ନୂଆଦିଲ୍ଲୀ, ୨।୮: ଏବେ ଖେଳାଳି କରିପାରିବେନି ଏଭଳି ବିଜ୍ଞାପନ । ବିଡ଼ି, ସିଗାରେଟ୍ ଏବଂ ମଦ ବିଜ୍ଞାପନ କରିବାକୁ ଖେଳାଳିଙ୍କୁ ମନା । କେବଳ ଏତିକି ନୁହେଁ, ବିଜ୍ଞାପନରୁ ନିଜକୁ ଦୂରେଇ ରଖିବାକୁ ଖେଳାଳିଙ୍କୁ କରିବାକୁ ହେବ ପ୍ରତିଜ୍ଞା । ଏହି ବିଜ୍ଞାପନ କରିବାକୁ ଖେଳାଳିଙ୍କୁ ବାରଣ କରିଛନ୍ତି ସରକାର । BCCI ଖେଳାଳିଙ୍କଠାରୁ ସତ୍ୟପାଠ ନେଉ ବୋଲି ସରକାରଙ୍କ ନିର୍ଦ୍ଦେଶ ।  

ଭାରତୀୟ ଖେଳାଳିମାନେ ବିଭିନ୍ନ ସାମଗ୍ରୀର ବିଜ୍ଞାପନ କରୁଥିବାର ଆମେ ଦେଖିଛେ । ଏଥିମଧ୍ୟରୁ କିଛି ଖେଳାଳି ବର୍ତ୍ତମାନ ତମାଖୁ, ମାଦକଦ୍ରବ୍ୟ ଭଳି ବିଜ୍ଞାପନ କରୁଛନ୍ତି । ଏହା ଅତ୍ୟନ୍ତ ନୈରାଶ୍ୟଜନକ ବୋଲି କହିଛନ୍ତି କେନ୍ଦ୍ର ସରକାର । କିନ୍ତୁ, ଏବେ ଦେଶର କୌଣସି ଖେଳାଳି ମଦ୍ୟପାନ କିମ୍ବା ଧୂମ୍ରପାନର ବିଜ୍ଞାପନରେ ଆଉ ଦେଖାଯିବେ ନାହିଁ । ସ୍ୱାସ୍ଥ୍ୟ ବିଭାଗର ମହାନିର୍ଦ୍ଦେଶକ ଡକ୍ଟର ଅତୁଲ ଗୋୟଲ ବିସିସିଆଇ ଏବଂ ସାଇକୁ ଚିଠି ଲେଖି ଖେଳାଳିଙ୍କଠାରୁ ତୁରନ୍ତ ସତ୍ୟପାଠ ନେବାକୁ କହିଛନ୍ତି । ଏହି ପତ୍ରରେ ଡକ୍ଟର ଗୋୟଲ ଲେଖିଛନ୍ତି ଯେ ଖେଳାଳି, ବିଶେଷକରି କ୍ରିକେଟରମାନେ ଦେଶର ଯୁବ ଜନସଂଖ୍ୟା ପାଇଁ ଆଦର୍ଶ ହୋଇଥାନ୍ତି । ଏହା ଯୁବକମାନଙ୍କୁ ଏକ ସୁସ୍ଥ ଜୀବନଶୈଳୀ ପାଇଁ ପ୍ରେରଣା ଯୋଗାଇପାରେ । 

ତଥାପି ଦୁର୍ଭାଗ୍ୟଜନକ ଯେ, ଖେଳ ଜଗତର ଷ୍ଟାରମାନେ ପ୍ରାୟତଃ ସିଗାରେଟ୍, ବିଡ଼ି କିମ୍ବା ପାନ ମସଲା ବିଜ୍ଞାପନ କରୁଥିବାର ଦେଖାଯାଉଛି । ସ୍ୱାସ୍ଥ୍ୟ ମହାନିର୍ଦ୍ଦେଶକ କ୍ରିକେଟ୍ ବୋର୍ଡ ଅଫ୍ ଇଣ୍ଡିଆ (ବିସିସିଆଇ)ର ସଭାପତି ରୋଜର ବିନି ଦେଶର ଜନସଂଖ୍ୟାକୁ ସୁସ୍ଥ ରଖିବା ପାଇଁ ସରକାରଙ୍କୁ ସମର୍ଥନ କରିବାକୁ କହିଛନ୍ତି । ଆଇପିଏଲ କିମ୍ବା ଅନ୍ୟ କ୍ରିକେଟ୍ ଟୁର୍ଣ୍ଣାମେଣ୍ଟ ସମୟରେ ଏଭଳି ବିଜ୍ଞାପନ ପ୍ରସାର ନ କରାଯାଉ ବୋଲି ସେ ଆବେଦନ କରିଛନ୍ତି । ଏହି ବିଜ୍ଞାପନରୁ ଖେଳାଳୀଙ୍କୁ ହଟାଇବା ପାଇଁ ତୁରନ୍ତ ପଦକ୍ଷେପ ଗ୍ରହଣ କରାଯିବା ଉଚିତ୍ । ଡକ୍ଟର ଗୋୟଲ ପରାମର୍ଶ ଦେଇଛନ୍ତି ଯେ, ବିସିସିଆଇ ଖେଳାଳିଙ୍କଠାରୁ ଏକ ସତ୍ୟପାଠ ନେଇପାରେ, ଯେଉଁଥିରେ ସେ ଏହି ବିଜ୍ଞାପନରୁ ନିଜକୁ ଦୂରେଇ ରଖିବାକୁ ପ୍ରତିଜ୍ଞା କରିବେ । ସ୍ପୋର୍ଟସ୍ ଅଥରିଟି ଅଫ୍ ଇଣ୍ଡିଆ (ସାଇ) ମହାନିର୍ଦ୍ଦେଶକ ସନ୍ଦୀପ ପ୍ରଧାନଙ୍କୁ ମଧ୍ୟ ଏ ସମ୍ପର୍କିତ ସମାନ ଚିଠି ଲେଖାଯାଇଛି ।