ପାଟନା : ଚାକିରି ବଦଳରେ ଜମି ଦୁର୍ନୀତି ମାମଲାରେ ଆରଜେଡି ମୁଖ୍ୟ ଲାଲୁ ପ୍ରସାଦ ଯାଦବଙ୍କୁ ଇଡିର ଘେରାଉ। ୧୦ ଘଣ୍ଟାର ଜେରା ପରେ ଇଡି(ପ୍ରବର୍ତ୍ତନ କାର୍ଯ୍ୟାଳୟ)ର ଅଫିସରୁ ବାହାରିଲେ ଲାଲୁ। ଇଡିର ସ୍ୱତନ୍ତ୍ର ଟିମ୍ ପାଟନାର ଗାନ୍ଧୀ ମୈଦାନ ଅଞ୍ଚଳରେ ଥିବା ଜୋନାଲ କାର୍ଯ୍ୟାଳୟରେ ତାଙ୍କୁ ଜେରା କରାଯାଇଛି।
ସୋମବାର ସକାଳ ସମୟ ପାଖାପାଖି ୧୧.୧୫ରେ ଲାଲୁ ପ୍ରସାଦ ନିଜର ବଡ଼ ଝିଅ ମୀସା ଭାରତୀଙ୍କ ସହ ଇଡି କାର୍ଯ୍ୟାଳୟରେ ପହଞ୍ଚି ଥିଲେ। ଏହାପରେ ତାଙ୍କୁ କାର୍ଯ୍ୟାଳୟର ଦ୍ୱିତୀୟ ମହଲାକୁ ନିଆଯାଇଥିଲା।ଏଠାରେ ଆରମ୍ଭ ହୋଇଥିଲା ପଚରାପଚରି। ରାତି ୯ଟାରେ ଲାଲୁ ଇଡି ଅଫିସରୁ ବାହାରିଲେ। ଏହି ମାମଲାରେ ପୂର୍ବତନ ଉପ ମୁଖମନ୍ତ୍ରୀ ତେଜସ୍ୱୀ ପ୍ରସାଦ ଯାଦବଙ୍କୁ ମଙ୍ଗଳବାର ଇଡି ପଚରାପଚରି କରିବ।
ପଚରାପଚରି ପାଇଁ ଦିଲ୍ଲୀ ଇଡି ମୁଖ୍ୟାଳୟରୁ ପାଖାପାଖି ୧୨ ଜଣିଆ ଅଧିକାରୀଙ୍କ ସ୍ୱତନ୍ତ୍ର ଟିମ୍ ପାଟନା ଆସିଛି। ଯେଉଁଥିରେ କେସ୍ର ଅନୁସନ୍ଧାନ ଅଧିକାରୀଙ୍କ ସମେତ ଅନ୍ୟମାନେ ସାମିଲ ଅଛନ୍ତି। ଜେରାର ପୂରା ପ୍ରକ୍ରିୟା ବିଷୟରେ ଅଫିସିଆଲି ଭାବେ କୌଣସି ସୂଚନା ଦିଆଯାଇ ନାହିଁ।
ସୂତ୍ରାନୁସାରେ ,ତତ୍କାଳୀନ ରେଳମନ୍ତ୍ରୀ ଲାଲୁ ପ୍ରସାଦଙ୍କ କାର୍ଯ୍ୟକାଳ ୨୦୦୪ରୁ ୨୦୦୯ ମଧ୍ୟରେ ଚାକିରି ବଦଳରେ ଜମି ମାମଲା ସହ ଜଡ଼ିତ ୫୦ରୁ ଅଧିକ ପ୍ରଶ୍ନ ପଚରାଯାଇଛି।