ଲିପ୍ଜିଗ୍,୧୯/୦୬ : ମାତ୍ର ୭ ମିନିଟ୍ର ବ୍ୟବଧାନ । ଏକ ଚିତ୍ତାକର୍ଷକ ବିଜୟରୁ ବଞ୍ଚିତ ହୋଇଥିଲା ଚେକ୍ ଗଣରାଜ୍ୟ । କିଛି କ୍ଷଣ ମଧ୍ୟରେ ବିଜୟ ସ୍ୱପ୍ନ ମଉଳି ଯାଇଥିଲା । ତାରକା ଖଚିତ ଶକ୍ତିଶାଳୀ ପର୍ତ୍ତୁଗାଲ୍ ବିପକ୍ଷରେ ଅଗ୍ରଣୀ ହାସଲ କରିବା ପରେ ଚେକ୍ ଗଣରାଜ୍ୟ ଉତ୍ସାହକୁ କାବୁ କରିପାରି ନଥିଲା । ଏକ ଛୋଟ ତ୍ରୁଟିରୁ ଆତ୍ମଘାତୀ ଗୋଲ କରିବସିଥିଲେ ରବିନ ରାନାକ୍ । ସ୍ଥିତି ବରାବର ହେବା ପରେ ଚେକ୍ ଗଣରାଜ୍ୟ ଲୟ ହରାଇ ବସିଥିଲା । ପର୍ତ୍ତୁଗାଲ ଏକ ଅପ୍ରତ୍ୟାଶିତ ପରାଜୟରୁ ବର୍ତ୍ତିବା ପରେ ସବୁ ଶକ୍ତି ଲଗାଇ ଇନ୍ଜ୍ୟୁରୀ ଟାଇମ୍ରେ ଏକ ଗୋଲ୍ କରି ୨-୧ରେ ବିଜୟୀ ହୋଇଥିଲା । ଲିପ୍ଜିଗ୍ରେ ଅନୁଷ୍ଠିତ ଗ୍ରୁପ୍ ଏଫ୍ର ଏହି ମ୍ୟାଚ୍ ପୂର୍ବରୁ ପର୍ତ୍ତୁଗାଲ ବିଜୟୀ ହେବ ବୋଲି ପୂର୍ବାନୁମାନ କରାଯାଉଥିଲା । ରୋନାଲ୍ଡୋ, ବ୍ରୁନୋ, ପେପେ, ରୁବେନ ଡାୟାସଙ୍କ ଭଳି ବହୁ ଲୋକପ୍ରିୟ ଖେଳାଳିଙ୍କୁ ନେଇ ଗଠିତ ପର୍ତ୍ତୁଗାଲ୍ ଦଳ ଅସଲରେ ଦକ୍ଷତା ମୁତାବକ ପ୍ରଦର୍ଶନ କରିପାରି ନଥିଲା ।
ମ୍ୟାଚ୍ ଆରମ୍ଭରୁ ଶେଷ ପର୍ଯ୍ୟନ୍ତ ଆକ୍ରମଣ କରିଥିଲେ ହେଁ ଚେକ୍ ଗଣରାଜ୍ୟର ଡିଫେନ୍ସ ଲାଇନ୍କୁ ଅତିକ୍ରମ କରିବାରେ ପର୍ତ୍ତୁଗାଲ୍ ବିଫଳ ହୋଇଥିଲା । ପ୍ରଥମାର୍ଦ୍ଧ ଗୋଲ ଶୂନ୍ୟ ରହିବା ପରେ ଦ୍ୱିତୀୟାର୍ଦ୍ଧରେ ଘମା ଘୋଟ ଲଢେଇ ହୋଇଥିଲା । ୬୨ତମ ମିନିଟ୍ରେ ଚେକ୍ ଗଣରାଜ୍ୟ ଗୋଲ୍ ଖାତା ଖୋଲିଥିଲା । ଦଳ ପକ୍ଷରୁ ଲୁକାସ ପ୍ରୋଭୋର୍ଡ ଏହି ଗୋଲ୍ କରିଥିଲେ । ମାତ୍ର ୬୯ତମ ମିନିଟ୍ରେ ପର୍ତ୍ତୁଗାଲର ଭିଟିହ୍ନାଙ୍କୁ ଅଟକାଇବାକୁ ଯାଇ ରବିନ ରାନାକ ନିୟନ୍ତ୍ରଣ ହରାଇଥିଲେ ଓ ବଲ୍ଟି ନିଜ ଗୋଲ ପୋଷ୍ଟକୁ ଚାଲିଯାଇଥିଲା । ସ୍ଥିତି ବରାବର ହେବା ପରେ ପର୍ତ୍ତୁଗାଲ୍ ମନୋବଳ ଫେରିପାଇଥିଲା । ଚେକ୍ ଗଣରାଜ୍ୟ କଡ଼ା ଟକ୍କର ଦେଇଥିଲେ ହେଁ ଆଉ ଗୋଲ୍ କରିପାରି ନଥିଲା । ୯୦ତମ ମିନିଟ୍ରେ ବଦଳ ଖେଳାଳି ଭାବେ ଓହ୍ଲାଇଥିବା ଫ୍ରାନ୍ସିସ୍କୋ କନ୍ସେସିଓ ୯୦୍ମ୨ତମ ମିନିଟ୍ରେ ଗୋଲ୍ କରି ପର୍ତ୍ତୁଗାଲ୍କୁ ବିଜୟୀ କରାଇଥିଲେ ।
