ଅଯୋଧ୍ୟା,୧୫/୦୬: ଉତ୍ତରପ୍ରଦେଶର ଅଯୋଧ୍ୟାରେ ଥିବା ପ୍ରସିଦ୍ଧ ରାମମନ୍ଦିରକୁ ବୋମାରେ ଉଡ଼ାଇଦେବାକୁ ଆତଙ୍କୀ ସଙ୍ଗଠନ ଜୈସ୍‌-ଇ-ମହମ୍ମଦ  ଧମକ ଦେଇଛି । ଫଳରେ ଅଯୋଧ୍ୟାରେ ହାଇଆଲର୍ଟ ଜାରି  କରାଯାଇଛି । ରାମମନ୍ଦିରର ସୁରକ୍ଷା ବଢ଼ାଇ ଦିଆଯାଇଥିଲା  ବେଳେ ମହର୍ଷି ବାଲ୍ମିକୀ ବିମାନବନ୍ଦର ଓ ଅନ୍ୟାନ୍ୟ  ସମ୍ବେଦନଶୀଳ ସ୍ଥାନରେ କଡ଼ା ସୁରକ୍ଷା ବ୍ୟବସ୍ଥା ଗ୍ରହଣ  କରାଯାଇଛି । ବିଭିନ୍ନ ସ୍ଥାନରେ ବହୁସଂଖ୍ୟକ ସୁରକ୍ଷା  କର୍ମୀଙ୍କୁ ମୁତୟନ କରାଯାଇଛି । ଏସ୍‌ଏସ୍‌ପି ରାଜକରଣ  ନାୟାର ବିଭିନ୍ନ ଅଞ୍ଚଳ ବୁଲି ସୁରକ୍ଷା ବ୍ୟବସ୍ଥାର ତଦାରଖ କରିଛନ୍ତି । ଆମୀର ନାମକ ଜଣେ ଜୈସ୍‌ ଆତଙ୍କୀ ଅଡିଓ  ଜାରି କରି ଏହି ଧମକ ଦେଇଛି । ସେଥିରେ ସେ କହିଛି  କି ଅଯୋଧ୍ୟାରେ ମସ୍‌ଜିଦ ଭଙ୍ଗାଯାଇ ମନ୍ଦିର ଗଢ଼ାଯାଇଛି ।  ବର୍ତ୍ତମାନ ମନ୍ଦିର ଭାଙ୍ଗିବାକୁ ପଡିବ । ଆମର ୩ ଜଣ ସାଥୀ  ସେଠାରେ ସହିଦ୍‌ ହୋଇଛନ୍ତି । ବର୍ତ୍ତମାନ ରାମ ମନ୍ଦିରକୁ  ବୋମାରେ ଉଡାଇ ଦିଆଯିବ । ଏହି ଅଡିଓ ମିଳିବା ପରେ  ସୁରକ୍ଷାକର୍ମୀ ହାଇଆଲର୍ଟରେ ଅଛନ୍ତି । ଏହା ପୂର୍ବରୁ ୨୦୦୫ରେ ଅଯୋଧ୍ୟାରେ ଆତଙ୍କୀ ଆକ୍ରମଣ ହୋଇଥିଲା ।