ଭୁବନେଶ୍ୱର, ୦୬/୦୮: ସିଗାରେଟ ପଇସା ପାଇଁ ଜଣେ  ଯୁବକଙ୍କୁ ବାଡ଼େଇ ଗୋଡ଼ ଭାଙ୍ଗିଦେବା ଅଭିଯୋଗରେ ଖଣ୍ଡଗିରି ଥାନା ପୁଲିସ ଦୋକାନୀଙ୍କୁ ଗିରଫ କରିଛି । ଗିରଫ ଦୋକାନୀ ହେଲେ ପାତ୍ରପଡ଼ାର ସମୀର କୁମାର ପରିଡ଼ା(୨୪) । ଏହି  ଆକ୍ରମଣରେ ସଂପୃକ୍ତ ସମୀରଙ୍କ ସହଯୋଗୀମାନେ ଫେରାର୍‌  ହୋଇ ଯାଇଛନ୍ତି । 

ପୁଲିସ ସୂଚନା ଅନୁଯାୟୀ, ଅକ୍ଷୟ କୁମାର  ମହାପାତ୍ର ନାମକ ଜଣେ ଯୁବକ ୨ ତାରିଖ ସନ୍ଧ୍ୟାରେ ପାତ୍ରପଡ଼ା  କୋଲକାତା ବଜାର ନିକଟରେ ଥିବା ସମୀରଙ୍କ ଦୋକାନକୁ  ଯାଇଥିଲେ । ତାଙ୍କ ଠାରୁ ଏକ ସିଗାରେଟ୍‌ କିଣିଥିଲେ । ହେଲେ  ସିଗାରେଟ୍‌ ପଇସା ଫୋନ୍‌ ପେ’ରେ ଦେବାକୁ ଉଦ୍ୟମ କରୁଥିବା  ବେଳେ ଅକ୍ଷୟଙ୍କ ମୋବାଇଲ ବନ୍ଦ ହୋଇ ଯାଇଥିଲା । ତେଣୁ ସେ  ସିଗାରେଟ୍‌ ବାବଦରେ ପଇସା ସମୀରଙ୍କୁ ଦେଇ ପାରି ନଥିଲେ । ଏହାକୁ ନେଇ ଉଭୟଙ୍କ ମଧ୍ୟରେ ଯୁକ୍ତିତର୍କ ହୋଇଥିଲା । ସମୀର  ସଙ୍ଗେ ସଙ୍ଗେ ତାଙ୍କର କିଛି ସହଯୋଗୀଙ୍କୁ ଡ଼କାଇ ଦେଇଥିଲେ ।  ସମସ୍ତେ ମିଶି ଅକ୍ଷୟଙ୍କୁ ବାଡ଼େଇ ବାଡ଼େଇ ତାଙ୍କ ଗୋଡ଼ ଭାଙ୍ଗି  ଦେଇଥିଲେ । ସେ ରକ୍ତାକ୍ତ ହୋଇ ତଳେ ପଡ଼ିଯିବା ପରେ ଆକ୍ରମଣକାରୀମାନେ ସେଠାରୁ ପଳାଇଥିଲେ । ଖବରପାଇ ପିସିଆର  ପୁଲିସ ଘଟଣାସ୍ଥଳରେ ପହଞ୍ଚି ଅକ୍ଷୟଙ୍କୁ ଗୁରୁତର ଅବସ୍ଥାରେ  ଉଦ୍ଧାର କରି ହସ୍ପିଟାଲରେ ଭର୍ତ୍ତି କରିଥିଲା । ଅକ୍ଷୟଙ୍କ ଅଭିଯୋଗକୁ  ଭିତ୍ତିକରି ଖଣ୍ଡଗିରି ଥାନା ପୁଲିସ ଏକ ମାମଲା ରୁଜୁ କରିଥିଲା ।  ଆଜି ପୁଲିସ ଦୋକାନୀ ସମୀରଙ୍କୁ ଗିରଫ କରି ଅଦାଲତ ଚାଲାଣ  କରିଥିଲା । ଜାମିନ ନାମଞ୍ଜୁର ହେବାରୁ ତାଙ୍କୁ ଝାରପଡ଼ାସ୍ଥିତ ସ୍ୱତନ୍ତ୍ର  କାରଗାରକୁ ପଠାଇ ଦିଆଯାଇଛି । ଏହି ଆକ୍ରମଣରେ ସଂପୃକ୍ତ  ଅନ୍ୟମାନେ ଏବେ ଫେରାର୍‌ ଅଛନ୍ତି । ସେମାନଙ୍କୁ ଗିରଫ କରିବା  ପାଇଁ ପୁଲିସ ବିଭିନ୍ନ ସ୍ଥାନରେ ଚଢ଼ଉ ଜାରି ରଖିଛି ।