ଭୁବନେଶ୍ୱର,୧୩।୯: ଆମ ବଡ଼ଗଡ଼ର ବଡ଼ ଶ୍ରୀଗଣେଶ । ପ୍ରତିବର୍ଷ ଭଳି ଚଳିତ ବର୍ଷ ମଧ୍ୟ ୫୫ଫୁଟ ଉଚ୍ଚର ଗଣେଶ ମୂର୍ତ୍ତି ନିର୍ମାଣ ଚାଲିଛି । ଜଟଣୀର ଅଭିଜ୍ଞ ଓଡ଼ିଆ ଶିଳ୍ପୀଙ୍କ କରକମଳରେ ନିଖୁଣ କଳାକୃତ୍ତି ଶୋଭାପାଇବ । ଠାକୁରଙ୍କୁ ଅଧିକ ସୁନ୍ଦର କରିବା ପାଇଁ ଚଳିତ ବର୍ଷ ସମସ୍ତଙ୍କ ସହଯୋଗରେ ୧୦ କେଜିର ରୁପା ପାଦ ନିର୍ମାଣ ହୋଇ ଆସିଛି । ମୂର୍ତ୍ତି କାମର ଅନ୍ତିମ ପର୍ଯ୍ୟାୟରେ ଏହି ରୁପା ପାଦ ଠାକୁରଙ୍କ ପଦଶ୍ରୀ ମଣ୍ଡନ କରିବ । ୬ ଦିନ ବ୍ୟାପୀ ଏହି ମହୋତ୍ସବର ପ୍ରତିଟି ସନ୍ଧ୍ୟା ହେବ ଆକର୍ଷଣୀୟ । ବିଶାଳ ଜର୍ମାନ ହ୍ୟାଙ୍ଗରରେ ଓଲିଉଡ୍ର ଖ୍ୟାତନାମା କଣ୍ଠଶିଳ୍ପୀଗଣ ସଙ୍ଗୀତ ପରିବେଷଣ କରି ଲୋକଙ୍କୁ ମନୋରଞ୍ଜନର ଖୋରାକ ଯୋଗାଇବେ । ଠାକୁରଙ୍କୁ ଦର୍ଶନ କରି ନିରାପଦରେ ମୀନାବଜାର ବୁଲିବେ । ବିଭିନ୍ନ ରକମର ଖାଦ୍ୟ, ମନୋହରୀ ଦୋକାନର ସମ୍ଭାରରେ ଲୋକେ ଏକ ନିଆରା ଅନୁଭବ ସାଉଁଟିବେ । ରଙ୍ଗିନ ଆଲୋକରେ ଝଲସିବ ସନ୍ଧ୍ୟାର ପରିବେଶ । ଏହି ମହତ ଲକ୍ଷ୍ୟରେ ସଫଳ ହେବା ଦିଗରେ ବଡ଼ଗଡ଼ ଗ୍ରାମର ଆବାଳବୃଦ୍ଧବନିତା ହାତ ମିଳାଇଛନ୍ତି । ମହୋତ୍ସବକୁ ସର୍ବଜନବିଦିତ କରିବା ଲାଗି ବିପୁଳ ଅର୍ଥ ବ୍ୟୟ କରିବା ଲାଗି ପ୍ରସ୍ତୁତ ହୋଇଛନ୍ତି । ଘର ଘର ପିଛା ଆର୍ଥିକ ସହଯୋଗ କରି ମହୋତ୍ସବ କମିଟିର ହାତମୁଠାକୁ ଟାଣ କରିଛନ୍ତି । ଚଳିତ ବର୍ଷ ଜର୍ମାନ ହ୍ୟାଙ୍ଗର ମଞ୍ଚକୁ ଆସୁଛନ୍ତି ରାଜ୍ୟର ନାମୀ କଳାକାରଗଣ ।
ପ୍ରଥମ ଦିନ ସନ୍ଧ୍ୟାରେ ଦୀପ୍ତିରେଖା ପାଢ଼ୀ ଓ ସାଥୀଗଣ ସଙ୍ଗୀତ ପରିବେଷଣ କରିବେ । ତା’ପର ସନ୍ଧ୍ୟାରେ କୁଲଦୀପ, ନଭ୍ୟାଙ୍କ ଟ୍ରୁପ୍, ଆର୍ଏସ୍ କୁମାର, ସ୍ମିତା ପଣ୍ଡା, ୨୨ ତାରିଖ ସନ୍ଧ୍ୟାରେ ଅସୀମା ପଣ୍ଡା ଓ ସାଥୀ, ୨୩ ସନ୍ଧ୍ୟାରେ ହ୍ୟୁମାନ ସାଗର ଟ୍ରୁପ୍ ଏବଂ ଶେଷ ସନ୍ଧ୍ୟାରେ ମଣ୍ଟୁ ଛୁରିଆ, ଦେବେଶ ପତି ଓ ସାଥୀଗଣ ଧୁମ୍ ମଚାଇବେ । ବହୁମୂଲ୍ୟ ଶ୍ରୀଗଣେଶଙ୍କ ରୁପା ପାଦର ସୁରକ୍ଷା ପାଇଁ କମିଶନରେଟ୍ ପୁଲିସ ଓ ବ୍ରାଇଟ୍ ଷ୍ଟାର କ୍ଲବ୍ର ସଦସ୍ୟଗଣ ଦିନରାତି ଜଗିବେ । ପୁଲିସଙ୍କ ପାଇଁ ପାଗୋଡ଼ା ଭଳି ଷ୍ଟଲ ନିର୍ମାଣ କରାଯାଉଛି । ଗଣେଶଙ୍କ ଆଭୂଷଣ ଓ ପରିପାଟ୍ଟୀ ଲାଗି ସୋନପୁରରୁ ସ୍ୱତନ୍ତ୍ର ବସ୍ତ୍ର ଆସିଛି । ମହୋତ୍ସବକୁ ଅଧିକ ଲୋକାଭିମୁଖୀ କରିବା ଦିଗରେ ସମସ୍ତ ଆୟୋଜନ ପ୍ରସ୍ତୁତ ବୋଲି ମହୋତ୍ସବ କମିଟି ସୂଚନା ଦେଇଛି ।
