ଭୁବନେଶ୍ୱର,୦୮/୦୯(ମୁକେଶ ପରିଡ଼ା): “ପାନ, ଗୁଆ, ଖଇର, ଗୁଆକାତି, ଆହା କି ସୁନ୍ଦର ରାଜନୀତି ।” ବିଜେଡି ହେଉ କି କଂଗ୍ରେସ କିମ୍ବା ବିଜେପି, ସବୁ ଦଳରେ ମାଳମାଳ ଦାୟାଦ । ଥରୁଟିଏ ଯିଏ ରାଜନୀତି ମୈଦାନକୁ ଓହ୍ଲାଉଛି, ତା’ ପଛକୁ ପଛକୁ ପରିବାରର ପରବର୍ତ୍ତୀ ପିଢ଼ି ବି ଟାଣି ହୋଇ ଆସୁଛନ୍ତି । ଓଡ଼ିଶା ରାଜନୀତିରେ ପରିବାରବାଦ ଏବେ ଟ୍ରେଣ୍ଡ ପାଲଟିଗଲାଣି । ବାପ ପରେ ପୁଅ ନ ହେଲେ ଝିଅ, ସ୍ୱାମୀ ଜାଗାରେ ସ୍ତ୍ରୀ । ପରିବାରରୁ ଲମ୍ବା ଧାଡ଼ି ଲମ୍ବି ପଶିଯାଉଛି ରାଜନୀତି ମଇଦାନକୁ ।
ସବୁ ଯୋଗ୍ୟତାକୁ ମୋଡ଼ି ମକଚି ରାଜନୀତି ମଇଦାନରେ ରାଜ କରୁଛନ୍ତି ଦାୟାଦ । ନେତାଙ୍କ ଦାୟାଦ ପ୍ରେମ ପାଇଁ ଆଗକୁ ବଢ଼ିପାରୁନାହାନ୍ତି ନିଜ ଶିଙ୍ଘରେ ମାଟି ତାଡ଼ି ଆଗକୁ ବଢ଼ୁଥିବା ଯୋଗ୍ୟତା ସମ୍ପନ୍ନ ତୃଣମୂଳ ସ୍ତରର ନେତା । ଦାୟାଦଙ୍କ କ୍ଷମତା, ପତିଆରା ଆଗରେ ଫିକା ପଡ଼ିଯାଉଛି ଯୋଗ୍ୟ ଆଶାୟୀଙ୍କ ବାୟୋ ଡାଟା ଓ ସଂଘର୍ଷ ।
ଯେଉଁ ନେତାଙ୍କ ବୟସ ୬୦ ଡେଉଁଛି, ତାଙ୍କ ଦାୟାଦ ରାଜନୀତି ମଇଦାନ ପାଇଁ ଆଶାୟୀ । ଓଡ଼ିଶା ବିଧାନସଭାରେ ଏବେ ୩୦ ବିଧାୟକ, ପରିବାରବାଦର ପ୍ରତୀକ । ଖାଲି ବିଧାନସଭା ନୁହେଁ, ଲୋକସଭାକୁ ବି ଓଡ଼ିଶା ୫ଜଣ ରାଜନୈତିକ ପରିବାରର ଦାୟାଦଙ୍କୁ ପଠାଇଛି ୨୦୧୯ରେ ।
ତାଲିକା ଏତିକିରେ ସରିଯାଉନି । ଢେର ଲମ୍ବା ରାଜନୈତିକ ଦାୟାଦଙ୍କ ତାଲିକା । ପରାଜିତ ନେତାଙ୍କ ଭିତରେ ବି ୨୦ରୁ ଅଧିକ ପରିବାରବାଦ ଦାୟାଦ ଅଛନ୍ତି । ଆଗାମୀ ନିର୍ବାଚନରେ ଭାଗ୍ୟ ପରୀକ୍ଷା ପାଇଁ ଆହୁରି ୫୦ରୁ ଅଧିକ ଦାୟାଦ ଧାଡ଼ିରେ ଅପେକ୍ଷା କରିଛନ୍ତି । ସେଥିରେ ୩୦ରୁ ଅଧିକ ନବାଗତ । ସେମାନେ ପଞ୍ଚାୟତ ନିର୍ବାଚନରୁ କ୍ଷେତ୍ର ପ୍ରସ୍ତୁତି କାର୍ଯ୍ୟ ବି ଆରମ୍ଭ କରି ଦେଇଛନ୍ତି । ଅପେକ୍ଷା ହାଇକମାଣ୍ଡଙ୍କ ଗ୍ରୀନ ସିଗନାଲକୁ ।
ପୂର୍ବତନ ମୁଖ୍ୟମନ୍ତ୍ରୀ ଜାନକୀ ବଲ୍ଲଭ ପଟ୍ଟନାୟକଙ୍କ ପୁଅ ପୃଥ୍ୱୀବଲ୍ଲଭ ପଟ୍ଟନାୟକ ଏଥର ବେଗୁନିଆ ବୋଲଗଡ଼ରୁ କଂଗ୍ରେସ ପ୍ରାର୍ଥୀ ଭାବେ ନିର୍ବାଚନ ଲଢ଼ିବା ପାଇଁ ପୂରା ଦମ୍ରେ ଲାଗି ପଡ଼ିଛନ୍ତି ।
ଲୁଲୁ ମହାପାତ୍ରଙ୍କ ଝିଅ ଉପାସନା ମହାପାତ୍ର ଏଥର ନିଜେ ନିର୍ବାଚନ ଲଢ଼ିବା ଏକପ୍ରକାର ଥୟ । ଲୁଲୁଙ୍କ ସାନ ଭାଇ ବିଧାୟକ ଲଳିତେନ୍ଦୁ ବିଦ୍ୟାଧର ମହାପାତ୍ର ନିଜେ ନ ଲଢ଼ି ବ୍ରହ୍ମଗିରି ଆସନ ଝିଆରୀ ଉପାସନାଙ୍କ ପାଇଁ ଛାଡ଼ିବେ ବୋଲି ଚର୍ଚ୍ଚା ହେଉଛି । ସେହିପରି କଂଗ୍ରେସର ବରିଷ୍ଠ ନେତା ବିଧାୟକ ସୁର ରାଉତରାୟଙ୍କ ପୁଅ ମନ୍ମଥ ରାଉତରାୟ ଏଥର ଜଟଣୀରୁ ନିର୍ବାଚନ ଲଢ଼ିବେ । ହେଲେ କଂଗ୍ରେସରୁ ଲଢ଼ିବେନି ମନ୍ମଥ । ସେ ବିଜେଡି ଟିକଟ ପାଇଁ ଉଦ୍ୟମ ଚଳାଇଥିବା କୁହାଯାଉଛି ।
ଅନ୍ୟମାନଙ୍କ ମଧ୍ୟରେ ବରିଷ୍ଠ ବିଜେଡି ବିଧାୟକ ପ୍ରଫୁଲ୍ଲ ସାମଲ, ବଦ୍ରି ନାରାୟଣ ପାତ୍ର, ଅନନ୍ତ ଦାସ, ନିତ୍ୟାନନ୍ଦ ସାହୁ ପ୍ରମୁଖ ନିଜ ପୁଅ କିମ୍ବା ପରିବାର ସଦସ୍ୟକୁ ଟିକଟ ଦେବାକୁ ଲବି ଚଳାଇଛନ୍ତି ।
ପାଟକୁରାରୁ ଦିବଂଗତ ବେଦପ୍ରକାଶ ଅଗ୍ରୱାଲଙ୍କ ପରେ ତାଙ୍କ ପତ୍ନୀ ସାବିତ୍ରୀ ଅଗ୍ରୱାଲ ଗତ ନିର୍ବାଚନ ଲଢ଼ି ବିଧାୟକ ହୋଇଥିଲେ । ଏଥର ସାବିତ୍ରୀ ନିଜ ପୁଅ ପାଇଁ ବାଟ ଛାଡ଼ିବେ । ଅପରପକ୍ଷରେ ବରିଷ୍ଠ ନେତା ବିଜୟ ମହାପାତ୍ରଙ୍କ ପୁଅ ଅରବିନ୍ଦ ମହାପାତ୍ର ବି ରାଜନୀତି ମଇଦାନକୁ ପଦାର୍ପଣ କରିବା ଅପେକ୍ଷାରେ ଅଛନ୍ତି ।
ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ୱାଇଁଙ୍କ ପୁଅଙ୍କ ସକ୍ରିୟତାରୁ ସେ ନିର୍ବାଚନ ଲଢ଼ିବା ଚର୍ଚ୍ଚା ବଢ଼ିଛି । ମନ୍ତ୍ରୀ ରାଜେନ୍ଦ୍ର ଢୋଲକିଆ, ବରିଷ୍ଠ ବିଧାୟକ ଅମର ପ୍ରସାଦ ଶତପଥୀ, ଅନନ୍ତ ଦାସ, ବିରୋଧୀ ଦଳ ନେତା ଜୟନାରାୟଣ ମିଶ୍ର ମଧ୍ୟ ନିଜ ଦାୟାଦଙ୍କ ପାଇଁ କ୍ଷେତ୍ର ଛାଡ଼ିପାରନ୍ତି ବୋଲି ବିଭିନ୍ନ ମହଲରେ ଚର୍ଚ୍ଚା ହେଉଛି ।
କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ର ନିଜ ଆଡ଼ୁ ସ୍ପଷ୍ଟ କରିଛନ୍ତି, ଆଗାମୀ ନିର୍ବାଚନ ସେ ଲଢ଼ିବେନି । ନରସିଂହଙ୍କ ବୟସ ୮୦ ଟପିଥିବାବେଳେ ଆଗାମୀ ନିର୍ବାଚନରେ ତାଙ୍କ ସାନ ପୁଅ ଅମରେନ୍ଦ୍ର ମିଶ୍ର ବଲାଙ୍ଗିର ବିଧାନସଭା ଆସନରୁ ଲଢ଼ିପାରନ୍ତି । ଗତ ୨୦୧୯ ନିର୍ବାଚନରେ ତାଙ୍କ ବଡ଼ ପୁଅ ସମରେନ୍ଦ୍ର ମିଶ୍ର ସାଂସଦ ପ୍ରାର୍ଥୀ ହୋଇ ହାରିଥିଲେ । ଏଥର ତାଙ୍କର ଦୁଇ ପୁଅ ନିର୍ବାଚନ ଲଢ଼ିପାରନ୍ତି ।
କଂଗ୍ରେସ ବିଧାୟକ ସନ୍ତୋଷ ସିଂ ସାଲୁଜାଙ୍କ ପୁଅ ମଧ୍ୟ ନିର୍ବାଚନ ଲଢ଼ିବା ସମ୍ଭାବନା ଅଛି । ପୂର୍ବତନ ପିସିସି ସଭାପତି ଜୟଦେବ ଜେନାଙ୍କ ବଡ଼ ବୋହୂ କିମ୍ବା ସାନ ପୁଅ ମନୋଜ ଜେନା ନିର୍ବାଚନ ମଇଦାନକୁ ଓହ୍ଲାଇପାରନ୍ତି । ପୂର୍ବତନ ପିସିସି ସଭାପତି ନିରଞ୍ଜନ ପଟ୍ଟନାୟକଙ୍କ ପୁଅ ନବଜ୍ୟୋତି ପଟ୍ଟନାୟକ ପୁଣି ଥରେ ବାଲେଶ୍ୱରରୁ ଭାଗ୍ୟ ପରୀକ୍ଷା କରିବେ । ବରିଷ୍ଠ କଂଗ୍ରେସ ନେତା ଭକ୍ତ ଦାସଙ୍କ ପୁଅ ସାଗର ଦାସ ଏଥର ବି ନିର୍ବାଚନ ପାଇଁ ପ୍ରସ୍ତୁତ ଅଛନ୍ତି ।
