିନ୍ କଙ୍ଗନା ରାଣାୱତ। ଅଭିନୟ ପରେ ରାଜନୀତିରେ ପାଦ ଦେଇଛନ୍ତି। ଏବେ କୁଆଡେ ସେ ରାଜନୀତିକୁ ନେଇ ପଶ୍ଚାତାପ କରୁଛନ୍ତି । ବିଜେପି ସାଂସଦ ତଥା ଅଭିନେତ୍ରୀଙ୍କ ବୟାନକୁ ନେଇ ଏହି ପ୍ରଶ୍ନ ଉଠିଛି । କେବଳ ସେତିକି ନୁହେଁ, ରାଜନୀତିକୁ ନେଇ ସେ ଦେଇଥିବା ଟିପ୍ପଣୀ ମଧ୍ୟ ବେଶ୍ ଚର୍ଚ୍ଚା ସାଉଁଟୁଛି ।
ରାଜନୀତି ଏକ କଷ୍ଟକର ବ୍ୟାପାର । ଏହା ସବୁଠୁ ଅଧିକ ଦୁର୍ବ୍ୟବହାରପୂର୍ଣ୍ଣ ବୃତ୍ତି । ଏକ ସାକ୍ଷାତକାରରେ ଏଭଳି କିଛି ବୟାନ ଦେଇ କଙ୍ଗନା ଚର୍ଚ୍ଚାକୁ ଆସିଛନ୍ତି । କହିଛନ୍ତି କି ରାଜନୀତିରେ ସେ ଖୁସି ନାହାଁନ୍ତି । ଏଥିସହ ଅଭିନେତ୍ରୀ ତଥା ସାଂସଦ ଏକଥା ମଧ୍ୟ କହିଛନ୍ତି ଯେ, ଯେଉଁ ସମୟରେ ସେ ରାଜନୀତିରେ ପାଦ ଦେଲେ ତାଙ୍କୁ ଏହି ଦୁନିଆ କିଛି ଭିନ୍ନ ଲାଗୁଥିଲା । ସାଂସଦ ଭାବେ ୬୦ରୁ ୭୦ଦିନ ଦାୟିତ୍ବ ତୁଲାଇବାକୁ ପଡ଼ିବ ବୋଲି ଟିକେଟ୍ ଦେବା ସମୟରେ ତାଙ୍କୁ କୁହାଯାଇଥିଲା । ଭାବିଥିଲେ ନିଶା ଓ ପେସାକୁ ଏକାଠି ନେଇ କାମ କରିବେ । ରାଜନୀତି ଓ ଅଭିନୟକୁ ଆବଶ୍ୟକ ମୁତାବକ ସମୟ ଦେଇପାରିବେ, କିନ୍ତୁ ବାସ୍ତବରେ ସେଭଳି କିଛି ଦେଖିବାକୁ ମିଳୁନି । ସାଂସଦ ମ୍ୟାଡାମଙ୍କ ଏହି ବୟାନ ଶୁଣିବାକୁ ଯେତିକି ରୋଚକ ଲାଗୁଛି ସେତିକି ପ୍ରଶ୍ନ ମଧ୍ୟ ଉଠିଛି କ’ଣ ପ୍ରକୃତରେ ରାଜନୀତିରେ ଖୁସି ନାହାଁନ୍ତି କି କଙ୍ଗନା।
ନିକଟରେ ବିରୋଧୀ କଙ୍ଗନାଙ୍କୁ ତାଙ୍କ ଅବହେଳା ଦର୍ଶାଇ ଟାର୍ଗେଟ୍ କରିଥିଲେ । ମଣ୍ଡିର ସାଂସଦ ହେବା ସତ୍ତ୍ବେ ବନ୍ୟା ପ୍ରଭାବିତ ଲୋକଙ୍କୁ ନା ଭେଟୁଛନ୍ତି ନା ସାହାଯ୍ୟ କରୁଛନ୍ତି ବୋଲି ହିମାଚଳପ୍ରଦେଶ କଂଗ୍ରେସ ପ୍ରଶ୍ନ କରିଥିଲା । ତେବେ କଙ୍ଗନାଙ୍କ ଉତ୍ତର ବେଶ୍ ତାଜୁବ କରିଥିଲା । ତାଙ୍କ ପାଖରେ ଅନ୍ୟ ନେତାଙ୍କ ପରି ନା କ୍ୟାବିନେଟ୍ ପାହ୍ୟା ଅଛି ନା କୌଣସି ଏନ୍ଜିଓ । ତେଣୁ ସେ ଜନତାଙ୍କୁ ସାହାଯ୍ୟ କରିପାରୁନଥିବା ବୋଲି କହିଥିଲେ । ତେବେ ଜଣେ ସାଂସଦ ଭାବେ ଯାହା ସମ୍ଭବ ସେ କରିବେ ବୋଲି ପ୍ରତିଶ୍ରୁତି ଦେଇଥିଲେ ।
