ପୁରୀ, ୦୮/୦୯: ଆଜି ନୀଳକନ୍ଦରକୁ ବାହୁଡ଼ିବେ ନୀଳାଦ୍ରିନାଥ। ମହାପ୍ରଭୁଙ୍କ ଆସିବା ପୂର୍ବରୁ ଶ୍ରୀମନ୍ଦିର ସରିଛି ପ୍ରସ୍ତୁତି। ଶ୍ରୀବିଗ୍ରହଙ୍କ ଶ୍ରୀମସ୍ତକ ଉପରେ ଶୋଭା ପାଇବ ନୂତନ କନକମୁଣ୍ଡି ଚାନ୍ଦୁଆ। ରତ୍ନସିଂହାନ ଉପରେ ଲାଗିବ କନକମୁଣ୍ଡି ଚାନ୍ଦୁଆ। ଠାକୁରଙ୍କ ପହଣ୍ଡି ପୂର୍ବରୁ ନୂତନ କନକମୁଣ୍ଡି ଚାନ୍ଦୁଆ ବନ୍ଧା ଯିବ । ବଡ଼ଓଡ଼ିଆ ମଠ ପକ୍ଷରୁ ମହାପ୍ରଭୁଙ୍କ ପାରମ୍ପରିକ ଦର୍ଜୀ ସେବକ ଚାନ୍ଦୁଆ ତିଆରିଛନ୍ତି ।
ପଞ୍ଚବର୍ଣ୍ଣୀ ରଙ୍ଗରେ ପ୍ରସ୍ତୁତ ହୋଇଛି ଏହି ନୂତନ କନକମୁଣ୍ଡି ଚାନ୍ଦୁଆ । ସିଲ୍କ ଓ କଟନ୍ କନାରେ ଚାନ୍ଦୁଆ ପ୍ରସ୍ତୁତ ହୋଇଛି । ମହାପ୍ରଭୁଙ୍କ ଶ୍ରୀମସ୍ତକ ଉପରେ ହଳଦିଆ ରଙ୍ଗ, ଦେବୀ ସୁଭଦ୍ରାଙ୍କ ଶ୍ରୀମସ୍ତକ ଉପରେ ନାଲି ରଙ୍ଗ ଓ ବଡ଼ଠାକୁରଙ୍କ ଶ୍ରୀମସ୍ତକ ଉପରେ ସବୁଜ କପଡ଼ା ଚଉକ ରହିଛି । ଧଳାପଟି, ହଳଦିଆ ପଟି, ଖଣ୍ଡୁଆଳି ପଟି, ସବୁଜ ପଟି, ମୋଡ଼ା ପଟି, ନାଲି ପଟି, କଳା ରଙ୍ଗ ପଟି ପରକୁ ପର ରହି ଚାନ୍ଦୁଆ ତିଆରି ହୋଇଛି ।ଶ୍ରୀବିଗ୍ରହ ରତ୍ନସିଂହାସନରେ ଅଧିଷ୍ଠିତ ହେବା ପୂର୍ବରୁ ସିଂହାସନ ମାର୍ଜନା କରାଯାଏ । ବଡ଼ ଓଡ଼ିଆ ମଠ ମହନ୍ତ ଏହି ସେବା କରନ୍ତି ।
