କୋଲକାତା: ଆରଜି କର ମେଡିକାଲ କଲେଜ ଏବଂ ହସ୍ପିଟାଲରେ ମହିଳା ଟ୍ରେନି ଡାକ୍ତରଙ୍କୁ ଦୁଷ୍କର୍ମ ଓ ହତ୍ୟା ମାମଲାର ମୁଖ୍ୟ ଅଭିଯୁକ୍ତ ସଞ୍ଜୟ ରୟର ପଲିଗ୍ରାଫ୍ ଟେଷ୍ଟକୁ ନେଇ ଚର୍ଚ୍ଚା । ସାଇକୋଲୋଜିକାଲ ଟେଷ୍ଟରେ ଦୋଷ ମାନିଥିବା ସଞ୍ଜୟ ପଲିଗ୍ରାଫ ଟେଷ୍ଟରେ ମନା କରିଦେଇଛି । ଟେଷ୍ଟ ସମୟରେ ସଞ୍ଜୟ ରୟ କହିଛି ଯେ, ‘ମୋତେ ଫସାଇ ଦିଆଯାଇଛି । ମୁଁ ହତ୍ୟା କରିନାହିଁ । ମୁଁ ମୃତଦେହ ଦେଖିବା ପରେ ଦୌଡ଼ି ପଳାଇଥିଲି । ’ 

ସେପଟେ ଡାକ୍ତର ଦୁଷ୍କର୍ମ ଓ ହତ୍ୟା ମାମଲାରେ ସିବିଆଇ ସଞ୍ଜୟ ରୟ ବ୍ୟତୀତ ଦ୍ବିତୀୟ ବ୍ୟକ୍ତିଙ୍କୁ ଗିରଫ କରିପାରି ନାହିଁ । ଘଟଣା ପରଦିନ କୋଲକାତା ପୋଲିସ ହିଁ ସଞ୍ଜୟ ରୟକୁ ଗିରଫ କରିଥିଲା । ତଦନ୍ତ ଦାୟିତ୍ବ ନେବା ପାଖରୁ ସିବିଆଇ ସଞ୍ଜୟ ରୟକୁ ପଚରା ଉଚରା କରୁଛି । ଅଗଷ୍ଟ ୨୫ରେ କୋଲକାତା ପ୍ରେସିଡେନ୍ସି ଜେଲରେ ସଞ୍ଜୟ ରୟର ପଲିଗ୍ରାଫ ଟେଷ୍ଟ କରାଇଥିଲା ସିବିଆଇ । 

ଏହି ସମୟରେ ତାକୁ ମୋଟ ୧୦ଟି ପ୍ରଶ୍ନ ପଚରାଯାଇଥିଲା । ସେମିନାର ହଲରେ ହତ୍ୟା କରିବା ପରେ ତୁମେ କଣ କଲ ବୋଲି ପ୍ରଶ୍ନରେ ସଞ୍ଜୟ ରୟ କହିଛି ଯେ, ‘ମୁଁ ହତ୍ୟା କରିନାହିଁ । ମୁଁ ଶବ ଦେଖିବା ପରେ ସେମିନାର ହଲରୁ ବାହାରକୁ ଦୌଡ଼ି ପଳାଇଥିଲି । ତେବେ ପଲିଗ୍ରାଫ ଟେଷ୍ଟରେ ଦୁଷ୍କର୍ମ ଓ ହତ୍ୟା ମାମଲାରେ ନିଜର ସଂପୃକ୍ତିକୁ ସିଧାସଳଖ ଖାରଜ କରିଦେଇଛି ସଞ୍ଜୟ ରୟ ।