ବରିଷ୍ଠ କଂଗ୍ରେସ ନେତା ଅନନ୍ତ ସେଠୀଙ୍କ ଝିଅ ଗତ ନିର୍ବାଚନ ଲଢ଼ିଥିବାବେଳେ ଏଥର ପୁଅ ବି ଆସୁଛନ୍ତି ମଇଦାନକୁ । ପୂର୍ବତନ ମୁଖ୍ୟମନ୍ତ୍ରୀ ଦିବଂଗତ ହେମାନନ୍ଦ ବିଶ୍ୱାଳଙ୍କ ଦୁଇ ଝିଅ ଆଗାମୀ ନିର୍ବାଚନରେ ପ୍ରାର୍ଥୀ ହେବାକୁ ପ୍ରସ୍ତୁତ ଅଛନ୍ତି । ପୂର୍ବତନ ମୁଖ୍ୟମନ୍ତ୍ରୀ ଗିରିଧର ଗମାଙ୍ଗଙ୍କ ପୁଅ ଶିଶିର ମଧ୍ୟ ପ୍ରସ୍ତୁତି ଚଳାଇଛନ୍ତି । ଦିବଂଗତ ସାଂସଦ ହେମେନ୍ଦ୍ର ସିଂଙ୍କ ପତ୍ନୀ ପ୍ରତ୍ୟୁଷା ରାଜେଶ୍ୱରୀ ନୟାଗଡ଼ରୁ ବିଧାୟକ ହେବାକୁ ଜୋରଦାର ଉଦ୍ୟମ ଚଳାଇଛନ୍ତି । ଦିବଂଗତ କଂଗ୍ରେସ ନେତ୍ରୀ ସନ୍ଧ୍ୟା ମହାପାତ୍ରଙ୍କ ଝିଅ ସରିତା ସାହୁ ମଧ୍ୟ ନୟାଗଡ଼ ଆସନ ଉପରେ ନଜର ରଖିଛନ୍ତି ।
ବଲାଙ୍ଗୀରରେ ଏଥର ବି ବିଜେଡି ଓ ବିଜେପିର ରାଜପରିବାରରୁ ଡବଲ ଲେଖାଏଁ ପ୍ରାର୍ଥୀ ଓହ୍ଲାଇବେ । ଅନଙ୍ଗ ଉଦୟ ସିଂହଦେଓଙ୍କ ଦୁଇ ପୁଅ ବିଜେଡିରୁ ଓ ବିଜେପିରୁ କନକ ବର୍ଦ୍ଧନ ସିଂହଦେଓ ଏବଂ ତାଙ୍କ ପତ୍ନୀ ନିର୍ବାଚନ ଲଢ଼ିବା ଏକପ୍ରକାର ଚୂଡ଼ାନ୍ତ ।
ଯଦି ଆଗୁଆ ନିର୍ବାଚନ ନ ହୁଏ, ତେବେ ଓଡ଼ିଶା ଖୁବଶୀଘ୍ର ଆଉ ଏକ ଉପନିର୍ବାଚନ ଦେଖିବ ଦିଗପହଣ୍ଡିରେ । ଦିବଂଗତ ସୂର୍ଯ୍ୟ ପାତ୍ରଙ୍କ ଅବର୍ତ୍ତମାନରେ ତାଙ୍କ ପୁଅ ବିପ୍ଳବ ପାତ୍ରଙ୍କ ରାଜନୈତିକ ମଇଦାନକୁ ଓହ୍ଲାଇବା ଏକପ୍ରକାର ନିଶ୍ଚିତ ।
