ନୂଆଦିଲ୍ଲୀ,୦୮/୦୭: ଭାରତୀୟ କ୍ରିକେଟରେ ଯେବେ 'ଦାଦା' କୁହାଯାଏ, କେବଳ ଗୋଟିଏ ନାମ ଆସେ ସେ ହେଉଛନ୍ତି ସୌରଭ ଗାଙ୍ଗୁଲି । ଭାରତର ପୂର୍ବତନ ଅଧିନାୟକ, ଚମତ୍କାର ବ୍ୟାଟ୍ସମ୍ୟାନ, ନିର୍ଭୀକ କ୍ୟାପ୍ଟେନ୍ ସୌରଭ ଗାଙ୍ଗୁଲିଙ୍କର ଆଜି ଜନ୍ମଦିନ । ୫୩ ବର୍ଷରେ ପଦାର୍ପଣ କରିଛନ୍ତି ଦାଦା । ତାଙ୍କର ଅନେକ ରେକର୍ଡ ହୋଇଛି ଯାହାକୁ ଅନ୍ୟ କେହି ଖେଳାଳି ଭାଙ୍ଗିପାରିନାହାନ୍ତି ।
ସୌରଭ ଗାଙ୍ଗୁଲି ଶେଷ ଥର ପାଇଁ ପଡ଼ିଆରେ ପାଦ ଦେବାର ଅନେକ ବର୍ଷ ବିତିଯାଇଛି । କିନ୍ତୁ ତାଙ୍କର ସଫଳତା ଏବେ ବି କ୍ରିକେଟ୍ ପ୍ରଶଂସକଙ୍କ ହୃଦୟରେ ଜୀବିତ ଅଛି । ସେ କେବଳ ରନ୍ ସ୍କୋର କରିନଥିଲେ, ବରଂ ଟିମ୍ ଇଣ୍ଡିଆକୁ ପ୍ରାଧାନ୍ୟ ବିସ୍ତାର କରିବାର ସାହସ ମଧ୍ୟ ଦେଇଥିଲେ। ଆଜି ତାଙ୍କ ଜନ୍ମଦିନରେ ଆସନ୍ତୁ ଜାଣିବା 'ଦାଦା'ଙ୍କ ସେହି ୫ଟି ରେକର୍ଡ ଯାହା ଏବେ ବି ରହିଛି । ହୁଏତ ଭବିଷ୍ୟତରେ କେହି ଏହାକୁ ଭାଙ୍ଗିପାରିବେ ନାହିଁ ।
ଦିନିକିଆରେ ସବୁଠୁ ବଡ଼ ଭାଗିଦାରୀ- ଯେତେବେଳେ ସୌରଭ ଗାଙ୍ଗୁଲି ଏବଂ ସଚିନ୍ ତେନ୍ଦୁଲକର କ୍ରିଜରେ ଥିଲେ, ସେତେବେଳେ ବିପକ୍ଷ ଦଳର ବୋଲର ନାକରେ କାନ୍ଦୁଥିଲେ । ଏହି ଦୁଇ କିମ୍ବଦନ୍ତୀ ମିଶି ୧୭୬ ଇନିଂସରେ ୮୨୨୭ ରନ୍ କରିଥିଲେ । ଏ ପର୍ଯ୍ୟନ୍ତ କୌଣସି ଯୋଡ଼ି ଏକଦିବସୀୟ କ୍ରିକେଟରେ ୬୦୦୦ ରନ୍ ଛୁଇଁ ନାହାଁନ୍ତି ।
