ଭୁବନେଶ୍ୱର,୦୭/୦୭: ଭାରତର ଦ୍ରୁତତମ ଧାବକ ଅନିମେଶ କୁଜୁର ନୂଆ ଜାତୀୟ ରେକର୍ଡ ପ୍ରତିଷ୍ଠା କହିଛନ୍ତି । ସେ ଗ୍ରୀସର ଡ୍ରୋମିଆ ଅନ୍ତର୍ଜାତୀୟ ସ୍ପ୍ରିଣ୍ଟ ଓ ରିଲେ ମିଟ୍ରେ ୧୦୦ ମିଟରକୁ ୧୦.୧୮ ସେକେଣ୍ଡ ନେଇ ତୃତୀୟ ସ୍ଥାନରେ ରହିଥିଲେ । ପ୍ରଥମ ଥର କୌଣସି ଭାରତୀୟ ୧୦୦ ମିଟରରେ ୧୦.୨୦ ସେକେଣ୍ଡ ମଧ୍ୟରେ ଦୌଡ଼ିବାର ରେକର୍ଡ କରିଛନ୍ତି । ତାଙ୍କର ଏହି ସଫଳତା ପାଇଁ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ, କ୍ରୀଡ଼ା ଓ ଯୁବସେବା ମନ୍ତ୍ରୀ ସୂର୍ଯ୍ୟବଂଶୀ ସୂରଜ ଅଭିନନ୍ଦନ ଜଣାଇଛନ୍ତି ।
ଅନିମେଶ କଳିଙ୍ଗ ଷ୍ଟାଡିୟମରେ ଥିବା ଓଡ଼ିଶା ରିଲାଏନ୍ସ ଫାଉଣ୍ଡେସନ୍ ଆଥଲେଟିକ୍ସ ଉଚ୍ଚ ପ୍ରଦର୍ଶନ କେନ୍ଦ୍ରରେ ପ୍ରଶିକ୍ଷଣ ନେଉଛନ୍ତି । ସେ ଜାତୀୟ ପ୍ରତିଯୋଗିତାରେ ଓଡ଼ିଶା ଦଳରୁ ପ୍ରତିନିଧିତ୍ୱ କରିଥାନ୍ତି । ଅନିମେଶ ତୃତୀୟ ସ୍ଥାନରେ ରହିଥିବାବେଳେ ଦକ୍ଷିଣ ଆଫ୍ରିକାର ବେଞ୍ଜାମିନ ରିଚାର୍ଡସନ୍ (୧୦.୦୧ ସେକେଣ୍ଡ) ସ୍ୱର୍ଣ୍ଣ ଏବଂ ଓମାନର ଅଲି ଅନୱାର ଅଲ-ବାଲୁସି (୧୦.୧୨ ସେକେଣ୍ଡ) ରୌପ୍ୟ ପଦକ ଜିତିଛନ୍ତି ।
ଗ୍ରୀସରେ ଆୟୋଜିତ ହେଉଥିବା ଡ୍ରୋମିଆ ଇଣ୍ଟରନ୍ୟାସନାଲ ସ୍ପ୍ରିଣ୍ଟ ଏବଂ ରିଲେ ମିଟ୍ ରେ ପୁରୁଷ ୧୦୦ ମିଟର ଦୌଡ଼ ପ୍ରତିଯୋଗିତାରେ ୧୦.୧୮ ସେକେଣ୍ଡର ଜାତୀୟ ରେକର୍ଡ ସ୍ଥାପନ କରି ରାଜ୍ୟ ତଥା ଦେଶକୁ ଗର୍ବିତ କରାଇଥିବା ଓଡ଼ିଆ ଧାବକ ଅନିମେଷ କୁଜୁରଙ୍କୁ ହାର୍ଦ୍ଦିକ ଶୁଭେଚ୍ଛା ଜଣାଇବା ସହ ତାଙ୍କର ଉତ୍ତରୋତ୍ତର ଉନ୍ନତି ଓ ଉଜ୍ଜ୍ୱଳ ଭବିଷ୍ୟତ… pic.twitter.com/Gc0IwoZn6K
— Mohan Charan Majhi (@MohanMOdisha) July 6, 2025
ବେଙ୍ଗାଲୁରୁରେ ଆୟୋଜିତ ଗତ ଇଣ୍ଡିଆନ ଗ୍ରାଁପ୍ରି-୧ରେ ଅନିମେଶ ପୂର୍ବ ରେକର୍ଡ ଭଙ୍ଗ କରି ନୂଆ ରେକର୍ଡ (୧୦.୨୦ ସେକେଣ୍ଡ) କରିଥିଲେ । ସେ ଗୁରିନ୍ଦରବୀର ସିଂଙ୍କ ରେକର୍ଡ ଭାଙ୍ଗିଥିଲେ । ନିଜର ଟାଇମିଂରେ ସୁଧାର ଆଣିଥିବାରୁ ଅନିମେଶ ବେଶ ଖୁସି ପ୍ରକାଶ କରିଛନ୍ତି । ୪ ଗୁଣା ୧୦୦ ମିଟର ରିଲେ ଦଳ ଚଣ୍ଡୀଗଡ଼ରେ ଆୟୋଜିତ ଜାତୀୟ ରିଲେ ପ୍ରତିଯୋଗିତାରେ ନୂଆ ରେକର୍ଡ (୩୮.୬୯) ପ୍ରତିଷ୍ଠା କରିଥିଲେ । ସେ ଏହି ଦଳର ସଦସ୍ୟ ଥିଲେ ।
ଗ୍ରୀସ୍ରେ ଓଡ଼ିଆ ଆଥଲେଟ୍ ଲାଲୁ ପ୍ରସାଦ ଭୋଇ ଓ ମୃତ୍ୟୁଞ୍ଜୟ ଜୟରାମ ଦଣ୍ଡପତି ମଧ୍ୟ ୧୦୦ ମିଟରରେ ଦୌଡ଼ିଥିଲେ । ଫାଇନାଲ ଏ’ରେ ଲାଲୁ (୧୦.୪୨) ଚତୁର୍ଥ ଏବଂ ମୃତ୍ୟୁଞ୍ଜୟ (୧୦.୪୭) ପଞ୍ଚମ ସ୍ଥାନରେ ରହିଥିଲେ । ଅନିମେଶ ବି’ ଫାଇନାଲରେ ଦୌଡ଼ିଥିଲେ । ୪ ଗୁଣା ୧୦୦ ମିଟର ରିଲେ ଦଳରେ ଲାଲୁ, ଜୟରାମ ଓ ଅନିମେଶ ସାମିଲ ରହିଥିଲେ । ଏହି ଦଳ ୩୯.୯୯ ସେକେଣ୍ଡ ନେଇ ଦ୍ୱିତୀୟ ସ୍ଥାନରେ ରହିଥିଲ।