ନିକଟରେ ଯେତେ ଉପନିର୍ବାଚନ ହୋଇଛି, ସବୁଠି ପରିବାରର ଦାୟାଦ ଓହ୍ଲାଇଛନ୍ତି ମଇଦାନରେ । ପିପିଲି, ବାଲେଶ୍ୱର, ତିର୍ତ୍ତୋଲ, ବ୍ରଜରାଜନଗର, ଧାମନଗର, ପଦ୍ମପୁର ଓ ଝାରସୁଗୁଡ଼ାରେ ଦିବଂଗତ ବିଧାୟକଙ୍କ ପରିବାର ସଦସ୍ୟ ଉପନିର୍ବାଚନ ଲଢ଼ିଲେ । ବାଲେଶ୍ୱରକୁ ଛାଡ଼ିଲେ ବାକି ସବୁଠି ଦିବଂଗତ ବିଧାୟକଙ୍କ ଦାୟାଦ ହିଁ ଉପନିର୍ବାଚନ ଜିତିଛନ୍ତି ।
୨୦୧୯ ନିର୍ବାଚନରୁ ଏଯାବତ୍ ବହୁ ନେତାଙ୍କ ସନ୍ତାନ ଓ ପରିବାର ସଦସ୍ୟ ରାଜନୀତିରେ ସଫଳ ପ୍ରବେଶ କରିଛନ୍ତି । ପ୍ରଭାତ ତ୍ରିପାଠୀଙ୍କ ପୁଅ ଦେବୀ ତ୍ରିପାଠୀ, ପ୍ରଭାତ ବିଶ୍ୱାଳଙ୍କ ପୁଅ ସୌଭିକ ବିଶ୍ୱାଳ, ବିଜୟଶ୍ରୀ ରାଉତରାୟଙ୍କ ପୁଅ ବିଷ୍ଣୁବ୍ରତ ରାଉତରାୟ, ଦାମ ରାଉତଙ୍କ ପୁଅ ସମ୍ବିତ ରାଉତରାୟ ୨୦୧୯ରେ ବିଧାୟକ ହୋଇଥିଲେ । ଉପନିର୍ବାଚନରେ ବିଷ୍ଣୁ ଦାସଙ୍କ ପୁଅ ବିଜୟ ଶଙ୍କର, ବିଷ୍ଣୁ ସେଠୀଙ୍କ ପୁଅ ସୁରଜ ସୂର୍ଯ୍ୟବଂଶୀ, ବିଜୟ ବରିହାଙ୍କ ଝିଅ ବର୍ଷା ସିଂ ବରିହା, ନବ ଦାସଙ୍କ ଝିଅ ଦୀପାଳି ଦାସ, ପ୍ରଦୀପ ମହାରଥୀଙ୍କ ପୁଅ ରୁଦ୍ର ମହାରଥୀ, କିଶୋର ମହାନ୍ତିଙ୍କ ପତ୍ନୀ ଅଳକା ମହାନ୍ତି ବିଜୟୀ ହୋଇ ବିଧାୟକ ହୋଇଛନ୍ତି ।
“ବାପାଙ୍କ/ସ୍ୱାମୀଙ୍କ ଅଧୁରା କାମକୁ ସାକାର କରିବି” । ଏହି ଧାଡ଼ିଟିଏ କହି ରାଜନୀତି ମଇଦାନକୁ କୁଦି ପଡ଼ୁଛନ୍ତି ଦାୟାଦ । ଭାବବିହ୍ୱୋଳ ଭୋଟର ବର୍ଷା କରି ଦେଉଛନ୍ତି ସମବେଦନା ଭୋଟ । ତା’ ପରେ ଚାଲିଲା ପରିବାରବାଦର ରାଜନୀତି ଗାଡ଼ି । ବାପ ପରେ ପୁଅ...ଝିଅ, ପତ୍ନୀ, ଭାଇ, ଭଉଣୀ, ବୋହୂ... । ସମ୍ପର୍କର ଲମ୍ବା ଧାଡ଼ି ଲମ୍ବି ପଶିଯାଉଛି ରାଜନୀତି ମଇଦାନକୁ ।