ବାମହାତୀ ବ୍ୟାଟ୍ସମ୍ୟାନ ଭାବେ ବଡ଼ ଟେଷ୍ଟ ସ୍କୋର- ଗାଙ୍ଗୁଲି ୨୦୦୭ରେ ପାକିସ୍ତାନ ବିପକ୍ଷରେ ୨୩୯ ରନର ଇନିଂସ ଖେଳିଥିଲେ। ଏହି ଇନିଂସ ଏଯାଏ କେହି ଭାରତୀୟ ବାମହାତୀ ବ୍ୟାଟରଙ୍କ ଦ୍ୱାରା ସର୍ବୋତ୍ତମ ଟେଷ୍ଟ ସ୍କୋର। ଅନେକ ବଡ଼ ଖେଳାଳି ଆସିଛନ୍ତି ଏବଂ ଯାଇଛନ୍ତି, କିନ୍ତୁ ଏହି ରେକର୍ଡ ଆଜି ବି ଅକ୍ଷୂର୍ଣ୍ଣ ।
ଦିନିକିଆରେ ୪ଥର ପ୍ଲାୟର ଅଫ୍ ଦି ମ୍ୟାଚ- ୧୯୯୭ରେ ସୌରଭ ଗାଙ୍ଗୁଲି ଏପରି କିଛି କରିଥିଲେ ଯାହା ଆଜି ପର୍ଯ୍ୟନ୍ତ କେହି କରିନାହାନ୍ତି । ସେ ଲଗାତାର ୪ଟି ଦିନିକିଆ ମ୍ୟାଚ୍ ରେ 'ପ୍ଲେୟାର ଅଫ୍ ଦି ମ୍ୟାଚ୍' ଟାଇଟଲ୍ ଜିତିଥିଲେ। ଏହା ଏବେ ବି ଏକ ବିଶ୍ୱ ରେକର୍ଡ । ଫର୍ମରେ ରହିବା ଏବଂ ଶୀର୍ଷରେ ରହିବା ଗାଙ୍ଗୁଲିଙ୍କ ବିଶେଷତ୍ୱ ଥିଲା ।
ଚମ୍ପିଆନ୍ସ ଟ୍ରଫି ଫାଇନାଲରେ ରେକର୍ଡ- ଚାମ୍ପିଅନ୍ସ ଟ୍ରଫି ୨୦୦୦ , ଯାହାକୁ ମିନି ବିଶ୍ୱକପ୍ ମଧ୍ୟ କୁହାଯାଏ, ଫାଇନାଲରେ ସୌରଭ ଗାଙ୍ଗୁଲି ୧୧୭ ରନ୍ର ଏକ ଚମତ୍କାର ଇନିଂସ ଖେଳିଥିଲେ । ଚାମ୍ପିଅନ୍ସ ଟ୍ରଫି ଫାଇନାଲରେ ଏହି ଇନିଂସ ଏବେ ବି ସର୍ବାଧିକ ସ୍କୋର । ଏତେ ବଡ଼ ଟୁର୍ଣ୍ଣାମେଣ୍ଟର ଫାଇନାଲରେ ଏମିତିକା ପ୍ରଦର୍ଶନ ବହୁତ କମ୍ ଦେଖିବାକୁ ମିଳେ ।
ବିଶ୍ୱକପରେ ସବୁଠୁ ବଡ଼ ପାଳି- ୧୯୯୯ ବିଶ୍ୱକପରେ ସୌରଭ ଗାଙ୍ଗୁଲି ଶ୍ରୀଲଙ୍କା ବିପକ୍ଷରେ ୧୮୩ ରନ କରିଥିଲେ। ବିଶ୍ୱକପରେ ଏହି ଇନିଂସ ଏବେ ବି ଭାରତର କୌଣସି ବ୍ୟାଟ୍ସମ୍ୟାନଙ୍କ ଦ୍ୱାରା ସର୍ବାଧିକ ସ୍କୋର । ରୋହିତ, ବିରାଟ ଏବଂ ସେହୱାଗଙ୍କ ଭଳି ମହାନ୍ ଖେଳାଳିଙ୍କ ସତ୍ତ୍ୱେ, ଗାଙ୍ଗୁଲିଙ୍କ ରେକର୍ଡ ଏବେ ବି ଅତୁଟ ।
